సింహం ముందు ఫ్లూట్...పాముల ముందు వెకిలి వద్దు

సింహం ముందు ఫ్టూట్ వాయించకూడదన్న సందేహం ఎలాంటిదో ఓ వీడియో పాముల ముందు వెకిలిచేష్టలు వద్దు అంటూ హెచ్చరిక చేస్తోంది. పాము.. ఈ పేరు వింటేనే ఆమడ దూరం పరుగెత్తుతారు చాలా మంది. కానీ కొంత మంది మాత్రం చాలా నిర్లక్ష్యంగా వ్యవహరిస్తుంటారు. పాము ఏమైనా చేస్తుందేమో అని లోలోపల భయంగా ఉన్నా.. ధైర్యం నటిస్తూ నిర్లక్ష్యం ప్రదర్శిస్తుంటారు. ఇటువంటి వ్యక్తులు మనకు చాలా మంది కనిపిస్తూ ఉంటారు. కొంతమంది పాముల విషయంలో జాగ్రత్తగా ఉన్నా ఒక్కోసారి మాత్రం ఏవో కారణాల వల్ల వాటి కోపానికి బలవుతుంటారు. ఇలాగే కర్ణాటకలో ఓ వ్యక్తి మూడు కోబ్రాలను మేనేజ్ చేసేందుకు ట్రై చేశాడు. కానీ పరిస్థితి వికటించి వాటి కోపానికి గురయ్యాడు. ఇంతకీ ఏం జరిగిందంటే...

కోబ్రాను ఒక్కదానిని చూస్తే మనలో చాలా మంది జడుసుకుంటారు. అటువంటిది కర్ణాటకకు చెందిన మాజ్ సయ్యద్ అనే యువకుడు చేసిన స్టంట్ చూస్తే ఎవరికైనా సరే ఒళ్లు గగుర్పొడుస్తుంది. మాజ్ సయ్యద్ పాములను పడుతూ ఉండేవాడు. కానీ ఒకసారి సయ్యద్ అడవిలో మూడు కోబ్రాలను పట్టుకున్నాడు. పట్టుకున్న తర్వాత వాటితో ఆటలాడకుండా ఉండాల్సింది. సయ్యద్ మాత్రం ఆ కోబ్రాలను తన ముందు ఉంచుకుని తాను మోకాళ్ల మీద కూర్చున్నాడు. అలా కూర్చున్న సయ్యద్ ఆ కోబ్రాల ముందు అనేక రకాలుగా చేతితో సంజ్ఞలు చేశాడు. అసలే ఆ కోబ్రాలు పిచ్చ కోపంలో ఉన్నట్లు కనిపిస్తున్నాయి. మనోడు వేసిన వెకిలి వేషాలకు ఆ కోబ్రాలకు కోపం నషాలానికి అంటినట్లు ఉంది. అవి వెంటనే మనోడి మీద దాడి చేశాయి. ఆ మూడు కోబ్రాల్లో ఒక కోబ్రా ముందుకు లేచి బుసలు కొడుతూ మనోడి మోకాలిపై గట్టిగా కాటు వేసింది. మనోడు ఆ పామును వదిలించుకునేందుకు ఎంతలా ప్రయత్నించినా ఆ కోబ్రా మాత్రం వదిలిపెట్టలేదు. ఇండియన్ ఫారెస్ట్ అధికారి (ఐఎఫ్ఎస్) సుశాంత్ నంద ఈ వీడియోను ట్విటర్‌లో షేర్ చేశారు. ఇలా పాములతో ఆటలాడటం వల్ల ఒక్కోసారి ప్రాణాల మీదకు రావచ్చు అని ఆయన రాసుకొచ్చారు. సయ్యద్ వెకిలి వేషాలకు భయపడ్డ ఆ కోబ్రాలు మనోడి మీదే దాడి చేశాయి. ఈ వీడియోను ఇలా పోస్ట్ చేయగానే వైరల్‌గా మారింది. అనేక మంది నెటిజన్లు ఈ వీడియోను చూసి మన సయ్యద్ వెకిలి వేషాలను మందలించారు. ఇలా వెకిలి ఆకతాయి వేషాలు వేయడం వల్ల కోబ్రా కోపానికి గురయి.. అతడు అనవరసరంగా పాము కాటుకు గురి కావాల్సి వచ్చింది.