రాజ్యాధికారాన్ని అర్థించటం కాదు.. పోరాడి సాధించుకోవాలి... బీసీలకు పవన్ పిలుపు

ఇన్నేళ్లుగా బీసీల సమైక్యత ఎందుకు సాధ్యం కాలేదో ఇప్పటికీ అర్థం కావట్లేదని జనసేన అధినేత పవన్ కళ్యాణ్ అన్నారు. వెనకబడ్డ కులాల (బీసీలు) వారు రాజ్యాధికారాన్ని అర్థించటం కాదు.. పోరాడి సాధించుకోవాలని ఆయన పిలుపునిచ్చారు. ఈ మేరకు మంగళగిరిలోని జనసేన పార్టీ కార్యాలయంలో శనివారం ఏర్పాటు చేసిన బీసీ సదస్సులో పవన్ కళ్యాణ్ పాల్గొని మాట్లాడారు. అన్ని బీసీ కులాలు కలిస్తే ఆంధ్రప్రదేశ్‌లో రాజ్యాధికారం ఇంకెవ్వరికీ దక్కదన్నారు.

గతంలో 93 ఉన్న బీసీ కులాలు ఇప్పుడు 140కి ఎందుకు పెరిగాయని పవన్ కళ్యాణ్ ప్రశ్నించారు. భారత రాష్ట్ర సమితి (బీఆర్ఎస్) పార్టీ ఆంధ్రప్రదేశ్‌కి వస్తే జనసేన పార్టీ ఆహ్వానించిందని గుర్తుచేశారు. మరి, తెలంగాణలో 26 కులాలను బీసీల జాబితా నుంచి తొలగించడంపై బీఆర్ఎస్ స్పందించాలని డిమాండ్ చేశారు. అన్యాయంపై బీఆర్ఎస్ వివరణ ఇవ్వాలన్నారు. అలాగే, బీసీ కులాల తొలగింపుపై ఏపీలోని అధికార వైఎస్సార్ కాంగ్రెస్ పార్టీ, విపక్ష తెలుగు దేశం పార్టీలు స్పందించాలని డిమాండ్ చేశారు.

బీసీలకు జనసేన పార్టీ అండగా ఉంటుందని పవన్ కళ్యాణ్ అన్నారు. చట్టసభల్లో సంఖ్యా బలం లేని బీసీలకు ఏం చేయగలం అనే దానిపై ఆలోచిస్తానని వెల్లడించారు. మీ ఓట్లే మీకు పడవని బీసీలను హేళన చేస్తున్నారని తెలిపారు. బీసీ అభ్యర్థిని నిలబెట్టినప్పుడు అందరూ ఏకతాటిపైకి రావాలన్నారు. తనను ఒక కులానికి పరిమితం చేసి బీసీ నాయకులతో తిట్టిస్తున్నారని చెప్పారు. తనను బీసీలతో తిట్టిస్తే రెండు వర్గాల వారు గ్రామస్థాయిలో ఘర్షణకు దిగుతారని ఆందోళన వ్యక్తం చేశారు. తాను ఒక కులానికి మాత్రమే నాయకుడిని కాదని.. ప్రజలందరికీ నాయకుడిగా ఉండాలని అనుకుంటున్నానని పవన్‌ కళ్యాణ్‌ తెలిపారు.