ఏమీ ఐడియా గురూ...ఏకంగా ఆ వ్యాపారంతో ఏడాదికి రూ.2వేల కోట్ల టర్నోవర్

వ్యక్తుల ప్రాణాలతో వ్యాపారాలు చేసే ఈ రోజుల్లో శవాలతో కూడా సంపాధించొచ్చు అన్నది ఓ కంపెనీ రుజువు చేసింది. బుర్రకు కాస్త పదును పెట్టాలేగానీ.. బతకడానికి ఎన్ని ఆలోచనలో..! ముంబైకి చెందిన ఓ వ్యక్తి అంత్యక్రియల సేవలు ప్రారంభించాడు. అంటే ‘చావు’తో వ్యాపారం అన్నమాట. వ్యాపారం అంటే అదేదో మామూలు బిజినెస్ అనుకునేరూ. 50 లక్షల రూపాయల లాభార్జన గడిస్తున్నాడు. ఏడాదికి రూ. 2000 కోట్ల టర్నోవర్ దిశగా తన వ్యాపారాన్ని విస్తరించేందుకు ప్రణాళికలు కూడా సిద్ధం చేశాడు. ఢిల్లీలోని ప్రగతి మైదాన్‌లో జరుగుతున్న ‘ఇండియా ఇంటర్నేషనల్ ట్రేడ్ ఫెయిర్’ (ఐఐటీఎఫ్-2022)లో ఇతడి బిజినెస్ ఐడియా ప్రత్యేక ఆకర్షణగా నిలిచింది. ఏమాట కామాట చెప్పుకోవాలి గానీ, ‘అంత్యక్రియలు’ ప్రతి ఒక్కరికీ అవసరమైన సేవేలే కదా. అందుకే అంత క్రేజ్. ఇంతకీ.. ఈ స్టార్టప్ పేరు ఏంటనుకున్నారు..? ‘సుఖాంత్ సర్వీసెస్’. అంటే మనిషి జీవితంలోని చివరి సంస్కారాలను సుఖాంతంగా పూర్తి చేస్తారన్నమాట!

ఐఐటీఎఫ్-2022లో సుఖాంత్ ఫ్యునెరల్ మేనేజ్‌మెంట్ ప్రైవేట్ లిమిటెడ్ సంస్థ ఏర్పాటు చేసిన స్టాల్‌కి సంబంధించిన ఫొటోలు, వీడియోలు సోషల్ మీడియాలో వైరల్‌ అవుతున్నాయి. ఫెయిర్‌లోనే ఈ స్టాల్ ప్రత్యేక ఆకర్షణగా నిలిచింది. ఇక్కడ ఏర్పాటు చేసిన ఓ పాడె, దానిపై తెల్లని వస్త్రం, దానిపై అందంగా పరిచిన రోజా పూరేకులు, ఆ పక్కనే అందంగా అలంకరించిన శవపేటిక.. చూడగానే అందరి చూపునూ తమవైపు తిప్పుకుంటున్నాయి. ఫెయిర్‌లోని ఉత్తమ ప్రదర్శనల్లో ఇదొకటని పలువురు నెటిజన్లు పేర్కొన్నారు.

అంత్యక్రియల సేవల కోసం ఆర్డర్ చేసుకుంటే ఈ సంస్థ ఒక బృందాన్ని పంపిస్తుంది. అంత్యక్రియలకు సంబంధించిన మొత్తం ఆచారాలు, కార్యక్రమాలను ఈ బృంద సభ్యులు నిర్వహిస్తారు. వీరిలో సాధారణ ఏర్పాట్లను చూసే సభ్యులతో పాటు, ఒక పంతులు, మంగళి ఉంటారు. శవపేటికను మోసుకెళ్లడానికి ఆ నలుగురు కూడా ఉంటారు. అంతిమయాత్ర కోసం కావాలంటే మరికొంత మందిని కూడా పంపిస్తారు.

ఈ మొత్తం సేవలకు ఈ సంస్థ రూ. 38000 ఛార్జ్ చేస్తోంది. అదనపు ఛార్జీలతో, ఎముకలు, చితాభస్మ నిమజ్జనం సేవలు కూడా అందిస్తోంది. అంత్యక్రియలకు లక్షకు పైనే ఖర్చవుతోందని, దాంతో పోలిస్తే.. ఈ సంస్థ ఛార్జ్ చేసేది చాలా తక్కువేనని వినియోగదారులు అంటున్నారు.

చాలా మంది నెటిజన్లు ఈ వినూత్న ఆలోచనను ప్రశంసిస్తుండగా.. చావును కూడా వ్యాపారం చేశారా అంటూ విమర్శించేవారూ లేకపోలేదు. అయితే, ఈ వ్యాపారం ఇప్పుడే కొత్తగా మొదలైందనుకుంటే పొరపాటే. ప్రముఖులు మరణిస్తే అంత్యక్రియలు నిర్వహించేందుకు దేశంలో ప్రఖ్యాత సంస్థలు దశాబ్దాల నుంచే సేవలు అందిస్తున్నాయి. బెంజ్ లాంటి ప్రముఖ సంస్థల నుంచి ప్రత్యేకంగా అంత్యక్రియల వాహనాలను రూపొందించుకున్నాయి.

ఇక ఢిల్లీలోని ప్రగతి మైదాన్‌లో నిర్వహించే ‘ఇండియా ఇంటర్నేషనల్ ట్రేడ్ ఫెస్ట్’ ప్రపంచంలోనే అతిపెద్ద వాణిజ్య ఈవెంట్లలో ఒకటిగా గుర్తింపు పొందింది. ఈ ఎగ్జిబిషన్‌లో 2500లకు పైగా దేశీయ, విదేశీ ఎగ్జిబిటర్లు తమ ఉత్పత్తులను ప్రదర్శిస్తారు. ఈ ఏడాది 10 లక్షలకు పైగా సందర్శకులు వస్తారని నిర్వాహకులు అంచనా వేస్తున్నారు.

ఈసారి ఈ ఫెయిర్‌కు బీహార్, జార్ఖండ్, మహారాష్ట్ర భాగస్వామ్య రాష్ట్రాలుగా ఉన్నాయి. ఉత్తరప్రదేశ్, కేరళ ఫోకస్ స్టేట్స్. అఫ్గానిస్థాన్, బంగ్లాదేశ్, బహ్రెయిన్, బెలారస్, ఇరాన్, నేపాల్, థాయిలాండ్, టర్కీ, యూఏఈ, యూకే సహా వివిధ దేశాలకు చెందిన ఎగ్జిబిటర్లు ఈ ఫెయిర్‌లో పాల్గొన్నారు.