ఏపీ బీజేపీలో అంతర్గత వార్... ఎంపీ జీవీఎల్ వీడియోను ట్వీట్ చేసిన పురంధేశ్వరి

ఏపీ బీజేపీలో అంతర్గత వార్ కొనసాగుతోంది. తాాజాగా ఆంధ్రప్రదేశ్ బీజేపీలో మరో వార్ మొదలైంది. ఈ సారి పేర్ల విషయంలో ఇద్దరు నేతల మధ్య వివాదం రాజుకుంది. ఎంపీ జీవీఎల్ నరసింహారావు వ్యాఖ్యలపై మాజీ కేంద్రమంత్రి పురంధేశ్వరి స్ట్రాంగ్‌గా స్పందించారు. ఆంధ్రప్రదేశ్‌లో అన్నింట్లో ఇద్దరేనా అంటూ జీవీఎల్ చేసిన కామెంట్ల వీడియోను ట్వీట్ చేసి స్పందించారు. ‘అన్నీ ఇద్దరి పేర్లేనా.. ఒకరు తెలుగు జాతికి గుర్తింపుని తీసుకొని వచ్చి, పేదలకు నిజమైన సంక్షేమం-- 2 రూపాయలకే కిలో బియ్యం, పక్కా గృహాలు, జనతా వస్త్రాలు, మహిళా విశ్వవిద్యాలయం వంటివీ ప్రజలకు అందిస్తే , మరో కరు ఫీజు రీయింబర్స్‌మెంట్, 108 ఉచిత అంబులెన్సు సేవలు,ఆరోగ్యశ్రీ అందించారు. ఆ ఇద్దరు కాదు, ఆ మహానుభావులు’అంటూ పురంధేశ్వరి కౌంటర్ ఇచ్చారు.

బీజేపీ ఎంపీ జీవీఎల్ నరసింహారావు గురువారం కాపు సామాజిక వర్గాల నేతలతో సమావేశం అయ్యారు. అనంతరం మాట్లాడిన ఆయన.. రాష్ట్రంలో రాజకీయాలనేవి రెండు పార్టీలకు, రెండు కుటుంబాలకు పరిమితం అయ్యే అంశం కాదన్నారు. ఏది చూసినా ఆ కుటుంం.. ఈ కుటుంబం.. ఆ పార్టీ.. ఈ పార్టీ మాత్రమేనా అని కామెంట్ చేశారు. వాళ్ల ఖ్యాతిని పెంచుకోవాలి తప్పితే.. ఇలా చేయడం సరికాదన్నారు. అన్నీ వైఎస్సార్.. ఆయనంటే అభిమానం ఉన్నా సరే.. అన్నింటికి ఆ ఇద్దరి పేర్లేనా.. మిగతా నాయకులెవరూ కనిపించరా అంటూ ప్రశ్నించారు.

సామాజిక న్యాయం అందరికి ఉండాలన్నారు జీవీఎల్. వంగవీటి మోహన రంగా కేవలం కాపుల కోసం పనిచేయలేదని.. బడుగు బలహీన వర్గాలు, ప్రజల కోసం పనిచేసిన వ్యక్తి అన్నారు. మరి ఇతర నాయకులకు జిల్లాల పేర్లు పెట్టినప్పుడు వంగవీటి పేరు పెట్టాలని అడిగితే ఎందుకు స్పందించడం లేదని ప్రశ్నించారు. ఈ ప్రభుత్వంలో అదే సామాజిక వర్గానికి చెందిన మంత్రులు, ఎంపీలు, ఎమ్మెల్యేలు ఉన్నారని.. వీరంతా ప్రభుత్వం దృష్టికి ఎందుకు తీసుకెళ్లలేదన్నారు.

జీవీఎల్ చేసి ఆ ఇద్దరు అనే పదాన్ని పురంధేశ్వరి హైలైట్ చేశారు. ఆ ఇద్దరు కాదు ఆ మహానుభావులు అన్నారు. వారు రాష్ట్రానికి చేసిన సేవల్ని ప్రస్తావిస్తూ ట్వీట్ చేశారు. మరి పురంధేశ్వరి చేసిన ట్వీట్‌పై నరసింహారావు ఎలా స్పందిస్తారన్నది చూడాలి. ఇప్పటికే ఏపీ బీజేపీలో వార్ నడుస్తోంది.. అధ్యక్షుడు సోము వీర్రాజుపై కొందరు నేతలు అసంతృప్తిగా ఉన్నారు.. కన్నా లక్ష్మీనారాయణ ఏకంగా పార్టీకి రాజీనామా చేశారు. ఎంపీ జీవీఎల్, సోము తీరుపై ఘాటు వ్యాఖ్యలు చేశారు. ఈ క్రమంలో పురంధేశ్వరి నరసింహారావుపై చేసిన ట్వీట్ చర్చనీయాంశమైంది.