సికింద్రాబాద్-తిరుపతి మధ్య రెండు ప్రత్యేక సర్వీసులు

తిరుమల శ్రీవారి భక్తుల సౌకర్యార్థం సికింద్రాబాద్-తిరుపతి మధ్య ప్రత్యేక రైళ్లను దక్షిణ మధ్య రైల్వే ప్రకటించింది. ఈ నెల 27, 28వ తేదీల్లో స్పెషల్ ట్రైన్స్‌ను తిప్పనుంది. అన్ని ప్రధాన స్టేషన్లలో ఈ ట్రైన్లు ఆగనున్నాయి. ఈ మేరకు ట్రైన్ల వివరాలను పేర్కొంటూ ట్విట్టర్‌లో దక్షిణ మధ్య రైల్వే పోస్ట్ చేసింది.

సికింద్రాబాద్-తిరుపతి(ట్రైన్ నెంబర్ 07489) ఈ నెల 27న అందుబాటులో ఉండనుంది. ఆ రోజు సాయంత్రం 7 గంటలకు సికింద్రాబాద్‌లో బయలుదేరి తర్వాతి రోజు ఉదయం 7.50 నిమిషాలకు తిరుపతి చేరుకోనుంది. ఇక తిరుపతి-సికింద్రాబాద్(ట్రైన్ నెంబర్ 07490) ఈ నెల 28న తిరగనుంది. ఆ రోజు సాయంత్రం 8.25 నిమిషాలకు తిరుపతిలో బయలుదేరి తర్వాతి రోజు ఉదయం 8.30 నిమిషాలకు సికింద్రాబాద్ చేరుకోనుంది. ప్రయాణికుల రద్దీ దృష్ట్యా ఈ రెండు ప్రత్యేక రైళ్లను తిప్పనున్నట్లు దక్షిణ మధ్య రైల్వే పేర్కొంది.

నల్గొండ, మిర్యాలగూడ, నడికూడి, సత్తెనపల్లి, గుంటూరు, తెనాలి, బాపట్ల, చీరాల, ఒంగోలు, నెల్లూరు, గూడూరు, రేణిగుంట స్టేషన్లలో ఈ ట్రైన్స్ ఆగనున్నాయని దక్షిణ మధ్య రైల్వే స్పష్టం చేసింది. ఈ ప్రత్యేక రైళ్లలో 1AC, AC II టైర్, AC III టైర్, స్లీపర్, సెకండ్ క్లాస్ జనరల్ కోచ్‌లు ఉంటాయని తెలిపింది. సికింద్రాబాద్-తిరుపతి మధ్య ప్రయాణికుల రద్దీ విపరీతంగా ఉంటుంది. తిరుమల శ్రీవారి దర్శనానికి వెళ్లే భక్తులు పెద్ద సంఖ్యలో ఉంటారు. హైదరాబాద్ నుంచి భారీ సంఖ్యలో భక్తులు తిరుపతి వెళుతూ ఉంటారు. దీంతో భక్తుల రద్దీకి తగ్గట్లు ట్రైన్లు అందుబాటులో లేవు. ఈ కారణంతో సికింద్రాబాద్-తిరుపతి మధ్య దక్షిణ మధ్య రైల్వే ఎప్పటికప్పుడు ప్రత్యేక రైళ్లను నడుపుతూ ఉంటుంది. తిరుమల దర్శనానికి వెళ్లే భక్తులతో ఈ మార్గంలోనవెళ్లే ట్రైన్లన్నీ కిటకిటలాడుతూ ఉంటాయి.

ప్రయాణికుల రద్దీ ఈ మార్గంలో ఎక్కువగా ఉండటంతో.. త్వరలో వందే భారత్ ట్రైన్‌ను కూడా అందుబాటులోకి తీసుకురానున్నారనే వార్తలు వినిపిస్తున్నాయి. ఈ సారి కేంద్ర బడ్జెట్‌లో తెలుగు రాష్ట్రాలకు మరో మూడు వందే భారత్ రైళ్లు ప్రకటిస్తారని టాక్ నడుస్తోంది. ఈ మూడు వందే భారత్ రైళ్లలో ఒక ట్రైన్‌ను సికింద్రాబాద్-తిరుపతి మధ్య తిప్పనున్నారనే ప్రచారం జరుగుతోంది. ఈ మార్గం మధ్య వందే భారత్ ఎక్స్‌ప్రెస్ అందుబాటులోకి వస్తే.. శ్రీవారి భక్తులకు ప్రయాణం మరింత సులభతరం అవుతుంది. ప్రయాణ సమయం మరింత తగ్గి తిరుపతికి తక్కువ టైమ్‌లో చేరుకుని దర్శనం చేసుకోవచ్చు. దీంతో త్వరలో సికింద్రాబాద్-తిరుపతి మధ్య వందే భారత్ రైలును అందుబాటులోకి తీసుకొచ్చే అవకాశాలు ఉన్నాయని చెబుతున్నారు. దీనిపై ఇప్పటికే రైల్వే శాఖ ప్రతిపాదనలు కూడా సిద్దం చేసినట్లు తెలుస్తోంది.