బంగారంపై భారీ డిస్కౌంట్లు.. కొనాలనుకునేవారికి గోల్డెన్ ఛాన్స్!

బంగారానికి ప్రపంచవ్యాప్తంగా ఎంతటి డిమాండ్ ఉందో ప్రత్యేకంగా చెప్పాల్సిన అవసరం లేదు. ప్రపంచంలో ఎక్కడ చూసినా బంగారంపై ప్రజలకు అపారమైన ఆసక్తి, పెట్టుబడిగా పెట్టాలనే నమ్మకం ఉంటుంది. అందుకే బంగారాన్ని ఎప్పటికీ విలువ తగ్గని ఆస్తిగా భావిస్తారు.అయితే ప్రస్తుతం జరుగుతున్న కొన్ని అనూహ్య పరిణామాలు బంగారం మార్కెట్‌లో అసాధారణ పరిస్థితులను సృష్టించాయి. ముఖ్యంగా మిడిల్ ఈస్ట్‌లో నెలకొన్న యుద్ధ ఉద్రిక్తతలు, బంగారం వ్యాపారానికి ప్రధాన కేంద్రంగా నిలిచిన Dubaiలో అనూహ్య మార్పులకు దారితీశాయి.సాధారణంగా ప్రపంచవ్యాప్తంగా బంగారం ధరలు పెరుగుతూ ఉండగా, దుబాయ్‌లో మాత్రం బంగారంపై భారీ డిస్కౌంట్లు కనిపిస్తున్నాయి. యుద్ధ పరిస్థితుల కారణంగా విమాన సర్వీసులు నిలిచిపోవడం, రవాణా వ్యవస్థ అంతరాయం కలగడం వల్ల ఈ పరిస్థితి ఏర్పడింది. తమ వద్ద నిల్వగా ఉన్న బంగారాన్ని ఎక్కువకాలం భద్రపరచడం ఖర్చుతో కూడుకున్నదిగా మారడంతో వ్యాపారులు తక్కువ ధరకే విక్రయించడానికి ముందుకు వస్తున్నారు. లండన్ మార్కెట్ ధరతో పోలిస్తే ఔన్సుపై సుమారు 30 డాలర్ల వరకు తగ్గింపుతో అమ్ముతున్నట్లు సమాచారం.ఎగుమతులు నిలిచిపోవడానికి కారణాలు.దుబాయ్ అనేది ఆసియా, ఆఫ్రికా దేశాలకు బంగారాన్ని శుద్ధి చేసి పంపించే ప్రధాన కేంద్రాల్లో ఒకటి. అయితే Iran క్షిపణి దాడుల భయంతో United Arab Emiratesలో విమాన సర్వీసులు తీవ్రంగా ప్రభావితమయ్యాయి. ప్రస్తుతం అక్కడ కొన్ని విమాన సర్వీసులను పాక్షికంగా నిలిపివేశారు. దీంతో బులియన్ ఎగుమతులు దాదాపు ఆగిపోయాయి.సాధారణంగా బంగారం రవాణాకు ప్రయాణికుల విమానాలనే ఎక్కువగా ఉపయోగిస్తారు. కానీ అవి అందుబాటులో లేకపోవడంతో సరుకు తరలింపులో అంతరాయం ఏర్పడింది. రోడ్డు మార్గం ద్వారా Saudi Arabia లేదా Oman మీదుగా తరలించే అవకాశం ఉన్నప్పటికీ, సరిహద్దుల్లో భద్రతా సమస్యలు, ఇన్సూరెన్స్ ఇబ్బందులు, అధిక రవాణా ఖర్చులు కారణంగా వ్యాపారులు ఆ మార్గాన్ని ఉపయోగించడానికి వెనుకాడుతున్నారు. యుద్ధం ప్రారంభమైనప్పటి నుంచి రవాణా ఖర్చులు దాదాపు 60 నుంచి 70 శాతం వరకు పెరిగినట్లు చెబుతున్నారు.ఇక భారత్ విషయానికి వస్తే, దేశానికి అవసరమైన బంగారంలో పెద్ద భాగం దుబాయ్ నుంచే దిగుమతి అవుతుంది. ప్రస్తుతం రవాణా అంతరాయం కారణంగా భారత్‌లో బంగారం సరఫరా కొంత తగ్గినట్లు కనిపిస్తోంది. అయితే జనవరిలోనే భారత్ పెద్ద మొత్తంలో బంగారం దిగుమతి చేసుకోవడంతో ప్రస్తుతం నిల్వలు సరిపడా ఉన్నాయని విశ్లేషకులు చెబుతున్నారు. అందువల్ల తక్షణం పెద్దగా ఆందోళన చెందాల్సిన పరిస్థితి లేదని వారు అభిప్రాయపడుతున్నారు.అయితే యుద్ధ పరిస్థితులు మరికొన్ని నెలలు కొనసాగితే మాత్రం బంగారం ధరలు మరింత పెరిగే అవకాశముందని నిపుణులు హెచ్చరిస్తున్నారు. అంతర్జాతీయంగా బంగారం ధరలు ఈ ఏడాది ఇప్పటికే దాదాపు 20 శాతం వరకు పెరిగి ఔన్సుకు 5,000 డాలర్లకు చేరువయ్యాయి. యుద్ధ ఉద్రిక్తతలు, డాలర్ బలపడటం వంటి కారణాలతో మార్కెట్‌లో అస్థిరత కొనసాగుతోంది. ముడి బంగారం సరఫరా తగ్గడంతో MMTC-PAMP వంటి పెద్ద రిఫైనరీ సంస్థలు కూడా ఇబ్బందులు ఎదుర్కొంటున్నాయి.దుబాయ్‌లో ప్రస్తుతం కనిపిస్తున్న ధరల తగ్గుదల ప్రధానంగా రవాణా సమస్యల వల్ల వచ్చిన తాత్కాలిక పరిణామమేనని నిపుణులు చెబుతున్నారు. అయితే ఈ పరిస్థితి పెట్టుబడిదారులకు ఒక విభిన్న అనుభూతిని కలిగిస్తోందని మార్కెట్ వర్గాలు పేర్కొంటున్నాయి.