జీవితంలో పోరాడాం అంటూ,,,తారకరత్న సతీమణి అలేఖ్యారెడ్డి ఎమోషనల్‌ పోస్ట్

నందమూరి తారకరత్న సతీమణి అలేఖ్యారెడ్డి తాజాగా చేసిన ఓ ఎమోషనల్ పోస్ట్ అందర్నీ కదిలించేస్తోంది. నందమూరి తారకరత్న మరణం కుటుంబంతో పాటూ అభిమానులు, టీడీపీ కార్యకర్తల్లో తీవ్ర విషాదాన్ని నింపింది. పుట్టిన రోజుకు నాలుగు రోజుల ముందు ప్రాణాలు కోల్పోవడం అందర్నీ బాధించింది. ముఖ్యంగా భార్య అలేఖ్యా రెడ్డి తారకరత్నతో గడిపిన సమయాన్ని, భర్తతో పాత జ్ఞాపకాలను గుర్తు చేసుకుంటున్నారు. తాజాగా తారకరత్నను గుర్తు చేసుకుంటూ సోషల్‌ మీడియాలో ఎమోషనల్‌ అయ్యారు.. ఇన్‌స్టాలో ఓ పోస్ట్ చేశారు.

‘మనం కలిసి ఉండేందుకు పోరాడాం.. ఆఖరి వరకూ పోరాడుతూనే ఉన్నాం. మన జీవితం అంత సులభంగా సాగలేదు. మనం కార్లలో నిద్రపోయినప్పటి నుంచి ఇప్పటివరకు ఎంతో దూరం ప్రయాణించాం. నువ్వో యోధుడివి నానా.. నువ్వు మమ్మల్ని ప్రేమించినట్లుగా ఎవరూ ప్రేమించలేదు’అంటూ భావోద్వేగానికి గురయ్యారు అలేఖ్యారెడ్డి.

ఈ నెల 22న తారకరత్న పుట్టిన రోజు కావడంతో అలేఖ్యా రెడ్డి ఎమోషనల్ పోస్ట్ పెట్టారు. ‘హ్యాపీ హ్యాపీ బర్త్ డే టు బెస్ట్ ఫాదర్, బెస్ట్ హస్బెండ్ అండ్ వండర్ ఫుల్ హ్యూమన్.. సో బాడ్లీ మిస్ యు నాన్న. ఐ లవ్ యు సో మచ్ (Happy happy birthday to d best father, best husband n a wonderful human❤️�� sooooo badly miss u nana.. �� i love u sooo much..)’ అంటూ కూతురు నిష్క భావోద్వేగంతో తండ్రిని గుర్తు చేసుకుందని అలేఖ్యారెడ్డి ఇన్‌స్టాలో పోస్ట్ పెట్టారు.

ఈ పోస్టుల్ని చూసి నెటిజన్లు ధైర్యంగా ఉండాలని అలేఖ్యారెడ్డిని ప్రస్తావిస్తూ కామెంట్స్ చేస్తున్నారు. ఆ దేవుడు మరింత ధైర్యాన్ని ఇవ్వాలని ఆకాంక్షించారు. 'ఆ ముగ్గురు పిల్లలకు తల్లి అయినా, తండ్రి అయినా మీరే' అంటూ ధైర్యం చెప్పారు. 'తారకరత్న చాలా మంచివాడు అని తలిచి దేవుడు తన దగ్గరకి తీసుకున్నాడు.. కానీ ఆయన్ని నమ్ముకున్న కొన్ని ప్రాణాలు ఈ రోజు ముగబోయి ఉన్నాయి.. ఆ బాధ ఎంత మంది మనోధైర్యం ఇచ్చిన సరే అది తీర్చలేనిది.. ఆయన భార్య ఇప్పుడే చాలా దైర్యంగా ఆ పిల్లలకి కొండంత భరోసా ఇవ్వాలి.. తన తండ్రి జ్ఞాపకాలను అనుక్షణం మీతోనే ఉండేలా ఆ పిల్లలకి చెప్పండి.. ఆయన మరణం ఒక చిరస్మరణీయంగా మారేలా చేయండి' అన్నారు మరో నెటిజన్.

నందమూరి తారకరత్న ఈ నెల 18న బెంగళూరులోని నారాయణ హృదయాలయలో కన్నుమూశారు. జనవరి 27న నారా లోకేష్ పాదయాత్రలో గుండెపోటు రావడంతో హుటాహుటిన కుప్పంలోని ఆస్పత్రికి తరలించి వైద్యం అందించారు. మెరుగైన వైద్యం కోసం అక్కడి నుంచి బెంగళూరుకు తరలించగా.. అక్కడి చికిత్సపొందుతూ తుదిశ్వాస విడిచారు.