బాబును సీఎం చేసేందుకు దేనికైనా సిద్దం: బుద్దా వెంకన్న

చంద్రబాబును మరోమారు ముఖ్యమంత్రి చేయడానికి దేనికైనా తాను సిద్దమని టీడీపీ సీనియర్ నేత, మాజీ ఎమ్మెల్సీ బుద్దా వెంకన్న పేర్కొన్నారు. టీడీపీలో సామాన్య కార్యకర్తగా ఉన్న తనకు పార్టీ ఎంతో ప్రాధాన్యం ఇచ్చిందని ఆయన పేర్కొన్నారు. ఎమ్మెల్సీ పదవితో పాటూ ఉత్తరాంధ్ర బాధ్యతలను అప్పగించిన విషయాన్ని గుర్తు చేశారు. ఈ ఛానల్‌కు ఇచ్చిన ఇంటర్వ్యూలో బుద్దా తన రాజకీయ భవిష్యత్‌పై ఆసక్తికర వ్యాఖ్యలు చేశారు. వచ్చే ఎన్నికల్లో విజయవాడ వెస్ట్ (పశ్చిమ నియోజకవర్గం) నుంచి పోటీ చేస్తానని చెబుతున్నారు. తనకు కానీ.. నాగుల్ మీరాకు కానీ టికెట్ రావడం ఖాయమని ధీమాను వ్యక్తం చేశారు. ఒకవేళ మీరాకు టికెట్ వచ్చినా సరే తాను చీఫ్ ఎలక్షన్ ఏజెంట్‌గా ఉండి మరీ దగ్గరుండి గెలిపిస్తానన్నారు.

ఒకవేళ పశ్చిమ నియోజకవర్గం నుంచి మాజీ ఎమ్మెల్యే జలీల్‌ఖాన్‌కు టికెట్ ఇచ్చినా తమకు అభ్యంతరం లేదన్నారు. టికెట్ వ్యవహారం పూర్తిగా చంద్రబాబు పరిధిలోని అంశమని.. ఆయన ఎవరికి టికెట్ ఇచ్చినా కలిసి పనిచేస్తామని తేల్చి చెప్పారు. ఈ విషయంలో ఎలాంటి అనుమానం లేదన్నారు. టీడీపీలో ఎలాంటి విభేదాలు లేవని.. నేతలంతా కలిసే ఉన్నారన్నారు. చంద్రబాబును ముఖ్యమంత్రిని చేయడం కోసం దేనికైనా సిద్దమన్నారు. వచ్చే ఎన్నికల్లో టీడీపీ తిరిగి అధికారంలోకి రాబోతోందని ధీమాను వ్యక్తం చేశారు.

తాను టీడీపీలో బాగా ఎదగడానికి ఎమ్మెల్యే గద్దే రామ్మోహన్ ప్రధాన కారణమన్నారు బుద్దా వెంకన్న. తనను బాగా ప్రోత్సహించారని.. పార్టీ జాతీయ ప్రధాన కార్యదర్శి నారా లోకేష్ కూడా తన ఎదుగుదలకు కారణమన్నారు. ఎమ్మెల్సీ పదవి చంద్రబాబు తనపై నమ్మకంతో ఇచ్చారని.. పార్టీలో తనకు ఈ స్థాయి దక్కుతుందని ఊహించలేదన్నారు. పార్టీ అన్న తర్వాత చిన్న, చిన్న విభేదాలు ఉంటాయని.. అవన్నీ పెద్ద సమస్య కాదన్నారు. అందరం కలిసి టీడీపీ గెలుపు కోసం ముందుకు సాగుతామన్నారు. మాజీ మంత్రి గంటా శ్రీనివాసరావు పార్టీలోనే ఉన్నారని.. కాకపోతే ఉత్తరాంధ్ర ఇంఛార్జ్‌గా తాను ఎప్పుడూ ఆయన్ను తాను కలవలేదన్నారు. వచ్చే ఎన్నికల్లో టికెట్ల కేటాయింపు విషయంలో చంద్రబాబు జాగ్రత్తలు తీసుకుంటారని చెప్పుకొచ్చారు. గతంలోలా చంద్రబాబు ఉంటారని తాను భావించడం లేదన్నారు.

విజయవాడ ఎంపీ కేశినేని నానితో తనకు పెద్దగా విభేదాలు ఏవీ లేవన్నారు బుద్దా వెంకన్న. గతంలో తామంతా కలిసి పార్టీ కోసం పనిచేశామన్నారు. అన్ని కార్యక్రమాలను కేశినేని భవన్‌లోనే నిర్వహించేవారమని గుర్తు చేశారు. కనకదుర్గ ఫ్లై ఓవర్ కోసం తాను ముందుగా ఉద్యమం చేశానని.. ఎంపీగా కేశినేని నాని గెలిచిన తర్వాత ఫ్లై ఓవర్ మంజూరైందన్నారు. పార్టీలో చిన్న, చిన్న అభిప్రాయ భేదాలు సహజమని.. తమ మధ్య ఫ్యాక్షన్ గొడవలు ఉన్నాయా అన్నారు. ఇంటి గోడ విషయానికి దీనికి సంబంధం లేదన్నారు.