‘నాకు 13 లేదా 15 ఏళ్లు ఉన్నప్పుడు ట్రంప్, ఎప్‌స్టీన్ లైంగికంగా వేధించారు’

ఎప్‌స్టీన్‌ లైంగిక దారుణాలకు సంబంధించిన మరికొన్ని ఫైల్స్‌ను అమెరికా న్యాయ శాఖ విడుదల చేసింది. ఎఫ్‌బీఐ విచారణకు సంబంధించిన ఈ ఫైల్స్‌లో అమెరికా అధ్యక్షుడు డొనాల్డ్ ట్రంప్ ‌పై ఓ మహిళ చేసిన ఆరోపణలు కీలకంగా మారాయి. ఈ డాక్యుమెంట్ల ప్రకారం.. జెఫ్రీ ఎప్‌స్టీన్ తనను పరిచయం చేసిన తర్వాత, డొనాల్డ్ ట్రంప్ తనపై లైంగిక వేధింపులకు పాల్పడినట్టు బాధిత మహిళ పేర్కొంది.

అయితే ట్రంప్‌పై ఆరోపణలకు ఆధారాలు లేవని అమెరికా న్యాయ శాఖ పేర్కొంది. ఇంతకు ముందు జరిపిన సమీక్షలో ఈ పత్రాలను పొరబాటున డూప్లికేట్‌గా పేర్కొనడంతో వాటిని వెల్లడించకుండా నిలిపేశామని న్యాయశాఖ వివరణ ఇచ్చింది. పబ్లిక్ లైబ్రరీలోని సమాచారంపై ఎవరైనా ఆందోళన వ్యక్తం చేస్తే.. ఆ వివరాలను సమీక్షించి, అవసరమైన సవరణలు చేసి తిరిగి ఆన్‌లైన్లో ఉంచుతున్నామని.. ఈ ప్రక్రియ ఎప్పటి నుంచో జరుగుతోందని అమెరికా న్యాయశాఖ ఎక్స్ ద్వారా వెల్లడించింది.

ఎప్‌స్టీన్ ఫైల్స్‌ను ట్రంప్ యంత్రాంగం నిర్వహించిన తీరుపై డెమొక్రాట్లు ఆగ్రం వ్యక్తం చేస్తున్నారు. గురువారం విడుదల చేసిన పత్రాలలో 2019లో ఎఫ్‌బీఐ ఆ మహిళతో నిర్వహించిన పలు ఇంటర్వ్యూలకు సంబంధించిన వివరణలు ఉన్నాయి. తనకు 13- 15 ఏళ్ల వయసు ఉన్నప్పుడు ఎప్‌స్టీన్, ట్రంప్ ఇద్దరూ తనపై లైంగిక దాడి చేశారని 2019 నాటి ఇంటర్వ్యూల్లో ఆ మహిళ ఆరోపించింది.

ఎప్‌స్టీన్ తనను న్యూయార్క్ లేదా న్యూజెర్సీకి తీసుకెళ్లి ట్రంప్‌కి పరిచయం చేశాడని ఆ మహిళ ఓ ఇంటర్వ్యూలో వెల్లడించింది. ఓరల్ సెక్స్‌కు ట్రంప్ బలవంతం చేయగా.. ఆయన్ను కొరికినట్లు సదరు మహిళ దర్యాప్తు అధికారులకు వివరించింది. ఎప్‌స్టీన్‌తో సంబంధం గురించి మౌనంగా ఉండాలని తనతోపాటు తన సన్నిహితులకు బెదిరింపు కాల్స్ వచ్చాయని ఆ మహిళ తెలిపింది.

అయితే, ఈ ఆరోపణలను తోసిపుచ్చిన ట్రంప్.. తాను ఎలాంటి తప్పు చేయలేదని స్పష్టం చేశారు. గతంలో కొన్ని డాక్యుమెంట్లు విడుదల చేసిన న్యాయశాఖ.. వాటిలో అధ్యక్షుడికి వ్యతిరేకంగా అసత్యమైన, సంచలనాత్మక వాదనలు ఉన్నాయని పేర్కొంది. ట్రంప్‌పై ప్రతికూల ప్రభావితం చూపుతాయనే కారణంతోనే అధికార యంత్రాంగం ఎప్‌స్టీన్ కేసు దర్యాప్తు వివరాలను కప్పిపుచ్చిందని డెమొక్రాట్లు ఆరోపించారు.

1980ల చివరి నుంచి డొనాల్డ్ ట్రంప్, ఎప్‌స్టీన్ మంచి స్నేహితులు. వీరిద్దరూ అనేక సందర్భాల్లో కలిసి ఫొటోలు దిగారు. పామ్ బీచ్‌లోని ఓ భవనం కొనుగోలు విషయమై ఎప్‌స్టీన్‌తో తనకు విబేధాలు తలెత్తాయని ట్రంప్ తెలిపారు. ఎప్‌స్టీన్ ప్రవర్తన నచ్చకపోవడం, క్లబ్‌లోని ఓ సభ్యుడి కుమార్తెను వేధించడంతో.. 2007లో మార్ ఏ లాగో రిసార్ట్ నుంచి ఆయన్ను ట్రంప్ బయటకు పంపించేశారని వైట్ హౌస్ వెల్లడించింది.

ఇంతకు ముందు ప్రజలకు అందుబాటులో ఉంచిన 40 వేలకుపైగా ఫైల్స్ అమెరికా న్యాయశాఖ వెబ్‌సైట్ నుంచి మిస్సయ్యాయని ది వాల్ స్ట్రీట్ జనరల్ రిపోర్ట్ చేసింది. ఈ విషయమై న్యాయశాఖ అధికార ప్రతినిధి వివరణ ఇచ్చారు. 47,635 ఫైళ్లను రివ్యూ చేయడం కోసం ఆన్‌లైన్ నుంచి తొలగించామని.. తర్వాత వాటిని మళ్లీ పబ్లిష్ చేయొచ్చని ఆ ప్రతినిధి తెలిపారు.