టర్కీలో ఎన్డీఆర్ఎఫ్ బలగాల విస్త్రుత సేవలు...ఎంతో మంది చిన్నారులకు ప్రాణదాతలుగా మారిన వైనం

టర్కీలో  మన దేశానికి చెందిన ఎన్డీఆర్ఎఫ్ బలగాల విస్త్రుత సేవలు అందిస్తూ అక్కడి వారి ప్రశంసలు పొందుతున్నాయి. ఇదిలావుంటే టర్కీ, సిరియా భూకంప మృతుల సంఖ్య 35 వేలు దాటింది. శిథిలాల తొలగింపు ప్రక్రియ ఇంకా కొనసాగుతుండటంతో.. మరణాల సంఖ్య మరింత పెరిగే అవకాశం ఉంది. భూకంపంతో తీవ్రంగా నష్టపోయిన టర్కీకి భారత్ అండగా నిలుస్తోంది. భూకంపం సంభవించిన మరుసటి రోజే ఎన్డీఆర్ఎఫ్ బలగాలు టర్కీ చేరుకొని రెస్క్యూ ఆపరేషన్ ప్రారంభించాయి. ఇండియన్ ఆర్మీ, వైద్య సిబ్బంది సైతం టర్కీలో సేవలు అందిస్తున్నారు. పెద్ద ఎత్తున ఔషధాలను భారత్ టర్కీకి అందించింది.

ఎన్డీఆర్ఎఫ్ బలగాలు అనూహ్య రీతిలో ఆరేళ్ల పాపను కాపాడటం వార్తల్లోకెక్కింది. ఎన్డీఆర్ఎఫ్‌ డాగ్ స్క్వాడ్‌లోని రోమియా, జూలీ శునకాలు ప్రాణాలను కాపాడటంలో ముందు వరుసలో నిలుస్తున్నాయి. మెషీన్లు విఫలమైన చోట.. మనిషి జాడ కనిపెట్టడంలో ఇవి విజయవంతం అవుతున్నాయి. టన్నుల కొద్దీ.. గుట్టలుగా ఉన్న శిథిలాల మధ్య ఆరేళ్ల పాప బతికి ఉన్నట్లు గుర్తించడంలో డాగ్ స్క్వాడ్ కీలక పాత్ర పోషించింది. ఆ శునకాలే లేకపోతే.. చిన్నారిని కాపాడలేకపోయే వారేమో.

నుర్దగీతోపాటు టర్కీలోని ఇతర ప్రాంతాల్లో శిథిలాల కింద చిక్కుకుపోయి.. ప్రాణాలతో ఉన్న వారిని గుర్తించి బయటకు తీయడం కోసం ఎన్డీఆర్ఎఫ్ తీవ్రంగా కృషి చేస్తోంది. ఆరేళ్ల పాపను జూలీ ఎలా గుర్తించిందనే విషయాన్ని డాగ్ హ్యాండ్లర్ కానిస్టేబుల్ కుందన్ వివరించారు.

‘నుర్దగీలో గాలింపు, సహాయక చర్యలు చేపట్టాలని మా ప్రభుత్వం ఆదేశించింది. ఇక్కడి శిథిలాల కింద ఓ వ్యక్తి బతికి ఉన్నారనే సమాచారం అందింది. దీంతో శిథిలాల కిందకు వెళ్లాలని జూలీకి సూచించాం. తను వెళ్లి.. అరవడం మొదలుపెట్టింది. శిథిలాల కింద చిక్కుకుపోయిన వారిని తాను గుర్తించింది అనడానికి ఇది సంకేతం’ అని కుందన్ తెలిపారు.

దీంతో మరోసారి నిర్ధారణ చేసుకోవడం కోసం మేం రోమియా(మేల్ లాబ్రడర్)ను శిథిలాల్లోకి పంపించాం. అది కూడా అక్కడెవరో బతికే ఉన్నారని అన్నట్టుగా మొరిగిందని డాగ్ హ్యాండ్లర్ చెప్పారు. శిథిలాల కింద ఉన్నదెవరు..? వయసెంత ఉంటుంది..? ఆరోగ్య పరిస్థితి ఎలా ఉందనే వివరాలు ఎవరికీ తెలీదు. గంటల తరబడి రెస్క్యూ ఆపరేషన్ చేపట్టిన ఎన్డీఆర్ఎఫ్ బలగాలు ఆరేళ్ల పాపను సురక్షితంగా బయటకు తీసుకొచ్చాయి.

వాస్తవానికి అక్కడ ఆరు అంతస్థుల భవనం ఉండేది. అది కుప్పకూలి ఓ దిబ్బలా ఏర్పడింది. దాని కింద కొందరు బతికి ఉన్నారని స్థానికులు ఎన్డీఆర్ఎఫ్‌కు సమాచారం ఇచ్చారు. దీంతో బతికి ఉన్న వారి జాడ కనిపెట్టడం కోసం రోమియో, జూలీని రంగంలోకి దింపి విజయం సాధించారు. ఆరేళ్ల బాలికను కాపాడిన ఎన్డీఆర్ఎఫ్ బలగాలను కేంద్ర హోం మంత్రి అమిత్ షా అభినందించారు. ‘ఎన్డీఆర్ఎఫ్‌ను చూస్తే గర్వంగా ఉంది. టర్కీ రెస్క్యూ ఆపరేషన్‌లో గజియన్‌టెప్ సిటీలో టీమ్ ఇండియా-11 ఆరేళ్ల బాలిక బెరెన్‌ను కాపాడింది’ అని షా ట్వీట్ చేశారు.