బట్టలపై పడిన నూనె మరకల్ని తొలగించే సులువైన చిట్కాలు

వంటగదిలో పనిచేసేటప్పుడు, తినేటప్పుడు లేదా బయట ఫంక్షన్లప్పుడు తినే సమయంలో బట్టలపై నూనె మరకలు పడటం సర్వసాధారణం. అయితే, ఇవి ఒక్కసారి బట్టలపై పడితే వాటిని వదిలించడం చాలా కష్టం. ఈ మరకలు పడిన వెంటనే వాటిని తొలగించడానికి ప్రయత్నించాలి. లేదంటే మొండి మరకలుగా మారిపోతాయి. ఇక, తెల్ల బట్టలపై నూనె మరకలు పడితే అవి స్పష్టంగా కనిపిస్తాయి. దీంతో ఇబ్బందిగా ఉంటుంది. ఆ బట్టల్ని మళ్లీ వేసుకోవడానికి చాలా మంది వెనకాడుతుంటారు.

బట్టలపై పడ్డ నూనె మరకల్ని వదిలించుకోవడానికి చాలా మంది కష్టపడుతుంటారు. మరికొందరు వీటిని డ్రై క్లీనింగ్‌కి ఇస్తుంటారు. అయితే, ఇంట్లో కొన్ని సింపుల్ చిట్కాలు పాటించడం వల్ల బట్టలపై పడ్డ నూనె మరకల్ని తొలగించుకోవచ్చు. వంటగదిలో దుస్తులపై నూనె మరకలు పడితే ఎలా తొలగించుకోవాలో మాస్టర్ చెఫ్ పంకజ్ బధోరియా చెప్పారు. ఆమె చెప్పిన ట్రిక్‌తో పాటు మిగతా చిట్కాలపై కూడా ఓ లుక్కేద్దాం.

టాల్కమ్ పౌడర్ ట్రిక్

మాస్టర్ చెఫ్ పంకజ్ బధోరియా ఈ సింపుల్ ట్రిక్‌ను షేర్ చేశారు. ఇందుకోసం నూనె పడ్డ వెంటనే బట్టల్ని తీసుకుని వాటిపై టాల్కమ్ పౌడర్ అప్లై చేయండి. ఒక బ్రష్ సాయంతో టాల్కమ్ పౌడర్ అప్లై అయ్యేలా చూసుకోండి. అంతేకానీ పౌడర్‌ని మరకపై రుద్దకండి. ఇప్పుడు బట్టల మరకపైనా కింద ఓ టిష్యూ పేపర్ ఉంచండి.

ఇప్పుడు ఐరన్ బాక్స్ వేడి చేసి దానిపై ప్రెస్ చేయండి. ఇలా చేయడం వల్ల సగం నూనెను టిష్యూ పేపర్ గ్రహిస్తుంది. మిగతా సగం నూనెను టాల్కమ్ పౌడర్ గ్రహిస్తుంది. ఇప్పుడు రోజు ఉతుక్కున్నట్టే మరకలు పడ్డ దుస్తుల్ని వాష్ చేసుకోండి. ఆ తర్వాత బట్టల్ని ఎండలో ఉంచండి. మరక తొలగిపోవడాన్ని మీరు గమనించవచ్చు.

బేకింగ్ సోడా బాగా పనిచేస్తుంది

ముందుగా నూనెతో తడిసిన వస్త్రం కింద ఒక ప్లేట్ లేదా మందపాటి కార్డ్‌బోర్డ్ ఉంచండి. ఇది మరక వ్యాప్తి చెందకుండా నిరోధిస్తుంది. ఇప్పుడు నూనె పడ్డ ప్రాంతంలో బేకింగ్ సోడాను చల్లుకోండి. బేకింగ్ సోడా నూనెను గ్రహిస్తుంది. అందుకే బేకింగ్ సోడాతో మరకను పూర్తిగా కవర్ చేయండి.ఆ తర్వాత బేకింగ్ సోడా మీద డిష్ వాషింగ్ లిక్విడ్ పోయాలి. డిష్ వాషింగ్ లిక్విడ్‌లో నూనె మరకల్ని విచ్ఛిన్నం చేసే లక్షణాలు ఉంటాయి.

ఆ తర్వాత చెంచా సాయంతో బేకింగ్ సోడా, డిష్ వాషింగ్ లిక్విడ్‌ను పేస్ట్‌గా కలిపి, మరకలు ఉన్న ప్రదేశంలో సమానంగా విస్తరించండి. ఈ పేస్ట్‌ను దాదాపు 10 నిమిషాలు అలాగే ఉంచండి. ఈ మిశ్రమం ఫాబ్రిక్ ఫైబర్‌ల్లోని నూనె మరకల్ని బయటకు తీస్తుంది. ఆ తర్వాత బట్టల్ని సాధారణ నీటితో శుభ్రం చేసుకోండి. ఇది మరకను తొలగించడానికి బాగా పనిచేస్తుంది.

నిమ్మకాయ, బేకింగ్ సోడా మిశ్రమం

వంటల సమయంలో కాకుండా వేరే వాటి వల్ల నూనె మరకలు బట్టలపై పడితే ఈ చిట్కా బాగా పనికొస్తుంది.ఇ ఇందుకోసం ముందుగా బేకింగ్ సోడా తీసుకొని తగినంత నిమ్మరసంతో కలిపి పలుచని ద్రావణం తయారు చేయండి. ఈ మిశ్రమాన్ని మరకపై అప్లై చేసి అరగంట పాటు అలాగే ఉంచండి. ఆ తర్వాత దుస్తుల్ని ఉతకాలి. ఈ పద్ధతి దుస్తులపై ఉన్న నూనె మరకలను తొలగిస్తుంది.

పాటించాల్సిన జాగ్రత్తలు

​మరక పడిన వెంటనే దాన్ని తొలగించడానికి ప్రయత్నించండి. ఇలా చేయడం వల్ల మంచి ఫలితాలు వస్తాయి.

పట్టు లేదా చాలా సున్నితమైన బట్టలపై ఉపయోగించే ముందు ప్యాచ్ టెస్ట్ చేయండి.

మరకను తొలగించే ముందు వేడి నీటిని ఉపయోగించవద్దు. ఎందుకంటే ఇది మరకను ఇంకా వ్యాపించేలా చేయవచ్చు.

మరక మొండిగా మారితే వదిలించడం కష్టమవుతుంది. ఇలాంటి సమయంలో డ్రై క్లీనింగ్‌కు ఇవ్వొచ్చు.

బట్టలపై మరక పడిన వెంటనే రుద్దడం లేదా స్క్రబ్ చేయడం లాంటి పనులు చేయకండి. బదులుగా మీరు మరకపై టిష్యూ పేపర్‌ను ఉంచి దానిని తట్టాలి. దీంతో అదనపు నూనె టిష్యూకు బదిలీ అవుతుంది. దీంతో బట్టలు మొత్తం వ్యాపించదు.