రెండు నెలల కిందట మిస్సైన ఆటోడ్రైవర్,,స్నేహితుడి ఫోన్ కాల్‌‌తో బయటపడ్డ నిజం

నిజజీవితంలో చోటు చేసుకొనే కొన్ని ఘటనలు అచ్చం సినిమా సీన్లను తలపిస్తాయి. ఇదిలావుంటే చనిపోయాడని భావించి.. కుటుంబసభ్యులు ఖననం చేసిన ఓ వ్యక్తి కొద్ది రోజుల తర్వాత సజీవంగా తిరిగొచ్చిన విచిత్రమైన ఘటన మహారాష్ట్రలో చోటుచేసుకుంది. మహారాష్ట్రలోని పాల్ఘర్ జిల్లాలో రఫీక్ షేక్ (60) అనే ఓ ఆటో డ్రైవర్ రెండు నెలల కిందట ఇంటి నుంచి అదృశ్యమయ్యాడు. కుటుంబసభ్యులు అతడి కోసం వెదికినా ఆచూకీ లభించకపోవడంతో పోలీసులకు ఫిర్యాదు చేశారు. ఈ క్రమంలో బొయసార్, పాల్ఘర్ స్టేషన్ల మధ్య జనవరి 29న గుర్తుతెలియని వ్యక్తి ట్రాక్ దాటుతుండగా ప్రమాదవశాత్తూ రైలు ఢీకొని మృతిచెందాడు. ఘటనలో మృతదేహం గుర్తుపట్టలేనంతగా మారిపోయింది.

మృతదేహాన్ని స్వాధీనం చేసుకున్న పోలీసులు.. కేరళలో ఉన్న రఫీక్ భార్యను సంప్రదించారు. ఆమె పాల్ఘర్ చేరుకుని అతడు తన భర్తే అని చెప్పడంతో మృతదేహాన్ని కుటుంబసభ్యులకు పోలీసులు అప్పగించారు. దీంతో మృతదేహాన్ని పూడ్చిపెట్టి అంత్యక్రియలు జరిపించారు. అయితే, చనిపోయాడని భావించిన రఫీక్.. ఓ అనాథాశ్రమంలో ఉన్నట్టు ఆదివారం వెలుగులోకి వచ్చింది. అతడు తన స్నేహితుడితో చాట్ చేసిన వీడియో క్లిప్ సోషల్ మీడియాలో వైరల్ అవుతోంది.

అతడు బతికే ఉన్నట్టు తెలిసి పోలీసులతో పాటు కుటుంబసభ్యులు షాకయ్యారు.

పూడ్చిపెట్టిన మృతదేహాన్ని గుర్తించే ప్రయత్నాలు కొనసాగుతున్నాయని పోలీసు అధికారి ఒకరు తెలిపారు. రఫీక్ షేక్‌కు అతడి స్నేహితుడు ఆదివారం నాడు ఫోన్ చేయడంతో అతడు స్పందించాడు. ఇద్దరూ వీడియో కాల్‌లో మాట్లాడుకుని, తాను క్షేమంగా ఉన్నట్టు రఫీక్ చెప్పడం గమనార్హం. ఈ విషయం కుటుంబసభ్యులకు రఫీక్ స్నేహితుడు తెలియజేశాడు. తొలుత దీనిని నమ్మలేకపోయిన కుటుంబసభ్యులు.. చివరకు రఫీ ప్రాణాలతోనే ఉన్నాడని తెలిసి ఆనందంతో ఉబ్బితబ్బుబ్బియ్యారు.

పోలీసులకు కూడా సమాచారం ఇచ్చారని చెప్పారు. రెండు నెలల కిందట ఇంటి నుంచి వెళ్లిపోయన రఫీక్.. సఫాలాలోని ఓ అనాథ ఆశ్రమంలో ఉన్నట్టు పోలీసులు గుర్తించారు. దీనికి ముందు రైలు ప్రమాదంలో చనిపోయిన వ్యక్తి మృతదేహాన్ని రఫీదిగా కుటుంబం గుర్తించిందని, అవసరమైన అన్ని లాంఛనాలు అనుసరించి వారికి అప్పగించినట్లు ఆయన చెప్పారు. ఆ తర్వాత షేక్ బతికే ఉన్నాడని పోలీసులకు సమాచారం వచ్చిందన్నారు. ఇప్పుడు పూడ్చిపెట్టిన గుర్తుతెలియని మృతదేహం ఎవరిది, ఆ వ్యక్తి కుటుంబాన్ని గుర్తించడం మా పని అని ఆ అధికారి పేర్కొన్నారు.