8 గ్రాముల బంగారం, పట్టుచీర, నెలకు రూ.2,500,,,,మహిళలకు విజయ్ పెళ్లి కానుక

ఉచిత పథకాలకు కేరాఫ్ అడ్రస్ అయిన తమిళనాడులో త్వరలో జరగనున్న అసెంబ్లీ ఎన్నికల కోసం రాజకీయ పార్టీలు హామీల వర్షం కురిపిస్తున్నాయి. ఇటీవలే తన పార్టీ ఎన్నికల మేనిఫేస్టోలోని కొన్ని హామీలను తమిళగ వెట్రి కళగం (టీవీకే) అధినేత, నటుడు విజయ్ ప్రకటించిన విషయం తెలిసిందే. పేద కుటుంబాల పిల్లలకు ఉచిత ఉన్నత విద్య, రైతులకు రుణ మాఫీ వంటివి ప్రకటించారు. తాజాగా, మహిళలే లక్ష్యంగా ఆయన కీలక హామీలు ప్రకటించారు. తాము అధికారంలోకి వస్తే అన్ని రకాల ఆర్టీసీ బస్సుల్లోనూ మహిళలకు ఉచితం ప్రయాణం కల్పిస్తామని చెప్పారు. ప్రతి కుటుంబంలోని మహిళా పెద్దకు నెలకు రూ.2,500 ఆర్థిక సాయం, ఒక్కో కుటుంబానికి ఏడాది ఆరు గ్యాస్ సిలిండర్లు ఉచితంగా అందజేయనున్నట్టు తెలిపారు. మహిళా దినోత్సవ వేడుకల్లో పాల్గొన్న విజయ్.. ఈ సందర్భంగా హామీలు ప్రకటించడం గమనార్హం. అంతేకాదు, తన భార్య సంగీతతో విడాకుల వివాదం గురించి కూడా విజయ్ మాట్లాడారు.

మహిళలకు పెళ్లి కానుకను కూడా విజయ్ ప్రకటించారు. తమ పార్టీ అధికారం చేపడితే పెళ్లి చేసుకునే ‘ అన్న విజయ్ సాయం’ పేరుతో మహిళలకు 8 గ్రాముల బంగారం, పట్టుచీర అందజేస్తామని వెల్లడించారు. మహిళల భద్రత కోసం పలు కార్యక్రమాలను చేపట్టనున్నట్టు తెలిపారు. చిన్నారులు, వృద్ధులకు తొలి ప్రాధాన్యత ఇస్తామని, వారి సంక్షేమం, భద్రత కోసం తన పర్యవేక్షణలో ప్రత్యేకంగా ప్రభుత్వ విభాగం ఏర్పాటుచేయనున్నట్టు పేర్కొన్నారు.

మహిళలపై నేరాలను అరికట్టడానికి.. వారి భద్రత కోసం ‘రాణి వేలు నాచాయర్ ఫోర్సెస్’ పేరుతో ప్రత్యేక వ్యవస్థను ఏర్పాటుచేస్తామని, తమిళనాడు వ్యాప్తంగా రద్దీ ఎక్కువగా ఉండే ప్రదేశాల్లో బాడీ కెమెరాలతో కూడిన 500 టీమ్‌లను నియమిస్తామని అన్నారు. ‘మహిళ రక్షణ కోసం ప్రజా రవాణా వ్యవస్థ, షేర్ ఆటోల్లో స్మార్ట్ పానిక్ బటన్లు ఏర్పాటుచేసి.. 24 గంటలూ పనిచేసేలా సెంట్రలైజ్డ్ కమాండ్ కేంద్రాలకు అనుసంధానిస్తాం.. ఏదైనా ముప్పు ఏర్పడితే ఈ బటన్ నొక్కిన ఐదు నిమిషాల్లో అధికారులు స్పందిస్తారు..’ అని తెలిపారు. తమిళనాడులో ఏ ఒక్క పబ్లిక్ ప్లేస్‌ కూడా లైటింగ్, సీసీటీవీ నిఘా లేకుండా ఉండకుండా చూసేలా ‘జీరో డార్క్ స్పాట్స్’ఇనీషియేటివ్ తీసుకొస్తామని విజయ్ హామీ ఇచ్చారు.

ప్రస్తుతం తమిళనాడు ప్రభుత్వం అమలు చేస్తోన్న ఉచిత బస్సు ప్రయాణంపై విజయ్ విమర్శలు గుప్పించారు. కొన్ని బస్సులకు మాత్రమే పరిమితం చేశారని, వాటి కోసం మహిళలు గంటల తరబడి వేచిచూడాల్సి వస్తుందని అన్నారు. తాము అధికారంలోకి వస్తే అన్ని ప్రభుత్వ బస్సుల్లోనూ మహిళలకు ఉచిత ప్రయాణం అందజేస్తామని టీవీకే చీఫ్ హామీ ఇచ్చారు. ఒకటో తరగతి నుంచి ఇంటర్ వరకూ తల్లులకు ఏడాదికి రూ.15,000 ఆర్థిక సాయం అందజేస్తామని తెలిపారు.