9వ తరగతి విద్యార్థులకు సూపర్ ఛాన్స్.. ఇస్రోలో ట్రైనింగ్

తొమ్మిదో తరగతి విద్యార్థులకు భారత అంతరిక్ష పరిశోధన సంస్థ ( ఇస్రో ) అద్భుత అవకాశం కల్పిస్తోంది. స్పేస్ టెక్నాలజీ, స్పేస్ సైన్స్, స్పేస్ అప్లికేషన్ల మీద చిన్న వయసులోనే స్కూలు విద్యార్థులకు అవగాహన కల్పించాలని ఇస్రో నిర్ణయించింది. ఈ ఉద్దేశంతో యంగ్ సైంటిస్ట్ ప్రోగ్రామ్ ప్రారంభించింది. దీనినే యువ విజ్ఞాని కార్యక్రమం (YUVIKA) పేరుతో అమలు చేస్తున్నారు. ఈ నేపథ్యంలోనే ఇస్రో తన యంగ్ సైంటిస్ట్ ప్రోగ్రామ్ 2026 ఎడిషన్‌ను ఇటీవల ప్రకటించింది. ఈ యువికా కార్యక్రమం ద్వారా యువ ప్రతిభను గుర్తించి, విద్యార్థులను సైన్స్, టెక్నాలజీ, ఇంజనీరింగ్, గణితం (STEM)కెరీర్‌ల వైపు నడిపించాలనే లక్ష్యంతో ఇస్రో ఈ కార్యక్రమాన్ని రూపొందించింది.

ఎవరు దరఖాస్తు చేసుకోవచ్చంటే..

జనవరి 1, 2026 నాటికి మనదేశంలో 9వ తరగతి చదువుతున్న విద్యార్థులు దరఖాస్తు చేసుకోవడానికి అర్హులు. దేశవ్యాప్తంగా ఉన్న విద్యార్థులకు సమాన అవకాశం కల్పించేలా, ప్రతి రాష్ట్రం, కేంద్రపాలిత ప్రాంతం నుంచి ప్రాతినిధ్యం కల్పించనున్నారు.

ఎంపిక చేసే విధానం..

వివిధ దశలలో మెరిట్ ఆధారంగా ఎంపిక చేస్తారు. విద్యార్థులు 8వ తరగతిలో సాధించిన మార్కులకు 50 శాతం వెయిటేజీ ఉంటుంది. ఆన్ లైన్ క్విజ్ ప్రదర్శనకు 10 శాతం, సైన్స్ ఫెయిర్స్, కో కరికులర్ యాక్టివిటీస్‌లో భాగస్వామ్యానికి 2 నుంచి 10 శాతం, ఒలింపియాడ్ వంటి కార్యక్రమాల్లో చూపిన ప్రతిభకు 2 నుంచి 5 శాతం, స్పోర్ట్స్ కాంపిటీషన్ ప్రదర్శనకు 2 నుంచి 5 శాతం, స్కౌట్స్ అండ్ గైడ్స్, ఎన్‌సీసీ, ఎన్‌ఎస్ఎస్ సభ్యులకు 5 శాతం, గ్రామ పంచాయతీలలోని గ్రామీణ పాఠశాలల్లో చదివే విద్యార్థులకు 15 శాతం వెయిటేజీ ఇస్తారు.

ఇస్రో యువికా -2026 ప్రోగ్రామ్ సెంటర్లు

మరోవైపు ఇస్రో యువికా కార్యక్రమాన్ని తొమ్మిది ఇస్రో సెంటర్లలో నిర్వహించనున్నారు.

ఇండియన్ ఇన్‍స్టిట్యూట్ ఆఫ్ రిమోట్ సెన్సింగ్, డెహ్రాడూన్

విక్రమ్ సారాభాయ్ అంతరిక్ష కేంద్రం, తిరువనంతపురం

సతీష్ ధావన్ అంతరిక్ష కేంద్రం, శ్రీహరికోట

యు.ఆర్. రావు ఉపగ్రహ కేంద్రం, బెంగళూరు

స్పేస్ అప్లికేషన్స్ సెంటర్, అహ్మదాబాద్

నేషనల్ రిమోట్ సెన్సింగ్ సెంటర్, హైదరాబాద్

నార్త్-ఈస్టర్న్ స్పేస్ అప్లికేషన్స్ సెంటర్, షిల్లాంగ్

ఇస్రో ప్రొపల్షన్ కాంప్లెక్స్, మహేంద్రగిరి

రీజినల్ రిమోట్ సెన్సింగ్ సెంటర్, జోధ్‌పూర్

ఈ ట్రైనింగ్‌లో భాగంగా విద్యార్థులు అంతరిక్ష ప్రయోగశాలలు, ఉపగ్రహ సాంకేతికత, రిమోట్ సెన్సింగ్ అప్లికేషన్లు, ప్రొపల్షన్ వ్యవస్థలను ప్రత్యక్షంగా చూసి తెలుసుకుంటారు. ఎంపికైన విద్యార్థులతో పాటుగా వారి కుటుంబంలో ఒకరికి అంతరిక్ష కేంద్రంలోకి వెళ్లే అవకాశం కల్పిస్తారు. మరోవైపు ఎంపిక అయిన విద్యార్థులకు ఇస్రో ప్రయాణ ఖర్చులను కూడా రీయింబర్స్‌మెంట్ చేస్తుంది. అలాగే భోజనం, వసతి సౌకర్యాలను కూడా కల్పిస్తుంది. కోర్సు మెటీరియల్ కూడా ఇస్రోనే భరించనుంది.

ఇస్రో యువికా - దరఖాస్తు విధానం

ఇస్రో యువికా -2026 కార్యక్రమం కోసం ఆన్‌లైన్‌లో దరఖాస్తు చేసుకోవచ్చు. ఫిబ్రవరి 27 నుంచి దరఖాస్తు చేసుకునేందుకు అవకాశం కల్పించారు. దరఖాస్తు చేసుకోవడానికి మార్చి 31వ తేదీ చివరి తేది. ఏప్రిల్ 13వ తేదీన మొదటి జాబితా, ఏప్రిల్ 20వ తేదీన రెండో ఎంపిక జాబితాను ప్రకటిస్తారు. ఎంపిక అయిన విద్యార్థులకు మే 11 నుంచి 22వ తేదీ వరకూ ట్రైనింగ్ ఇస్తారు.