టీడీపీ నాయకుడి ట్రాక్టర్‌కు నిప్పు పెట్టిన దుండగులు,,,ఆగ్రహం వ్యక్తంచేసిన చంద్రబాబు
Andhra Pradesh Telugu | Suryaa Desk | Published : Sat, Feb 25, 2023, 12:48 PM
ఏపీలో టీడీపీ వర్సెస్ వైసీపీ అన్నట్లుగా దాడులు సాగుతున్నాయి. పల్నాడు జిల్లాలో రాజకీయం రోజు రోజుకూ వేడెక్కుతోంది. అధికార, ప్రతిపక్ష పార్టీల నాయకుల మధ్య ఫైట్ కొనసాగుతోంది. తాజాగా.. పల్నాడు జిల్లా కారంపూడి మండలం మిరియాల గ్రామంలో.. శుక్రవారం అర్ధరాత్రి టీడీపీతి చెందిన బత్తుల ఆవులయ్య ట్రాక్టరుకు దుండగులు నిప్పు పెట్టారు. దీనిపై టీడీపీ ఆగ్రహం వ్యక్తం చేస్తోంది. ఇది వైఎస్సార్సీపీ కార్యకర్తల పనే అని ఆరోపిస్తోంది.
మిరియాల గ్రామంలో పోతులూరి వీరబ్రహ్మేంద్రస్వామి ఆలయ ధ్వజస్తంభ ప్రతిష్ఠను పురస్కరించుకుని.. శుక్రవారం సాయంత్రం టీడీపీ నియోజకవర్గ ఇంఛార్జ్ ని ఆవులయ్యకు చెందిన ట్రాక్టర్‌పై ఊరేగింపుగా తీసుకొచ్చారు. కార్యక్రమం తర్వాత.. ట్రాక్టరును చెరువు కట్ట వద్ద నిలిపి ఉంచారు. అర్ధరాత్రి సమయంలో.. కొందరు వైసీపీ కార్యకర్తలు డీజిల్‌ పోసి నిప్పంటించారని బాధితుడు ఆరోపించారు. స్థానికులు మంటలార్పేందుకు ప్రయత్నించినప్పటికీ ఫలితం లేకపోయింది. ట్రాక్టర్ పూర్తిగా కాలిపోయిందని ఆవులయ్య చెప్పారు.
ఈ ఘటనపై తెలుగుదేశం పార్టీ చీఫ్ చంద్రబాబు నాయుడు ఘాటుగా రియాక్ట్ అయ్యారు. 'వీళ్లసలు మనుషులేనా? ఉదయం లేచింది మొదలు తగలబెట్టడం.. పగలగొట్టడం.. ఇదే పనా? వైసీపీ సైకోలకు కళ్ల ముందు భవిష్యత్ ఓటమి కనిపించడమే ఈ ఫ్రస్ట్రేషన్‌కు కారణం. పల్నాడులో టీడీపీ ఇంఛార్జ్‌ని ట్రాక్టర్ మీద ఊరేగింపుగా తెచ్చారని... దాన్ని తగలబెట్టడం నీచమైన చర్య' అని చంద్రబాబు నాయుడు ట్వీట్ చేశారు.
|
|