నాడు రోడ్ల దుస్తితి...నేడు ఆసుపత్రుల దీనావస్థ వెలుగులోకి

వర్షల నేపథ్యంలో రోడ్లకు గుంతలు పడ్డ మద్య ప్రదేశ్ రాష్ట్ర దుస్థితి మొన్నటి వరకు వీడియో రూపంలో సోషల్ మీడియాలో వైరల్ అయింది. తాాజాగా అదే రాష్ట్రానికి చెందిన ఆసుపత్రి దుస్థితి వీడియో ఒక్కటి తాజాగా సోషల్ మీడియాలో చక్కర్లు కొడుతోంది. మధ్యప్రదేశ్‌లోని ప్రభుత్వ ఆస్పత్రులు ఏ స్థితిలో ఉన్నాయో..? తెలియజేసే ఓ ఘటనకు సంబంధించిన వీడియో సోషల్ మీడియాలో హల్‌చల్ చేస్తుంది. రాజ్‌గఢ్ ప్రభుత్వ జిల్లా ఆస్పత్రిలోకి.. ఒక ఆవు ప్రవేశించింది. హాయిగా విహరించింది. ఆ ఆవును గమనించి, బయటకు పంపించేవారు లేకపోవడంతో.. నేరుగా ఆస్పత్రిలోని ఐసీయూ వార్డులోకి వెళ్లింది. అవస్థలు పడుతున్న రోగులున్న ప్రదేశాల్లో తిరుగాడింది. అయితే ఎవరో ఆ ఆవును గమనించి.. వీడియో తీశారు.

ఆ వీడియో సోషల్ మీడియాలో వైరల్ అవ్వడంతో... ఉన్నతాధికారులు, ఆరోగ్య శాఖ సిబ్బంది కూడా అవాక్కయ్యారు. వెంటనే సీనియర్ హెల్త్ డిపార్ట్‌మెంట్ అధికారులు రంగంలోకి దిగారు. జరిగిన ఘటనపై చర్యలు తీసుకున్నారు. ఆస్పత్రిలో పనిచేసే ఒక సెక్యూరిటీ గార్డుతో సహా ముగ్గురు సిబ్బందిని వారి ఉద్యోగాల నుంచి తీసేశారు. అయితే ఈ ఘటనపై మాత్రం సర్వత్రా విమర్శలు వెల్లువెత్తుతున్నాయి.

ప్రభుత్వ ఆస్పత్రులపై శ్రద్ధ వహించకపోవడం వల్ల ఇలాంటి ఘటన పునరావృతం అవుతున్నాయని చాలామంది అభిప్రాయపడుతున్నారు. అధికారుల, ఆస్పత్రి సిబ్బంది నిర్లక్ష్యం వల్లే ఇది జరిగిందని కొందరు అంటున్నారు. సోషల్ మీడియాలో వీడియో వైరల్ అవ్వడం వల్లే అధికారులు అప్రమత్తమయ్యారని, లేకపోతే పరిస్థితి అదుపులో లేకుండా పోయేదని ఆస్పత్రిలో రోగులు ఆక్షేపిస్తున్నారు. అయితే ఆస్పత్రిలో పశువులు చొరబడకుండా ఉండేందుకు ప్రత్యేకంగా రెండు గేట్లు ఉన్నాయి. వాటి దగ్గర ఇద్దరు వ్యక్తులను కూడా నియమించారు. అయినా ఆవు లోపలకి వచ్చేసింది.