చంద్రబాబును అడ్డుకున్న పోలీసులు,,,వాగ్వాదానికి దిగిన టీడీపీ కార్యకర్తలు

పోలీసులు అడ్డుకోవడంతో తెలుగుదేశం పార్టీ అధినేత నారా చంద్రబాబు నాయుడు అనపర్తి పర్యటనలో ఉద్రిక్తత వాతావరణం నెలకొంది. అనపర్తి దేవిచౌక్‌లో బహిరంగ సభకు అనుమతి ఇచ్చిన పోలీసులు.. ఏర్పాట్లు చేసుకున్నాక అనుమతిలేదని చెప్పడంతో.. టీడీపీ నేతలు ఆగ్రహం వ్యక్తం చేశారు. చంద్రబాబు ను అనపర్తి రానీయకుండా పోలీసులు అడ్డంకులు సృష్టించారని ఆరోపించారు. సామర్లకోట పర్యటన ముగించుకుని అనపర్తి బయల్దేరిన చంద్రబాబును.. బలభద్రపురం దాటాక పోలీసులు అడ్డుకున్నారు. రోడ్డుకు అడ్డంగా బస్సును నిలిపారు. పోలీసులు కూడా రోడ్డుపై బైఠాయించారు.

ఈ సమయంలో.. ఆగ్రహించిన చంద్రబాబు వాహనం పైకె ఎక్కి పోలీసుల తీరుపై అసహనం వ్యక్తం చేశారు. ఆ తర్వాత కాలినడకన అనపర్తి బయల్దేరారు. లక్ష్మీనర్సాపురం వద్ద పోలీసులు మరో బస్సును రోడ్డుకు అడ్డంగా నిలిపారని TDP నాయకులు ఆరోపించారు. వాటన్నింటినీ లెక్క చేయని చంద్రబాబు.. సెల్‌ఫోన్‌ లైట్‌ వెలుతురులోనే దాదాపు 7 కిలోమీటర్లు నడుచుకుంటూ అనపర్తి చేరుకన్నారు. పోలీసులకు సహాయ నిరాకరణ చేస్తున్నట్టు చంద్రబాబు ప్రకటించారు.

అనపపర్తిలోని దేవీచౌక్‌ సెంటర్‌లో ఏర్పాటు చేసిన సభలో చంద్రబాబు కీలక వ్యాఖ్యలు చేశారు. పోలీసుల తీరుపై తీవ్ర ఆగ్రహం వ్యక్తం చేశారు. చంద్రబాబు మాట్లాడుతుండగా.. కరెంట్ పోయింది. దీంతో కార్యకర్తల సెల్‌ఫోన్‌ లైట్ల వెలుతురులో చంద్రబాబు మాట్లాడారు. 'ఇప్పటికే ఎన్నో అవమానాలు భరించా. ఇంకా మీకోసం భరిస్తా. అనపర్తికి వస్తానంటే ముందుగా అనుమతి ఇచ్చారు. పోలీసులు ఇచ్చిన ఆర్డర్‌ కాపీ కూడా నాచేతిలోనే ఉంది. జగ్గంపేట, పెద్దాపురం వెళ్తే పోలీసులు సహకరించారు. కానీ అనపర్తిలో ఎందుకిలా చేస్తున్నారో అర్థం కావడం లేదు' అని చంద్రబాబు వ్యాఖ్యానించారు.

'అనపర్తికి వస్తే గ్రావెల్‌ సూర్యనారాయణ ఉన్నారు. ఖబడ్దార్‌ గ్రావెల్‌ సూర్యనారాయణ. నాతో పెట్టుకుంటున్నావ్‌.. జాగ్రత్తగా ఉండు. తమాషా అనుకోవద్దు. నేను తమాషా రాజకీయాలు చేయట్లేదు. రాష్ట్ర భవిష్యత్‌ కోసం పోరాడుతున్నా. ఆ సైకో చెప్పినట్లు వింటే.. తర్వాత మీరు నా దగ్గరే పనిచేయాలి గుర్తుపెట్టుకోండి. మీరు చేసే పనులు చూసి ఆ యూనిఫామ్‌ సిగ్గుపడుతుంది. మీరంతా 22ఏళ్లు నా దగ్గర పనిచేసేవాళ్లే గుర్తుపెట్టుకోండి. సీఎం కావాలని నేను పాదయాత్ర చేయట్లేదు' అని చంద్రబాబు ఆగ్రహంతో ఊగిపోయారు.