నంద్యాల జిల్లాలో కలకలం... గ్రామంలోకి వచ్చిన నాలుగు పెద్దపులి పిల్లలు

అడవుల్లో ఉండాల్సిన పుల్లి పిల్లలు కాస్త గ్రామాల్లోకి వచ్చాయి. నంద్యాల జిల్లాలో పెద్ద పులి పిల్లలు గ్రామంలో ప్రత్యక్షం కావడంతో అందరూ అవాక్కయ్యారు. కొత్తపల్లి మండలం పెద్దగుమ్మడాపురం శివారులో ఈ పిల్లలు కనిపించిన సమయం నుంచి స్థానికులు భయం, భయంగా గడుపుతున్నారు. ఈ పిల్లల కోసం తల్లి ఊరిలోకి వస్తే పరిస్థితి ఏంటని వణికిపోతున్నారు. జనాలు తీవ్ర ఆందోళనలో ఉన్నారు. ఆ ఊరి సమీపంలో అటవీ ప్రాంతం ఉండటంతో ఇంట్లో నుంచి బయటకు రావాలంటనే భయపడుతున్నారు.

పొలాలవైపు వెళ్లాలంటేనే రైతులు, వ్యవసాయ కూలీలు, పశువుల కాపరులు భయపడుతున్నారు. పులి గ్రామంలోకి రాకుండా అటవీ అధికారులు చర్యలు తీసుకోవాలని కోరుతున్నారు. చిన్నగుమ్మడాపురం, ముసలిమడుగు జనాలు కూడా ఆందోళన వ్యక్తం చేస్తున్నారు. అంతేకాదు పెద్ద పులి పిల్లలు దొరికిన పెద్దగుమ్మడాపురానికి సమీపంలో నల్లకాలువ, పాములపాడు, భానుముక్కుల సమీపంలో వారం క్రితం పులి సంచరించింది. దీంతో అక్కడి జనాలు కూడా భయపడుతున్నారు.

పులి పిల్లలు దొరికిన ప్రాంతానికి సమీపంలోనే స్థానికులు పశువులను కట్టేస్తున్నారు.. ఒకవేళ అక్కడికి వెళ్లిన సమయంలో పులి దాడి చేస్తే పరిస్థితేంటి అని ప్రశ్నిస్తున్నారు. పశువులకు మేత వేసేందుకు వెళ్లాలన్నా భయంగా ఉందని స్థానికులు అంటున్నారు. తమకు రక్షణ కావాలంటున్నారు. ఆ చుట్టుపక్కల గ్రామాల్లో ఉండేవారి పరిస్థితి కూడా అలాగే ఉంది.

ఆత్మకూరు అటవీ డివిజన్ పెద్ద గుమ్మడాపురం సమీపంలో నాలుగు పులి పిల్లలను స్థానికులు గుర్తించారు. ఆ పులి పిల్లలను పట్టుకుని గ్రామంలోని ఓ ఇంట్లో భద్రపరిచారు. అనంతరం అటవీశాఖ అధికారులకు సమాచారం ఇచ్చారు. వారు గ్రామానికి చేరుకుని పులి పిల్లలను స్వాధీనం చేసుకున్నారు. ఫారెస్ట్ సిబ్బంది కూడా పులి పిల్లల విషయంలో ఎటూ తేల్చులేకపోతున్నారు. అటవీ ప్రాంతంలో వదిలేయాలా.. జూకు తరలించాలా అన్న సందిగ్ధంలో ఉన్నారు.

మరోవైపు ఎండలు ఎక్కువగా ఉండటంతో పులి పిల్లలు డీహైడ్రేషన్‌కు గురికావడంతో బైర్లటి వైల్డ్ వెటర్నరీ ఆస్పత్రికి తరలించారు. నాలుగు పిల్లల్లో నాలుగు ఆడ పిల్లలుగా గుర్తించారు. పిల్లల ఆరోగ్య పరిస్తితి మెరుగు పడ్డాక తల్లి పిల్లలను కలిపే ప్రయత్నం చేస్తామంటున్నారు ఫారెస్ట్ సిబ్బంది. అలాగే గ్రామ ప్రజలు అప్రమత్తంగా ఉండాలని అటవీ శాఖ అధికారులు సూచించారు. పిల్లలు దొరికిన ప్రాంతంలో టైగర్ ట్రాకర్ కెమెరాలు ఏర్పాటు చేశామని.. పులి పిల్లలు దొరికిన ప్రాంతానికి తల్లి మళ్లీ వస్తుందని భావిస్తున్నామన్నారు. ఈ నాలుగు పులి పిల్లలకు, పాలు ఆహారం అందించినా ఏవి తినడం లేదన్నారు అటవీశాఖ అధికారులు. 24 గంటలు గడిచినా తల్లి పులి జాడ లేకపోవడంతో.. అధికారులు ఒకటి, రెండు రోజులు చూసిన తర్వాత కూడా తల్లి రాకపోతే వాటిని తిరుపతి జూకు తరలించాలని భావిస్తున్నారు.