మూడున్నర ఏళ్లలో వై.ఎస్.జగన్ చేసిన చూపించారు: సజ్జల

పరిపాలన ఎలా ఉండాలో మూడున్నర ఏళ్లలో ముఖ్యమంత్రి వైఎస్ జగన్మోహన్ రెడ్డి చేసి చూపించారని ఏపీ ప్రభుత్వ సలహాదారు సజ్జల రామకృష్ణారెడ్డి అన్నారు. తెలుగు దేశం పార్టీ మాయల‌మరాఠీగా మీడియా మొత్తాన్ని‌ గుప్పిట్లో పెట్టుకుని అబద్ధాలను‌ ప్రచారం చేస్తోందని ఆయన మండిపడ్డారు. ఎస్సీల్లో పుట్టాలని ఎవరైనా కోరుకుంటారా అని 2019 వరకు అధికారంలో ఉన్న చంద్రబాబునాయుడు అనలేదా అని ప్రశ్నించారు. ఇపుడు అదే వ్యక్తి ఎస్సీలకు చంద్రన్న కానుక, విదేశీ విద్యను ఎందుకు అమలు చేయరని ప్రశ్నించడం హాస్యాస్పదంగా ఉందన్నారు. తమ పార్టీ డీఎన్ఏలోనే ఎస్సీ, ఎస్టీ, బీసీలు ఉన్నారని స్పష్టం చేశారు. విద్య, వైద్యం ద్వారా ఎస్సీ, ఎస్టీలకు మేలు జరిగేలా దివంగత వైఎస్ రాజశేఖరరెడ్డి హయాంలో అడుగులు పడ్డాయని పేర్కొన్నారు. పేదవాడు పేదవాడిగానే ఉండాలనేది గత పాలకుల ఆలోచన అని ఆరోపించారు. బహుజనుల‌ పేరు చెప్పుకుని వచ్చిన‌ పార్టీలు సైతం అదే దారిలో వెళ్లాయన్నారు.

స్వాతంత్ర్యం వచ్చి 75 సంవత్సరాలు గడుస్తున్నా ఇప్పటికీ పార్లమెంటులో మహిళా బిల్లును రానివ్వట్లేదని సజ్జల రామకృష్ణారెడ్డి విమర్శించారు. కానీ, సీఎం జగన్మోహన్ రెడ్డి మాత్రం ఎస్సీ, ఎస్టీ, బీసీలకు‌ 50 శాతం రిజర్వేషన్లు అమలు చేశారని వివరించారు. అందులోనూ మహిళలకు 50 శాతం‌ మహిళలకు రిజర్వేషన్లు కల్పించారన్నారు. ఎక్కువ మందికి న్యాయం జరుగుతుందని భావిస్తే.. ఎక్కడ సంతకం చేయడానికైనా సీఎం జగన్ వెనకాడరని చెప్పారు.

గత ప్రభుత్వం విదేశీ విద్య పేరుతో అరకొరగానే నిధులు ఇచ్చిందని సజ్జల ఆరోపించారు. అయితే, బలహీనవర్గాల కుటుంబాల్లో‌ మార్పు తీసుకురావడానికి ప్రస్తుతం విద్యకు పెద్దపీట వేస్తున్నామని తెలిపారు. ఈ ప్రభుత్వం ద్వారా జరుగుతున్న మేలుని‌ అన్ని వర్గాల ప్రజలకు తెలియజెప్పాలన్నారు. వచ్చే ఏడాదిలో ఎన్నికలు రాబోతున్నాయని చెప్పారు. అధికారం అనేది సేవ అని.. ప్రజల జీవితాల్లో మార్పు తీసుకొచ్చే బాధ్యత అని సీఎం జగన్ విశ్వసిస్తున్నారని తెలిపారు. సీఎం జగన్‌ను అధికారంలో‌ కొనసాగించడం బలహీనవర్గాలకు అవసరమని సజ్జల అభిప్రాయపడ్డారు.

అందరి సమస్యలను పరిష్కరించాల్సిన బాధ్యత తమపై ఉందని సజ్జల పేర్కొన్నారు. ఆర్థిక ఇబ్బందుల వల్ల కొన్ని సమస్యలు ఉన్నాయని.. కానీ ఖర్చు పెట్టే ప్రతీ రూపాయి సరైన మార్గంలోనే వెళ్తున్నాయని చెప్పారు. తమ ప్రభుత్వం ఒక్క రూపాయి కూడా వేస్ట్ చేయడం లేదని స్పష్టం చేశారు.