మన ఓట్లు తీసేసి...బోగస్ ఓట్లు చేర్చుతున్నారు.... చంద్రబాబు ఆరోపణ

అధికార వైసీపీపై టీడీపీ అధినేత నారా చంద్రబాబు నాయుడు తీవ్ర ఆరోపణలు గుప్పించారు. ప్రస్తుత ప్రభుత్వం ఎప్పుడైనా ఎన్నికలకు వెళ్లొచ్చని.. అందుకు సిద్ధంగా ఉండాలని తెలుగుదేశం పార్టీ చీఫ్ చంద్రబాబు.. పార్టీ నాయకులు, కార్యకర్తలకు సూచించారు. ఏలూరు జిల్లా చొదిమెళ్లలో శుక్రవారం పార్టీ జోన్‌-2 సమీక్ష సమావేశం ఏర్పాటు చేశారు. ఈ సమావేశంలో మాట్లాడిన చంద్రబాబు.. సంచలన వ్యాఖ్యలు చేశారు. టీడీపీకి ఓట్లు వేస్తారనుకున్న చోట్ల అడ్డగోలుగా ఓట్లు తొలగిస్తున్నారని ఆరోపించారు. అదే సమయంలో.. బోగస్‌ ఓట్లు సృష్టిస్తున్నారని.. దీనిపట్ల జాగ్రత్తగా ఉండాలని చెప్పారు. చనిపోయినవారి ఓట్లు తొలగించకుండా రిగ్గింగుకు ప్రణాళిక వేస్తున్నారని చంద్రబాబు ఆరోపించారు.

ఈ పరిస్థితుల్లో ఎవరికి వారు తమ ఓట్లున్నాయో లేదో చూసుకోవాలని చంద్రబాబు సూచించారు. ఒక్క దొంగ ఓటు కూడా లేకుండా ఓటర్ల పరిశీలన వేగవంతం చేయాలని దిశానిర్దేశం చేశారు. ఉమ్మడి తూర్పు, పశ్చిమ గోదావరి జిల్లాల పరిధిలోని క్లస్టర్‌, యూనిట్‌, బూత్‌ ఇన్‌ఛార్జులు, మండల పార్టీ అధ్యక్షులు, పార్టీ శ్రేణులకు రానున్న ఎన్నికల్లో పార్టీ ఎజెండా, సిద్ధాంతాలు, సామాజిక మాధ్యమాల ద్వారా పార్టీ కార్యక్రమాలు, వైసీపీ వైఫల్యాల గురించి ప్రజల్లోకి ఎలా తీసుకెళ్లాలి అనే అంశాలను వివరించారు.

'రానున్న ఎన్నికల్లో చరిత్ర సృష్టించేందుకు ఏలూరు సమావేశం నాంది కావాలి. ఈ ప్రభుత్వం ఆక్వా రైతులకు అన్యాయం చేసింది. టీడీపీ అధికారంలోకి రాగానే వారికి యూనిట్‌ విద్యుత్‌ రూ.1.50కి ఇస్తాం. అధికారంలోకి వచ్చాకే అసెంబ్లీలో అడుగుపెడతానని శపథం చేశాను. అది సాకారమయ్యేందుకు కార్యకర్తలు అందరూ కృషి చేయాలి' అని చంద్రబాబు కోరారు. ఇటు వివేకా హత్య కేసు పైనా చంద్రబాబు కీలక వ్యాఖ్యలు చేశారు. ఈ కేసులో ప్రజల దృష్టిని మరల్చేందుకు ప్రయత్నాలు జరుగుతున్నాయని ఆరోపించారు.