ఏపీలో విద్యా వ్యవస్థ చాలా బాగుందని నికోలస్ జేమ్స్ వుజిసిక్ కితాబు

ఏపీలో విద్యా వ్యవస్థ చాలా బాగుందని ప్రముఖ వక్త నికోలస్ జేమ్స్ వుజిసిక్ కితాబిచ్చారు. నికోలస్ జేమ్స్ వుజిసిక్.. ప్రపంచ వ్యాప్తంగా గుర్తింపు పొందిన వక్త. ఆయన ఎంతో మందికి ఆదర్శం. అలాంటి వ్యక్తి భారత్ పర్యటనకు వచ్చారు. ఈ పర్యటనలో భాగంగా గుంటూరు జిల్లాలోని ఓ ప్రభుత్వ పాఠశాలను సందర్శించారు. ఈ సందర్భంగా ఆయన ఆసక్తికర కామెంట్స్ చేశారు. నికోలస్ జేమ్స్ వుజిసిక్‌ ను చూసిన విద్యార్థులు.. ఆనందం వ్యక్తం చేశారు. ఆయనతో ఇంగ్లిష్‌లో మాట్లాడారు. తమకు ప్రభుత్వం అందిస్తున్న వసతుల గురించి వివరించారు.

'ఆంధ్రప్రదేశ్‌లో విద్యా వ్యవస్థ చాలా బాగుంది. ఇక్కడి విద్యార్థులను చూస్తుంటే ఆనందంగా ఉంది. వీరికి ఇచ్చిన యూనిఫామ్, ట్యాబ్‌లు బాగున్నాయి. మంచి ఆహారాన్ని ప్రభుత్వం అందిస్తోంది. ఇంగ్లిష్ బుక్‌లో ఫస్ట్ లెసన్ ఓపెన్ చేస్తే.. నా గురించే ఉంది. నా గురించి, నా వైఫ్ గురించి ఆ పాఠంలో రాశారు. మీరు కురిపిస్తున్న ప్రేమను చూసి భావోద్వేగానికి గురవుతున్నా. థ్యాంక్యూ ఇండియా, థ్యాంక్యూ చిల్డ్రన్, థ్యాంక్యూ సీఎం' అని నికోలస్ జేమ్స్ వుజిసిక్ (వ్యాఖ్యానించారు.

నికోలస్ జేమ్స్ వుజిసిక్‌.. కాళ్లు, చేతులు లేకపోయినా.. తండ్రి సాయంతో ఐదేళ్ల వయసులోనే ఈత నేర్చుకున్నారు. సముద్రంపై సర్ఫింగ్ చేయడం నేర్చుకున్నాడు. బాల్యంలో తన తల్లి చేతుల్లో మామూలు పిల్లవాడిలాగేనే పెరిగినా.. సమాజంలో ఎదగడానికి ఎన్నో సవాళ్లను ఎదుర్కొన్నారు. నోటిలో పెన్ను పెట్టుకొని రాయడం నేర్చుకున్నారు. గొంతు కింద గోల్ఫ్‌స్టిక్ పెట్టుకుని బంతిని కొట్టడం నేర్చుకున్నారు. అనేక అంతర్జాతీయ వేదికలపై ప్రసంగించి గొప్ప పేరు తెచ్చుకున్నారు.