సుప్రీంకోర్టు తీర్పు తర్వాత భారత్–అమెరికా వాణిజ్య సమీకరణం

అసలే ప్రపంచవ్యాప్తంగా అమెరికాతో వాణిజ్య సంబంధాలు ఉద్రిక్తంగా ఉన్న పరిస్థితి. ఇలాంటి సమయంలోనే అమెరికా అత్యున్నత న్యాయస్థానం అధ్యక్షుడు Donald Trump తీసుకున్న సుంకాల నిర్ణయంపై కీలక వ్యాఖ్యలు చేసింది.ట్రంప్ విధించిన పలు టారిఫ్‌లు చట్టబద్ధతపై ప్రశ్నలు లేవనెత్తుతూ కోర్టు తీర్పు వెలువడింది. దీంతో ప్రస్తుతం ట్రంప్ వైఖరి ఎలా ఉండబోతోందన్నది చర్చనీయాంశమైంది. ముఖ్యంగా భారత్ విషయంలో ఆయన ఆలోచన ఏంటి? ఇటీవల కుదిరిన ట్రేడ్ డీల్ భవిష్యత్తు ఏమిటి? ప్రస్తుతం భారతదేశంపై అమల్లో ఉన్న సుంకం 18 శాతమా? లేక 10 శాతమా? అనే సందేహాలు తలెత్తుతున్నాయి.రెండోసారి అధికారంలోకి వచ్చిన తరువాత ట్రంప్ తన వాణిజ్య విధానాల్లో కఠిన వైఖరిని అవలంబించారు. వివిధ దేశాలపై వేర్వేరు సుంకాలు విధిస్తూ “అమెరికా ఫస్ట్” విధానాన్ని అమలు చేశారు. అయితే Supreme Court of the United States ట్రంప్ నిర్ణయాల్లో కొన్నింటిని చట్టవిరుద్ధమని అభిప్రాయపడినట్లు వార్తలు వచ్చాయి. ప్రపంచ దేశాలపై విధించిన కొన్ని సుంకాలను కోర్టు రద్దు చేసిన తరువాత ట్రంప్ తీవ్ర అసంతృప్తి వ్యక్తం చేసినట్టు తెలుస్తోంది.ఈ పరిణామాల నేపథ్యంలో ట్రంప్ ‘ప్లాన్-B’గా అన్ని దేశాలపై సమానంగా 10 శాతం గ్లోబల్ టారిఫ్ విధిస్తున్నట్టు ప్రకటించారు. ఫిబ్రవరి 24 నుంచి ఈ కొత్త సుంకాలు అమల్లోకి వస్తాయని తెలిపారు. కోర్టు తీర్పు అమల్లో ఉండే 150 రోజుల కాలంలో ఈ 10 శాతం టారిఫ్ వర్తిస్తుందని స్పష్టం చేశారు.ఇక భారత్‌పై అమల్లో ఉన్న 18 శాతం సుంకం కూడా 10 శాతానికి తగ్గించబడినట్టు వైట్ హౌస్ వర్గాలు సంకేతాలు ఇచ్చాయి. 2026 మార్చి నాటికి భారత్–అమెరికా వాణిజ్య ఒప్పందం ఖరారయ్యే అవకాశముందని అంచనాలు ఉన్నాయి. ఇదివరకు రష్యా చమురు కొనుగోలు నేపథ్యంలో భారతదేశంపై విధించిన 25 శాతం శిక్షాత్మక సుంకాన్ని ట్రంప్ కార్యనిర్వాహక ఉత్తర్వుతో ఎత్తివేసిన విషయం తెలిసిందే.ఇక 1974 నాటి అమెరికా ట్రేడ్ యాక్ట్‌లోని సెక్షన్ 122 ప్రకారం, జాతీయ ప్రయోజనాల దృష్ట్యా అధ్యక్షుడు గరిష్టంగా 15 శాతం వరకు సుంకం విధించవచ్చు. అయితే ఈ చట్టపరమైన నిబంధనలను ఎంతవరకు, ఎంతకాలం వినియోగించగలరు అన్నది ప్రశ్నార్థకంగా మారింది.సుప్రీంకోర్టు తీర్పు భారత్–అమెరికా ట్రేడ్ డీల్‌పై ప్రభావం చూపదని ట్రంప్ పేర్కొంటున్నారు. ఆయన మాటల్లో ఇది పారదర్శకమైన, పరస్పర ప్రయోజనాల ఒప్పందమట. అయితే ఒకవైపు అమెరికా వస్తువులకు భారత్ జీరో డ్యూటీ ఇస్తే, మరోవైపు భారత ఉత్పత్తులపై 18 శాతం సుంకం కొనసాగితే అది సమానమైన ఒప్పందమా? అన్న చర్చ దేశంలో ప్రారంభమైంది.భారత్ కంటే ఎన్నో రెట్లు పెద్ద ఆర్థిక వ్యవస్థ కలిగిన అమెరికాపై మనం జీరో డ్యూటీకి ఎందుకు ఒప్పుకోవాలి? అనే ప్రశ్నలు కూడా వినిపిస్తున్నాయి. ఇదిలా ఉండగా, ముందుగా 50 శాతం సుంకాన్ని 18 శాతానికి తగ్గించానని చెప్పుకున్న ట్రంప్, ఇప్పుడు ఆ 18 శాతం సుంకం కూడా కోర్టు రద్దు చేయడంతో తీవ్ర అసహనం వ్యక్తం చేస్తున్నట్టు సమాచారం.ఇదే సమయంలో, కోర్టు తీర్పును సమగ్రంగా అధ్యయనం చేస్తున్నామని భారత ప్రభుత్వం తెలిపింది. ఇతర దేశాల్లాగే మనపై విధించిన 10 శాతం గ్లోబల్ టారిఫ్ విషయంలో అమెరికాతో చర్చలు జరపాల్సి ఉంది. వచ్చే వారం రెండు దేశాల మధ్య సుంకాలపై కీలక చర్చలు జరిగే అవకాశముంది. తాజా వాణిజ్య ఒప్పందాన్ని పునర్విమర్శించే పరిస్థితి రావచ్చని ఆర్థిక నిపుణులు భావిస్తున్నారు.