సీడీపీఓ పోస్టుల భర్తీకీ ఏపీ సీఎం జగన్ గ్రీన్ సిగ్నల్
Andhra Pradesh Telugu | Suryaa Desk | Published : Thu, Dec 15, 2022, 11:26 PM
ఖాళీగా ఉన్న సీడీపీఓ పోస్టుల భర్తీకీ ఏపీ సీఎం జగన్ గ్రీన్ సిగ్నల్ ఇచ్చారు. మొత్తం 61 సీడీపీఓ పోస్టుల భర్తీకి సీఎం జగన్ ఆమోదముద్ర వేశారు. మహిళా శిశు సంక్షేమ శాఖపై తాడేపల్లిలోని తన క్యాంపు కార్యాలయంలో ముఖ్యమంత్రి వైఎస్ జగన్మోహన్రెడ్డి గురువారం సమీక్ష నిర్వహించారు. ఈ సందర్భంగా గత సమావేశంలో తీసుకున్న నిర్ణయాల అమలు ప్రగతిని సీఎం జగన్కు అధికారులు వివరించారు. ఈ సందర్భంగా అంగన్వాడీల్లో ఖాళీగా ఉన్న సీడీపీఓ పోస్టుల వివరాలను సీఎంకు అందించారు.
దీంతో ఖాళీగా ఉన్న సీడీపీఓ పోస్టుల భర్తీకీ సీఎం జగన్ గ్రీన్ సిగ్నల్ ఇచ్చారు. మొత్తం 61 సీడీపీఓ పోస్టుల భర్తీకి సీఎం జగన్ ఆమోదముద్ర వేశారు. అలాగే, సీడీపీఓ పోస్టుల భర్తీని వేగవంతం చేయాలని సీఎం జగన్ ఆదేశించారు. వాటితో పాటు ఇంకా ఖాళీగా ఉన్న పోస్టులను భర్తీ చేయాలన్నారు. దీంతో ఏపీపీఎస్సీ ద్వారా ఈ నియామకాలు చేపట్టనున్నట్లు అధికారులు వెల్లడించారు.
ఇక, అంగన్వాడీల్లో మౌలిక సదుపాయాలపై దృష్టి సారించాలని సీఎం జగన్ ఆదేశించారు. నాడు– నేడు కింద చేపడుతున్న పనులను వేగవంతం చేయాలన్నారు. అలాగే, సకాలంలో పనులు పూర్తయ్యేలా చర్యలు చేపట్టాలని సూచించారు. అంగన్వాడీల్లో చిన్నారులకు నాణ్యమైన పౌష్టికాహారంతో పాటు, పిల్లలు వికాసం చెందేలా మంచి వాతావరణాన్ని కల్పించాలని సీఎం జగన్ ఆదేశించారు.
అలాగే, అంగన్వాడీల్లో సార్టెక్స్ రైస్ సరఫరా చేయాలని సీఎం జగన్ అన్నారు. న్యూట్రిషన్ కిట్ సరఫరాలో నాణ్యత విషయంలో అస్సలు రాజీ పడొద్దని.. పిల్లలకు ఇచ్చే న్యూట్రిషన్ కిట్ నాణ్యత కచ్చితంగా అత్యున్నత ప్రమాణాలతో ఉండాలన్నారు. అంగన్వాడీల్లో పిల్లలకు కల్పిస్తున్న సౌకర్యాల్లో అన్నింటా క్వాలిటీ పెరగాలని.. ఆ ఫలితాలు కనిపించాలని ఆదేశించారు. గతంలో కంటే పిల్లలకు మంచి చేస్తున్నామన్న సంతృప్తి కలగాలన్నారు.
కొత్తగా అందుబాటులోకి వచ్చిన సూపర్వైజర్ల సహాయంతో అంగన్వాడీ కేంద్రాల్లో తరచూ తనిఖీలు నిర్వహించాలని సీఎం జగన్ ఆదేశించారు. తనిఖీలు, నాణ్యత, నాడు–నేడు ఈ మూడు అంశాలకు సంబంధించి కచ్చితమైన మార్పు కనిపించాలన్నారు. అగ్రికల్చర్, ఎడ్యుకేషన్, హెల్త్, హౌసింగ్, మహిళా శిశు సంక్షేమ శాఖలపై ప్రభుత్వం ప్రత్యేక దృష్టి సారించిందని వివరించారు. వీటిలో మార్పుల కోసం అన్ని రకాలుగా ప్రయత్నాలు చేస్తున్నామని సీఎం జగన్ అన్నారు. ఈ విషయాల్లో సిబ్బంది నియామకాలు సహా.. ఏ రకమైన అవసరం ఉన్నా ప్రభుత్వం అందించేందుకు సిద్ధంగా ఉందన్నారు.
|
|