భారీ పెట్టుబడులను ఆకర్షిస్తున్న జగన్ సర్కార్

భారీ పెట్టుబడులను రాష్ట్రానికి తీసుకురావాలన్న నిశ్చయంతో ఏపీ సర్కార్ ముందుకెళ్తోంది. హైదరాబాద్ లాగానే విశాఖపట్నం కూడా.. కాస్మోపాలిటన్ కల్చర్ కలిగిన నగరం అని.. ఆంధ్రప్రదేశ్ ఐటీ శాఖ మంత్రి గుడివాడ అమర్నాథ్ వివరించారు. ఆహ్లాదకరమైన వాతావరణం, సుదీర్ఘ సముద్ర తీరం వంటి సౌకర్యాలు విశాఖకు అదనం అని వ్యాఖ్యానించారు. ప్రపంచ ఐటీ డెస్టినేషన్‌గా విశాఖపట్నం నగరాన్ని మార్చడానికి ప్రయత్నిస్తున్నామని చెప్పారు. మూడు పారిశ్రామిక కారిడార్లు ఉన్న ఏకైక రాష్ట్రం ఆంధ్రప్రదేశ్ అని స్పష్టం చేశారు. విశాఖ-చెన్నై, చెన్నై-బెంగళూరుతో పాటు హైదరాబాద్-బెంగళూరు కారిడార్లను ఏపీ కలిగి ఉందని వివరించారు. పారిశ్రామిక కేటాయింపులకు 48 వేల ఎకరాల భూమి అందుబాటులో ఉందని గుడివాడ అమర్నాథ్ చెప్పారు.

'ఈజ్ ఆఫ్ డూయింగ్ బిజినెస్‌లో మూడేళ్లుగా ఏపీ నెం.1 స్థానంలో ఉంది. త్వరలో 2023-2028కి కొత్త ఐటీ పాలసీని తీసుకురాబోతున్నాం. స్టార్టప్ కల్చర్‌ను ప్రోత్సహిస్తూ.. సమతౌల్య ప్రాంతీయ అభివృద్ధి, నైపుణ్యంతో పాటు ఉపాధి కల్పనను ప్రోత్సహించాలని ఏపీ ప్రభుత్వం లక్ష్యంగా పెట్టుకుంది. సామాజిక, ఆర్థిక, పర్యావరణ ప్రమాణాలలో నీతి ఆయోగ్ ఎస్డీజీలో 4వ స్థానంలో ఉంది. ఎగుమతుల్లో 1.44 లక్షల కోట్ల వృద్ధితో 6వ స్థానంలో ఉంది, గతేడాదితో పోలిస్తే 15.33 శాతం వృద్ధిని సాధించాం. పత్తి, పట్టు ఉత్పత్తిలో 2వ స్థానంలో ఉన్నాం. మొబైల్ తయారీ రంగంలో ప్రతి నెలా 3.5 మిలియన్ మొబైల్‌లను ఏపీ అందిస్తోంది' అని ఐటీ మంత్రి గుడివాడ అమర్నాథ్ వివరించారు.

'ఆటోమోటివ్‌లో.. అశోక్ లేలాండ్, కియా, హీరో, ఇసుజు, అపోలో, యోకోహామా, భారత్ ఫోర్డ్ వంటివి.. ఎలక్ట్రానిక్స్ సిస్టమ్స్ డిజైన్ అండ్ తయారీలో బ్లూ స్టార్, ఫాక్స్‌కాన్, డయాకాన్, పానాసోనిక్, జడ్ టీటీ, ఫ్లెక్స్, వింటెక్ వంటి క్లస్టర్‌లను ఏపీ కలిగి ఉంది. మొబైల్ తయారీకి ఏపీ కేంద్రంగా ఉంది. ఫార్మాస్యూటికల్స్‌కు హైదరాబాద్‌తో పాటు ఏపీలో మైనోల్న్, బయోకాన్, లుబెన్, హెటిరో, లూరెస్, దివిస్, ఆరబిందో, జీ.ఎస్.కె.డాక్టర్ రెడ్డిస్, వంటివి ఉన్నాయి. ఏపీలో వ్యాపార వాతావరణం కోసం సరైన పర్యావరణ వ్యవస్థ ఉంది. ఇవన్నీ మూడేళ్లపాటు ఈజ్ ఆఫ్ డూయింగ్ బిజినెస్‌లో ఏపీ నంబర్ 1 స్థానంలో ఉండేలా చేసింది' అని ఆర్థిక మంత్రి బుగ్గన రాజేంద్రనాథ్ రెడ్డి వివరించారు.

'రానున్న రోజుల్లో విజయనగరం, వైజాగ్ జంట నగరాలుగా ఆవిర్భవిస్తాయి. కాకినాడ, నెల్లూరు, కడప.. ఇలా అనేక జిల్లాల్లో ప్రోత్సాహకాలు అందించడం ద్వారా.. అపారమైన అవకాశాలను ఏపీ అందిస్తుంది. ఏపీకి హైదరాబాద్ తర్వాత అతిపెద్ద నగరం వైజాగ్. అన్ని రకాల మౌలిక సదుపాయాలను కలిగి ఉంది. భోగాపురం విమానాశ్రయంతో విజయనగరం, వైజాగ్ జంట నగరాలుగా ఆవిర్భవించనున్నాయి. నేను జర్మనీకి వెళ్లినప్పుడు అక్కడ హాంబర్గ్ నగరం జర్మనీకి ఆదాయాన్ని ఇవ్వడాన్ని చూశా. అలా వైజాగ్‌ను ఎందుకు అభివృద్ధి చేయలేం' అని ఏపీటీపీసీ ఛైర్మన్ రవిచంద్రారెడ్డి ప్రశ్నించారు.

'కోకో ఉత్పత్తిలో 70 శాతం ఆంధ్రప్రదేశ్ నుండి వస్తోంది. ఏపీ కేవలం రైస్ బౌల్ మాత్రమే కాదు.. ఇది దేశంలోనే పెద్ద చాక్లెట్ బౌల్. అరటి పండ్లు, ఆహారం, సుగంధ ద్రవ్యాలు, టమాటా ప్రాసెసింగ్‌ కోసం ఏపీలో నాలుగు మెగా యూనిట్లు రానున్నాయి. ఏపీ అతిపెద్ద పల్ప్ ఎగుమతిదారు. ఎక్కువ పల్ప్ ఆంధ్రప్రదేశ్‌లోని చిత్తూరు, అనంతపురం జిల్లాల నుండి వస్తుంది' అని ఏపీ ఫుడ్ ప్రాసెసింగ్ చీఫ్ ఆపరేటింగ్ ఆఫీసర్ భరత్ కుమార్ తోట వివరించారు.