ఇండియన్ మోటార్ వెహికల్ యాక్ట్ కూడా చదివితే బాగుండేది: పేర్ని నాని

పవన్ కళ్యాణ్ లక్ష పుస్తకాలు చదివానని అంటారు కదా.. ఇండియన్ మోటార్ వెహికల్ యాక్ట్ కూడా చదివితే బాగుంటుందని మాజీ మంత్రి, వైసీపీ ఎమ్మెల్యే పేర్ని నాని ఎద్దేవా చేశారు. చట్టం ప్రకారం ఆలీవ్ గ్రీన్ కలర్ సొంత వాహనాలకు వేయకూడదని, ఆర్మీ వాహనాలకు మాత్రమే వేయాలన్నారు. ఆలీవ్ గ్రీన్ రంగు ఉంటే వాహనం రిజిస్ట్రేషన్ కూడా అవదన్నారు. వాహనానికి వేరే రంగు వేసే బదులు ముందే పసుపు రంగు వేసుకుంటే ఖర్చు కలిసి వస్తుంది కదా అని ఎద్దేవా చేశారు.జనసేన పార్టీ అధినేత పవన్ కళ్యాణ్ ఎన్నికల ప్రచార వాహనం ‘వారాహి’ వాహనంపై మచిలీపట్నం వైఎస్సార్ కాంగ్రెస్ పార్టీ ఎమ్మెల్యే, మాజీ మంత్రి పేర్ని నాని కౌంటర్ వేశారు. యుద్ధం చేయటానికి వ్యాన్లు కావాలా? ఎన్నికల్లో అలా యుద్ధాలు చేస్తారా అని ప్రశ్నించారు. అలాగైతే తాను కూడా ఓ వ్యాను కొనుక్కొని ఉండేవాడినని అన్నారు.

పవన్ కళ్యాణ్ ట్విట్టర్‌లో పోస్ట్ చేసిన వీడియో చూసి సినిమా టీజర్ అనుకున్నానని పేర్ని నాని వ్యాఖ్యానించారు. డబ్బులు ఉండి వ్యాన్లు కొంటే సరిపోతుందన్నారు. ఇవన్నీ సినిమాల్లో పనికొస్తాయిని ఎద్దేవా చేశారు. అయితే, ఆ వ్యాన్ బయట కాదు లోపల కూడా ఏముందో చూపిస్తే బాగుంటుంది వ్యాఖ్యానించారు.

ఇదిలావుంటే రాబోయే ఎన్నికల కోసం సిద్ధంగా ఉన్నానని.. దీనికి కోసం వాహనాన్ని సిద్ధం చేసినట్లు జనసేన అధినేత పవన్ కళ్యాణ్ బుధవారం వెల్లడించారు. ఈ మేరకు వారాహి వాహనం ఫోటోలను పవన్ ట్విట్టర్‌లో షేర్ చేసారు. ఈ సందర్భంగా విడుదల చేసిన వీడియో పవన్ ఫ్యాన్స్‌లో జోష్ నింపింది. ఈ రథానికి ‘వారాహి’ అని పేరు పెట్టారు. యుద్ధానికి వారాహి సిద్ధం అని వీడియో వదిలారు. అలాగే, తన బాడీ గార్డులను మిలటరీ జవాన్లు మాదిరిగా చూపించడం విశేషం.