హిమాచల్ ప్రదేశ్ లో ఫలించిన ప్రయోగం...ఇపుడు ఏపీలో అడుగుపెడుతున్న ప్రియాంకా గాంధీ

హిమాచల్ ప్రదేశ్ రాష్ట్రంలో ప్రియాంకా గాంధీ ఎంట్రీ విజయవంతంకావడంతో అదే ఫార్ములాను ఏపీలో ప్రయోగించాలని కాంగ్రెస్ అధినాయకత్వం భావిస్తోంది. ఇదిలావుంటే కాంగ్రెస్ పార్టీ కేంద్రంలో అధికారంలోకి రావడానికి అనేక సందర్భాల్లో ఆంధ్రప్రదేశ్ అండగా నిలిచిందని.. చాలామంది సీనియర్ నేతలు చెబుతారు. ఒక్క మాటలో చెప్పాలంటే.. ఏపీలో కాంగ్రెస్‌కు ప్రజల మద్దతు బాగా ఉండేది. ఇలాంటి సమయంలో.. కాంగ్రెస్ రాష్ట్ర విభజనకు పూనుకుంది. దీన్ని అప్పటి కాంగ్రెస్ నేతలు తీవ్రంగా వ్యతిరేకించారు. అయినా అధిష్టానం వెనక్కి తగ్గలేదు. తెలంగాణ ఏర్పాటుకే మొగ్గు చూపింది. ఆ ప్రభావం పార్టీపై తీవ్రంగా పడింది. దీంతో ఏపీలో కాంగ్రెస్ నామరూపాలు లేకుండా పోయింది.

రాష్ట్ర విభజన తర్వాత 2014లో ఎన్నికలు జరిగాయి. అప్పుడు కాంగ్రెస్ పార్టీ ఏమాత్రం ప్రభావం చూపలేదు. చాలాచోట్ల కనీసం డిపాజిట్ కూడా రాలేదు. దీంతో ఆ పార్టీలోని కీలక నేతలు అందరూ.. వేరే పార్టీల్లోకి వెళ్లిపోయారు. ఎక్కువమంది వైఎస్సార్సీపీలో చేరారు. ఆ తర్వాత 2019 ఎన్నికల్లోనూ కాంగ్రెస్ పరిస్థితి ఏమాత్రం మెరుగుపడలేదు. అనేకచోట్ల నోటా కంటే తక్కువ ఓట్లు వచ్చాయి. దీంతో ఆంధ్రప్రదేశ్‌పై కాంగ్రెస్ అధిష్టానం ఆశలు వదులుకోవాల్సిందే అనే వ్యాఖ్యానాలు వినిపించాయి.

ఈ నేపథ్యంలో.. ఇటీవల కాంగ్రెస్ చీఫ్‌గా ఖర్గే బాధ్యతలు చేపట్టారు. ఆ వెంటనే ఏపీలోనూ చాలా మార్పులు చేశారు. ఇటీవలే గిడుగు రుద్రరాజును ఏపీ పీసీసీ చీఫ్‌గా నియమించారు. రుద్రరాజు కూడా వివిధ వర్గాలతో సమావేశం అవుతూ.. పార్టీకి పునర్వైభవం తీసుకొచ్చే ప్రయత్నాలు ప్రారంభించారు. ఈ సమయంలో.. రాష్ట్రంలో కాంగ్రెస్ అగ్రనేతల పర్యటన ఆసక్తికరంగా మారింది. జనవరి 26న రాహుల్ గాంధీ చేపట్టిన భారత్ జోడో యాత్ర ముగియనుంది. ఆ తర్వాత.. స్థానికంగా కాంగ్రెస్ నేతలు పాదయాత్రలు చేయాలని ఏఐసీసీ ఆదేశించింది.

దీంట్లో భాగంగా.. ఏపీలోనూ నేతలు వారివారి నియోజకవర్గాల్లో పాదయాత్రలకు సిద్ధం అవుతున్నారు. అంతేకాకుండా.. కాంగ్రెస్ పార్టీ ముఖ్యనేత ప్రియాంక గాంధీ కూడా పలుచోట్ల మహిళా మార్చ్ నిర్వహించాలని ప్లాన్ చేస్తున్నట్టు తెలుస్తోంది. ఆ కార్యక్రమంలో భాగంగా.. ప్రియాంక విజయవాడకు కూడా రానున్నారు. బెజవాడలో నిర్వహించే మహిళా మార్చ్‌లో ప్రియాంక పాల్గొననున్నారు. దీని గురించి చర్చించేందుకు పీసీసీ చీఫ్ రుద్రరాజు ఢిల్లీ వెళ్లినట్టు తెలుస్తోంది. ఆయన ఢిల్లీ నుంచి వచ్చాక ప్రియాంక ఏ రోజు ఏపీకి వస్తారనేదానిపై క్లారిటీ రానుంది.

ఇటీవల హిమాచల్‌ప్రదేశ్‌లో కాంగ్రెస్ పార్టీ విజయం సాధించింది. అందులో ప్రియాంక కీలక పాత్ర పోషించారు. అదే జోష్‌తో వివిధ కార్యక్రమాలు చేపట్టాలని ప్రియాంక భావిస్తున్నట్టు కాంగ్రెస్ నేతలు చెబుతున్నారు. ముఖ్యంగా ఆంధ్రప్రదేశ్‌పై ప్రియాంక పట్టుదలగా ఉన్నట్టు తెలుస్తోంది. అందుకే.. వివిధ కార్యక్రమాల పేరుతో.. ఏపీలో పార్టీకి పునర్వైభవం తీసుకురావాలని అధిష్టానం ప్లాన్ చేస్తున్నట్టు తెలుస్తోంది.