ఇజ్రాయేల్‌కు కేరళ రైతు ప్రతినిధి బృందం,,,పది రోజుల తర్వాత క్షేమంగా స్వదేశానికి

కేరళ రైతు మిస్సింగ్ కథ చివరికి సుఖాంతంగా మారింది. ఇజ్రాయేల్‌ అనుసరించే వ్యవసాయ విధానాన్ని అధ్యయానికి వెళ్లి అదృశ్యమైన కేరళ రైతు సోమవారం క్షేమంగా భారత్‌కు చేరుకున్నాడు. వ్యవసాయంతో ఇజ్రాయేల్ రైతులు ఆధునిక సాంకేతికత సాయంతో వ్యవసాయం చేస్తున్న తీరును పరిశీలించడానికి కేరళ ప్రభుత్వం 27 మంది రైతులతో కూడిన బృందాన్ని ఐదు రోజుల పర్యటన కోసం ఫిబ్రవరి 12న అక్కడకు పంపింది. అక్కడకు వెళ్లిన తర్వాత బిజు కురియన్ (48) అనే రైతు ఫిబ్రవరి 17న అదృశ్యమయ్యాడు. అయితే, తాను క్షేమంగానే ఉన్నానని, తన గురించి వెతకవద్దంటూ కేరళలోని తన కుటుంబానికి ఫోన్‌ చేశాడు.

అయితే అక్కడ స్థిరపడేందుకు బిజు తప్పించుకుని వెళ్లిపోయాడని రైతు బృందం ఆరోపించింది. కానీ, అనూహ్యంగా ఆయన సోమవారం ఉదయం 5 గంటలకు కాలికట్ అంతర్జాతీయ విమానాశ్రయంలో దిగాడు. అనంతరం మీడియాతో మాట్లాడుతూ.. తాను చేసిన పనికి కేరళ ప్రభుత్వం, వ్యవసాయ శాఖ మంత్రి ప్రసాద్, తనతో వచ్చిన రైతు ప్రతినిధుల బృందానికి క్షమాపణలు చెప్పాడు. ఇజ్రాయేల్‌లోని పవిత్ర ప్రదేశాలు జెరూసలెం, బెథ్లహామ్‌‌ను చూడటానికి వెళ్లినట్టు తెలిపాడు. తాను తప్పిపోయానని మీడియాలో వచ్చిన కథనాల గురించి తెలుసుకున్నానని, తరువాత ఏమి చేయాలో తనకు తెలియరాలేదని రైతు పేర్కొన్నాడు.

తన ఫోన్‌లో ఇంటర్‌నెట్‌, ఇంటర్నేషనల్‌ కాలింగ్‌ సౌకర్యం లేకపోవడంతో వేరొకరి సాయంతో తాను క్షేమంగా ఉన్నానని కుటుంబసభ్యులకు తెలియజేసినట్లు తెలిపారు. తన సోదరుడి సాయంతో భారత్‌కు చేరుకున్నట్టు బిజు వివరించాడు. వీసా కాలపరిమితి మే 8 వరకే ఉందని, నేను తిరిగి రావడం వెనుక ఎటువంటి అక్రమం లేదన్నారు. ఇటీవల రైతు మిస్సింగ్‌‌పై కేరళ వ్యవసాయ శాఖ మంత్రి పి ప్రసాద్ ఇటీవల స్పందిస్తూ.. ఈ ఘటనపై ప్రభుత్వం దర్యాప్తు చేపట్టిందని తెలిపారు. రైతు బృందంలోకి అతడు ఎలా చేరాడన్నది ఆరా తీస్తున్నామని, ఇలా జరిగి ఉండకూడదని. తమ ప్రభుత్వానికి సిగ్గుచేటుగా ఉందని వ్యాఖ్యానించారు.

ఇదిలావుంటే కన్నూర్ జిల్లాకు చెందిన రైతు బిజు కురియన్ ఇజ్రాయెల్‌లో రైతు బృందం బస చేసిన హెర్జీలియా నగరంలోని హోటల్‌ నుంచి గత శుక్రవారం మాయమయ్యాడు. ఆ బృందానికి నేతృత్వం వహించిన వ్యవసాయ కార్యదర్శి బి అశోక్‌ దీనిపై భారత ఎంబసీకి సమాచారం ఇచ్చారు. దీంతో కేసు నమోదు చేసిన ఇజ్రాయెల్‌ పోలీసులు అదృశ్యమైన రైతు ప్రతినిధి కోసం గాలింపు చేపట్టారు. కానీ, అతడు క్షేమంగా భారత్‌కు తిరిగి రావడంతో కథ సుఖాంతమయ్యింది.