విలాసాల కోసం అండాలను అమ్ముకొంటున్న మహిళా

విలాసాలు ఓ పరిమితికి లోబడి ఉండాలి. లేకపోతే అది మనిషి పతనానికే దారితీస్తుంది. ఇదిలావుంటే మహిళలకు మాతృత్వం ఒక తీయని అనుభూతి. కానీ, విలాసాలకు అలవాటు పడిన ఓ మహిళ.. డబ్బుల కోసం తన అండాలను అమ్ముకుంటోంది. భర్తకు తెలియకుండా ఈ పనిచేస్తోంది. పైగా భర్త అనుమతితోనే ఈ పని చేస్తున్నట్లు అతడి సంతకాలు ఫోర్జరీ చేసి నకిలీ ధ్రువపత్రాలు సృష్టించింది. ఈ దారుణం గురించి తెలుసుకున్న భర్త.. ఆమెను నిలదీయగా, నోరు మూసుకోకపోతే చంపేస్తానంటూ బెదిరించింది. చేసేదేంలేక బాధితుడు పోలీసులను ఆశ్రయించాడు. గుజరాత్‌లోని అమ్రైవాడీ పోలీసు స్టేషన్‌ పరిధిలో వెలుగులోకి వచ్చిన ఈ దారుణం చర్చనీయాంశంగా మారింది.

అమ్రైవాడీలో నివాసం ఉంటున్న అనితకు ఐదేళ్ల కిందట వివాహం జరిగింది. అత్తామామలతో తరచూ ఆమెకు గొడవ జరిగేది. భర్తపై ఒత్తిడి తీసుకొచ్చి, అత్తామామలకు దూరంగా అద్దె గదిలో వేరు కాపురం పెట్టించింది. ఆ తర్వాత ఆదాయం సరిపోవడం లేదంటూ భర్తతోనూ గొడవ పడింది. భార్య తీరుతో విసుగుచెందిన భర్త 2019లో ఆమెను వదిలేసి తిరిగి తన తల్లిదండ్రుల వద్దకు వచ్చాడు.

కొంత కాలం తర్వాత పెద్దలు సయోధ్య కుదిర్చి భార్యాభర్తలను కలిపారు. కొన్నాళ్లుగా వాళ్లిద్దరూ మళ్లీ కలిసి జీవిస్తున్నారు. ఈ క్రమంలో భార్య అనితకు సంబంధించి ఓ దారుణమైన విషయం అతడి దృష్టికి వచ్చింది. విలాసాలకు రుచి మరిగి డబ్బు కోసం ఆమె తన అండాలు విక్రయించుకుంటున్న సంగతిని అతడు గుర్తించాడు.

అండాలు విక్రయించేందుకు అహ్మదాబాద్‌లోని ఓ ఏజెంట్‌తో ఒప్పందం కుదుర్చుకున్నట్లు భర్త గుర్తించాడు. ఇందుకోసం అనితకు ఆమె తల్లి కూడా సహకరించడం మరింత విస్తుపోయే అంశం. ఈ వ్యవహారంపై భార్యను నిలదీయడంతో ఆమె పెద్ద గొడవ చేసింది. విషయం బయటకు చెప్తే చంపేస్తానని బెదిరించింది. దీంతో అతడు పోలీసులకు ఫిర్యాదు చేశాడు.

బాధితుడి ఫిర్యాదు మేరకు పోలీసులు కేసు నమోదు చేసుకొని దర్యాప్తు ప్రారంభించారు. అండాలు విక్రయించేందుకు వీలుగా అనిత తన ఆధార్‌ కార్డులో పుట్టిన తేదీని సైతం మార్చుకుందని పోలీసులు గుర్తించారు. భర్త అనుమతితోనే ఇదంతా చేస్తున్నట్లు ఫోర్జరీ పత్రాలు సృష్టించిందని తెలిపారు. 2019 జనవరి నుంచి 2022 జూన్‌ మధ్య ఆమె పలుమార్లు తన అండాలను అమ్ముకుందని భర్త తన ఫిర్యాదులో పేర్కొన్నాడు.