అంతరిక్ష వారోత్సవాలు ముగింపు సభ

అంతరిక్ష ప్రయోగం విజయవంతం చేయడానికి ఇస్రో శాస్త్రవేత్తల్లో ఉన్న నిబద్ధత, క్రమశిక్షణ శ్రీసత్యసాయి ఇన్యుస్టూల్‌ ఆఫ్‌ హైయ్యర్‌ లర్నింగ్‌ విద్యార్థుల్లో, యాజమాన్య సిబ్బందిలో ఉందని ఇస్రో శాస్త్రవేత్తలు కొనియాడారు. పుట్టపర్తి లోని ఇండోర్‌ స్టేడియంలో అంతరిక్ష వారోత్సవాలు ముగింపు సభను నిర్వహించారు. ఈ కార్యక్రమానికి ముఖ్య అతిథులుగా మాజీ ఇస్రో చైర్మన్‌ కస్తూరిరంగన్‌, శ్రీహరికోట అంతరిక్ష పరిశోధన కేంద్రం శాస్త్రవేత్తలు మురళీధర్‌, డాక్టర్‌ శంకరన్‌, , సత్యసాయి సెంట్రల్‌ ట్రస్టీ రత్నాకర్‌, సత్యసాయి విశ్వవిద్యాలయ వైస్‌ఛాన్సిలర్‌ సివి. సంజీవి తదితరులు పాల్గొని ప్రసంగించారు.

ఈ సందర్భంగా మాజీ ఇస్రో చైర్మన్‌ కస్తూరి రంగన్‌ మాట్లాడుతూ వివిధ రంగాల్లోని నిష్టాతులైన ఎంతోమంది ఇస్రోలో పనిచేస్తున్నారని అదేవిధంగా సత్యసాయి విద్యాసంస్థల్లో ఉన్న విద్యార్థుల సైతం ఈ రంగాన్ని ఎంచుకొని మంచి ప్రతిభ కనబరచాలని కోరారు. ఇందులో భాగంగా ఇస్రో శాస్త్రవేత్తలు నిర్వహించిన స్పేస్‌ వాక్‌కి అనూహ్య స్పందన లభించిందని చెప్పారు. ఈ పోటీలలో ఎంతోమంది విద్యార్థులు ప్రతిభ కనపరిచారన్నారు. ఈ పోటీలలో పదివేల మంది పాఠశాల, కళాశాలల విద్యార్థులు పాల్గొనడం సంతోషించదగ్గ విషయమని తెలిపారు. ఈ కార్యక్రమం విజయవంతం కావడానికి కషిచేసిన సత్యసాయి విద్యాసంస్థల విద్యార్థులకు సిబ్బందికి కృతజ్ఞతలు తెలిపారు.

ఈ కార్యక్రమంలో ఇస్రో సంస్థలైన విఎస్‌ఎస్‌సి, ఐఎస్‌ఎసి, ఎస్‌డిఎస్‌సి నుంచి వచ్చిన శాస్త్రవేత్తలను ఎంతగానో ఆదరించారని తెలిపారు. ఈ సందర్భంగా ప్రతిభ కనబరిచిన విద్యార్థులకు ఇస్రో శాస్త్రవేత్తలు చేతుల మీదుగా మెమోంటోలను అందజేశారు. ఈ సందర్భంగా సత్యసాయి ట్రస్టీ రత్నాకర్‌ను ఘనంగా సత్కరించారు. ఈ కార్యక్రమంలో జిల్లాలోని వివిధ పాఠశాల విద్యార్థులు పెద్ద సంఖ్యలో పాల్గొన్నారు.