ఎవరి పబ్లిక్ కార్యక్రమాలనూ బ్యాన్ చేయడం లేదు: ఏపీ డీజీపీ

జీవో నంబర్ 1 ద్వారా ఎవరి పబ్లిక్ కార్యక్రమాలనూ బ్యాన్ చేయడం లేదని ఏపీ రాష్ట్ర  డీజీపీ రాజేంద్రనాథ్ రెడ్డి  స్పష్టం చేశారు. జీవో నంబర్ 1 గురించి ఎవరూ ఆందోళన చెందాల్సిన అవసరం లేదని తేల్చిచెప్పారు.  ఇదిలావుంటే ఆంధ్రప్రదేశ్‌లో వైఎస్సార్ కాంగ్రెస్ పార్టీ ప్రభుత్వం జారీ చేసిన జీవో నంబర్ 1పై జోరుగా చర్చ సాగుతోంది. తమను అణిచివేయడానికే జీవో నంబర్ 1 తీసుకొచ్చారని ప్రతిపక్ష పార్టీలు దుమ్మెత్తిపోస్తున్నాయి. దీంతో ఈ జీవోపై రాష్ట్ర డీజీపీ రాజేంద్రనాథ్ రెడ్డి క్లారిటీ ఇచ్చారు. 

పశ్చిమ గోదావరి జిల్లా భీమవరంలో జరిగిన పోలీసుల జిల్లా రివ్యూ మీటింగ్‌కు డీజీపీ రాజేంద్రనాథ్ రెడ్డి హాజరయ్యారు. ఈ సందర్భంగా డీజీపీ రాజేంద్రనాథ్ రెడ్డి మాట్లాడుతూ.. జీవో నంబర్ 1ను బేస్ చేసుకుని ఎవరి కార్యక్రమాలనూ బ్యాన్ చేయడం లేదని స్పష్టం చేశారు. జీవో నంబర్ 1 గురించి ఎవరూ ఆందోళన చెందాల్సిన అవసరం లేదన్నారు.

తాము ఎక్కడా, ఎవరినీ బ్లాక్ చేయడం లేదని డీజీపీ రాజేంద్రనాథ్ రెడ్డి వెల్లడించారు. జీవో వచ్చిన తర్వాత కూడా పొలిటికల్ పార్టీల మీటింగులకు అనుమతులు ఇచ్చామని గుర్తు చేశారు. అయితే, ఎవరైనా పాదయాత్ర చేయాలంటే జిల్లా హెడ్ క్వార్టర్స్‌లో అనుమతి తీసుకోవాల్సి ఉంటుందని వివరించారు.

ఇక, రాష్ట్రంలో గంజాయి అక్రమ రవాణా 25 ఏళ్ల నుంచి నడుస్తోందని డీజీపీ రాజేంద్రనాథ్ రెడ్డి వ్యాఖ్యానించారు. ఈ క్రమంలో గత ఏడాది నుంచి రాష్ట్రవ్యాప్తంగా గంజాయి తోటల్ని నాశనం చేస్తున్నామని, స్మగ్లింగ్‌ను అడ్డుకుంటున్నామని వెల్లడించారు. ఇతర రాష్ట్రాల్లో జరుగుతున్న గంజాయి సాగును కూడా అక్కడ వాళ్లు ధ్వంసం చేయాల్సి ఉంటుందని డీజీపీ రాజేంద్రనాథ్‌ రెడ్డి సూచించారు.