ఉమ్మడి కృష్ణా జిల్లా టీడీపీలో లుకలుకలు...గ్రూపు రాజకీయాలు దారికొచ్చేనా

అధికార పార్టీ వైసీపీపై టీడీపీ అధినేత నారా చంద్రబాబు నాయుడు అలుపెరగని పోరాటానికి దిగితే తెలుగు తమ్ముళ్ల గ్రూపు రాజకీయాలు పెరిగిపోవడం ఆ పార్టీకి పెద్ద తలనొప్పిగా మారింది. తాజాగా ఉమ్మడి కృష్ణా జిల్లా ఇందుకు నిదర్శనంగా మారింది. ఈ జిల్లాలో పార్టీ సీనియర్ల మధ్య విభేదాలు నెలకొన్నాయి. ఈ క్రమంలోనే ఉమ్మడి కృష్ణా జిల్లా టీడీపీలో రాజకీయాలు వేడెక్కాయి. రెండు రోజుల క్రితం ఐక్యతా రాగం వినిపించిన నేతల మధ్య మరోసారి విభేదాలు బయటపడ్డాయి. ఉమ్మడి కృష్ణా జిల్లా టీడీపీ విస్తృతస్థాయి సమావేశం ఏర్పాటు చేయగా.. నియోజకవర్గ ఇంఛార్జ్‌లతో పాటూ నేతలు పాల్గొన్నారు. ఈ సమావేశంలో విజయవాడ ఈస్ట్‌, వెస్ట్‌ నేతలకు సరైన గౌరవం దక్కలేదంటూ కొందరు నేతలు అసంతృప్తిని వ్యక్తం చేశారు. వేదికపై ఏర్పాటు చేసిన ఫ్లెక్సీలో తన ఫొటో లేకపోవడంతో మాజీ ఎమ్మెల్సీ బుద్ధా వెంకన్నతన అసహనాన్ని వ్యక్తం చేశారు. స్టేజ్‌కు మీదకు రావాల్సిందిగా కొల్లు రవీంద్ర బుద్దాని ఆహ్వానించినా నిరాకరించారు.

బుద్ధా వెంకన్న స్టేజిపైకి వెళ్లకుండా కార్యకర్తలతోనే కూర్చున్నారు. మాజీ మంత్రి కొల్లు రవీంద్ర వచ్చి బుజ్జగించినా.. వినిపించుకోకుండా కన్నీళ్లు పెట్టుకున్నారు. బుద్దా వెంకన్న, నాగుల్‌ మీరాలు సమావేశం నుంచి మధ్యలోనే వెళ్లిపోయారు. బుద్దాను ఆపేందుకు వర్ల రామయ్య ప్రయత్నించినా ఆయన ఆగలేదు. అలాగే ఎమ్మెల్యే గద్దె రామ్మోహన్‌ను కూడా స్టేజ్‌ మీదకు ఆహ్వానించలేదంటూ ఆయన అనుచరులు ఆగ్రహం వ్యక్తం చేశారు.

చంద్రబాబు ముఖ్యమంత్రి అవ్వాలని.. ఆయన కోసం ప్రాణాలు ఇవ్వడానికైనా సిద్ధమన్నారు వెంకన్న. తర జీవితంలో తొలిసారి ఈరోజు కంటతడి పెట్టానని ఆవేదన వ్యక్తం చేశారట. జీవితంలో ఎప్పుడూ రాజకీయాల కోసం కంటతడి పెట్టలేదని.. చంద్రబాబు ఈ రాష్ట్రానికి ముఖ్యమంత్రి కావాలని.. ఆయన కోసం ప్రాణాలు ఇవ్వడానికైనా రెడీ అంటూ కామెంట్ చేశారు. బుద్దా వెంకన్న సమావేశం నుంచి వెళ్లిపోవడంతో టీడీపీని వీడుతారంటూ సోషల్ మీడియాలో వార్తలొచ్చాయి.

పార్టీ మారబోతున్నట్లు వస్తున్న ప్రచారంపై బుద్దా వెంకన్న స్పందించారు. కొంతమంది కావాలని తాను పార్టీ వీడుతున్నట్లు సోషల్‌ మీడియాలో వార్తలు పెడుతున్నారన్నారు. తాను జీవించి ఉన్నంతవరకు చంద్రబాబుతోనే ఉండి, ఆయనతోనే కలిసి పనిచేస్తానని తెలిపారు. అసత్య ప్రచారాలను నమ్మవద్దని ఆయన అన్నారు.. చంద్రబాబును ముఖ్యమంత్రిని చేయడమే తన లక్ష్యమన్నారు. టీడీపీని వీడుతానని జరుగుతున్న ప్రచారంలో నిజం లేదన్నారు.