ఇది దేశం గర్వించిన రోజు,,,ఆర్ఆర్ఆర్ కు ప్రధాని మోదీ ప్రశంస

ఆర్ఆర్ఆర్ సినిమాలోని నాటు నాటు పాటకు ప్రతిష్టాత్మక ఆస్కార్ అవార్డు రావటంపై రాజకీయ ప్రముఖులు ప్రశంసలు కురిపిస్తున్నారు. ఈ క్రమంలో ప్రధాని నరేంద్ర మోదీ ఆర్ఆర్ఆర్ టీమ్‌కు శుభాకాంక్షలు తెలిపారు. ప్రత్యేకంగా కీరవాణి, చంద్రబోస్‌కు ప్రత్యేక శుభాకాంక్షలు తెలిపారు. నాటు నాటు పాట అమోఘమన్న మోదీ.. ఇది దేశం గర్వించిన రోజని కొనియాడారు. బెస్ట్ డాక్యుమెంటరీ షార్ట్ ఫిల్మ్ కేటగిరిలో ఆస్కార్ అందుకున్న ది ఎలిఫెంట్ విస్పరస్ బృందానికి కూడా ప్రధాని శుభాకాంక్షలు తెలిపారు. మరోవైపు.. ఏఐసీసీ నేత రాహుల్ గాంధీ సైతం స్పందించారు. నాటు నాటు పాటకు దేశమే కాదు.. ప్రపంచమే కాలు కదిపించంటూ ప్రశంసించారు.

నాటు నాటు పాటకు ఆస్కార్ రావటంపై తెలంగాణ సీఎం కేసీఆర్ స్పందించారు. తెలుగువారికి ఆస్కార్ రావటం గర్వకారణమన్నారు కేసీఆర్. ఆస్కార్ అవార్డు పొందిన నాటు నాటు పాటలో పొందు పరిచిన పదాలు.. తెలంగాణ సంస్కృతికి, తెలుగు ప్రజల రుచి అభిరుచికి, ప్రజా జీవన వైవిధ్యానికి అద్దం పట్టాయని సిఎం అన్నారు. తెలుగు భాషలోని మట్టి వాసనలను, ఘాటును, నాటు పాట ద్వారా గొప్పగా వెలుగులోకి తెచ్చిన పాట రచయిత, నాటి ఉమ్మడి వరంగల్ నేటి జయ శంకర్ భూపాలపల్లి జిల్లా చిట్యాల మండలంలోని చల్లగరిగె గ్రామ బిడ్డ చంద్రబోస్‌ను సీఎం కేసీఆర్ ప్రత్యేకంగా అభినందించారు.

సంగీత దర్శకుడు ఎంఎం కీరవాణి కి, కూర్పులో భాగస్వాములైన దర్శకుడు రాజమౌళి, గాయకులు రాహుల్ సిప్లిగంజ్, కాలభైరవ, నటులు రామ్ చరణ్, జూనియర్ ఎన్టీఆర్, కొరియోగ్రాఫర్ ప్రేమ్ రక్షిత్, సినిమా నిర్మాత డివివి దానయ్య, ఇతర సాంకేతిక సిబ్బందికి సీఎం కేసీఆర్ ఈ సందర్భంగా కేసిఆర్ శుభాకాంక్షలు తెలిపారు. నిర్మాణ విలువల పరంగాను, సాంకేతికంగాను హాలీవుడ్‌కు ఏమాత్రం తీసిపోని విధంగా తెలుగు సినిమా పరిశ్రమలో చిత్రాలు రూపొందుతుండటం గొప్ప విషయమని సీఎం అన్నారు.

ఆస్కార్ అవార్డుతో తెలంగాణ కేంద్రంగా, హైదరాబాద్ గడ్డమీద దినదినాభివృద్ధి చెందుతున్న తెలుగు సినిమా పరిశ్రమ కీర్తి దిగంతాలకు వ్యాపించిందని సీఎం పేర్కొన్నారు. ఈ అవార్డు తెలంగాణ, ఆంధ్ర ప్రదేశ్ లకే కాకుండా, తెలుగు, ద్రావిడ భాషలకు, యావత్తు భారత దేశానికి గర్వకారణం అన్నారు.

ప్రపంచవ్యాప్తంగా వున్న తెలుగు సినీ ప్రేక్షకులకు ఇది పండుగరోజనీ.. తెలుగు సినిమా పరిశ్రమ ఎదుగుదలకు తెలంగాణ ప్రభుత్వ కృషి ఫలించిందని ఆనందం వ్యక్తం చేశారు. తెలుగు సినీపరిశ్రమ అభివృద్ధి, విస్తరణకు తెలంగాణ రాష్ట్ర ప్రభుత్వం తోడ్పాటునందిస్తున్నదనీ, కరోనా కాలంలో కష్టాలు చుట్టిముట్టిన తెలుగు సినిమా పరిశ్రమకు ప్రత్యేకంగా ప్రోత్సాహకాలు అందించిన విషయాన్ని సీఎం ఈ సందర్భంగా గుర్తు చేసుకున్నారు. ఆస్కార్ అవార్డు స్ఫూర్తితో తెలుగు సినిమా పరిశ్రమ భవిష్యత్తులోనూ ఇదే ఒరవడిని కొనసాగించాలని, వైవిద్యంతో కూడిన కథలతో, ప్రజా జీవితాలను ప్రతిబింబించే సినిమాలు మరిన్ని రావాలని, సీఎం కేసీఆర్ ఆకాంక్షించారు.

మంత్రి కేటీఆర్ సైతం.. ఆర్ఆర్ఆర్ టీమ్‌కు శుభాకాంక్షలు తెలిపారు. నాటునాటు పాటకు ఆస్కార్ రావటం పట్ల కోట్ల మంది భారతీయులు సెలెబ్రేట్ చేసుకుంటున్నారని తెలిపారు. రాజమౌళి దేశాన్ని గర్వపడేలా చేశారన్నారు. చరిత్ర సృష్టించిన.. ఎంఎం కీరవాణి, లిరిసిస్ట్ చంద్రబోస్‌కు ప్రత్యేక అభినందనలు తెలిపారు. ఎన్టీఆర్, రాంచరణ్‌కు కూడా ప్రత్యేక శుభాకాంక్షలు తెలిపారు కేటీఆర్. ది ఎలిఫెంట్ విస్పరస్ టీమ్‌కు కూడా కేటీఆర్ అభినందనలు తెలిపారు కేటీఆర్.