రాష్ట్రంలో కొత్తగా 3 వేల ఆలయాలు నిర్మాణం,,,ఏపీ సర్కార్ నిర్ణయంం

ఏపీ సర్కార్ తాజాగా ఓ కీలక నిర్ణయం తీసుకొంది. దేవదాయ శాఖ ఆధ్వర్యంలో.. టీటీడీ శ్రీవాణి ట్రస్టు ద్వారా రాష్ట్రంలో కొత్తగా దాదాపు 3 వేల ఆలయాలను నిర్మించబోతున్నామని.. ఉప ముఖ్యమంత్రి కొట్టు సత్యనారాయణ వెల్లడించారు. గతంలో ఎప్పుడూ లేని విధంగా.. ఆలయాల నిర్మాణం కొనసాగుతోందని వివరించారు. ఒక్కో ఆలయానికి రూ.10 లక్షల చొప్పున 1,072 ఆలయాల నిర్మాణ ప్రక్రియ ఇప్పటికే ప్రారంభమైందని మంత్రి వెల్లడించారు. వీటిలో 936 చోట్ల ఆలయాలను నిర్మించేందుకు భూమిని గుర్తించామని కొట్టు సత్యనారాయణ చెప్పారు. పనులు పురోగతిలో ఉన్నాయన్నారు.

టీటీడీ శ్రీవాణి ట్రస్ట్ ద్వారానే మరో 330 ఆలయాల నిర్మాణం హిందూ ధార్మిక సంస్థ సమరసత ఆధ్వర్యంలో కొనసాగుతోందని.. కొట్టు సత్యనారాయణ చెప్పారు. ఇవి కాకుండా మరో 1,568 ఆలయాల నిర్మాణానికి స్థానిక ప్రజాప్రతినిధుల నుంచి ప్రతిపాదనలు వచ్చాయని వెల్లడించారు. మరో 300 చోట్ల కూడా ఆలయాలను నిర్మించాలని అక్కడి ప్రజాప్రతినిధులు కోరుతున్నారని.. వచ్చే ఏడాదిన్నర కాలంలోనే ఆలయాల నిర్మాణం పూర్తి చేయాలని లక్ష్యంగా పెట్టుకున్నామని స్పష్టం చేశారు.

వేగంగా నిర్మాణ పనులు పూర్తి చేసేందుకు ప్రతి 30 ఆలయాలకు ఒక ఇంజనీరింగ్‌ అధికారిని నియమించనున్నామని మంత్రి కొట్టు సత్యనారాయణ వివరించారు. దేవదాయ శాఖ ఆలయాల్లో పనిచేసే ఉద్యోగుల బదిలీలకు ఏక విధానంతో కూడిన ప్రత్యేక పాలసీని తీసుకురానున్నట్టు చెప్పారు. శ్రీశైలంలో వివిధ కులసంఘాల ఆధ్వర్యంలో అన్నదాన సత్రాల ఏర్పాటు, ఇతర సేవా కార్యక్రమాల నిర్వహణకు 18 దరఖాస్తులు ప్రభుత్వ పరిశీలనకు వచ్చాయని వివరించారు. వీటికి ఒక నిర్ణీత విధానంలో భూకేటాయింపులు చేయాలనే యోచన చేస్తున్నట్టు స్పష్టం చేశారు.

శ్రీశైలంలో భూముల కేటాయింపు ఆలయ అభివృద్ధికి దోహదపడేలా.. నిబంధనలు తీసుకొచ్చే యోచనలో ఉన్నామని కొట్టు సత్యనారాయణ వివరించారు. శ్రీశైలం ఆలయం అటవీ శాఖల మధ్య ఏళ్ల తరబడి అపరిష్కృతంగా ఉన్న 4,700 ఎకరాల భూమిని అటవీ శాఖ.. ఆలయానికి స్వాధీనం చేసేందుకు ఆమోదం తెలిపిందని వ్యాఖ్యానించారు. ఇటు విజయవాడ దుర్గగుడిలో భక్తులకు అదనపు సౌకర్యాల కోసం పూర్తి స్థాయి మాస్టర్‌ ప్లాన్‌ సిద్ధమైందని చెప్పారు. దేవదాయ శాఖ భూముల పరిరక్షణకు ప్రత్యేక సెల్‌ ఉందని కొట్టు వివరించారు.