ఆర్ఎస్ఎస్ గురించి వాల్ స్ట్రీట్ జర్నల్ కథనంలో ప్రస్తావన

ప్రపంచంలోనే బీజేపీ అత్యంత ముఖ్యమైన విదేశీ రాజకీయ పార్టీ అని ప్రముఖ పత్రిక వాల్ స్ట్రీట్ జర్నల్‌ కథనం పేర్కొంది. ‘అమెరికా జాతీయ ప్రయోజనాల దృక్కోణంలో భారత్‌లోని పాలక భారతీయ జనతా పార్టీ ప్రపంచంలోనే అత్యంత ముఖ్యమైన విదేశీ రాజకీయ పార్టీ.. ఇది కనీసం అర్థం చేసుకోలేనిది కూడా కావచ్చు’ అని వాల్ స్ట్రీట్ జర్నల్ కథనం వ్యాఖ్యానించింది. వరుసగా 2014, 2019 సార్వత్రిక ఎన్నికల్లో విజయం సాధించిన ఆ పార్టీ.. 2024లోనూ విజయాన్ని అందుకునే దిశగా ముందుకు వెళ్తోందని పేర్కొంది. ఇండో-పసిఫిక్‌లో జపాన్‌తో కలిసి ప్రబల ఆర్థిక శక్తిగా ఎదుగుతోందని.. రాబోయే కాలంలో పెరుగుతున్న చైనా ప్రాబల్యాన్ని అడ్డుకోడానికి అమెరికాకు భారత్ సహాయం ఎంతో అవసరమని తెలిపింది.

భారతీయులు కాని చాలా మందికి తెలియని రాజకీయ, సాంస్కృతిక చరిత్ర నుంచి బీజేపీ అభివృద్ధి చెందుతుందోని రచయిత మీడ్ అభిప్రాయపడ్డారు. జాతీయ పునరుద్దరణలో భాగంగా ఆధునీకరణకు విలక్షణమైన ‘హిందూ మార్గాన్ని’ రూపొందించడానికి అనేక తరాలుగా సామాజికవేత్తలు, కార్యకర్తలు చేసిన ప్రయత్నాల ఆధారంగా ఎన్నికల్లో ఆ పార్టీ ఆధిపత్యం చెలాయిస్తోందని వాల్ స్ట్రీట్ జర్నల్ పేర్కొంది.

‘ముస్లిం సోదరబావం సహా పాశ్చాత్య ఉదారవాదం ఆలోచనలు, ప్రాధాన్యతల వంటి ముఖ్యమైన అంశాలను బీజేపీ తిరస్కరిస్తోంది.. చైనా కమ్యూనిస్ట్ పార్టీ మాదిరిగా బిలియన్ కంటే ఎక్కువ మంది జనాభా ఉన్న భారత్ ప్రపంచ సూపర్ పవర్‌గా ఎదగాలని భావిస్తోంది. ఇజ్రాయేల్‌లోని లికుడ్ పార్టీ మాదిరిగానే బీజేపీ కూడా ప్రజాదరణ పొందిన వాక్చాతుర్యం, సంప్రదాయవాద విలువలతో మార్కెట్ అనుకూల ఆర్థిక వైఖరిని మిళితం చేస్తోంది’ అని వ్యాఖ్యానించింది.

‘అమెరికన్ విశ్లేషకులు ముఖ్యంగా వామపక్ష-ఉదారవాదులు తరచూ నరేంద్ర మోదీ నాయకత్వంలోని భారతదేశాన్ని చూసి అది డెన్మార్క్ లాగా ఎందుకు లేదని ప్రశ్నిస్తారు. వారి ఆందోళనల్లో పూర్తిగా తప్పు లేదు. అధికార పార్టీని విమర్శించే జర్నలిస్టులు దారుణమైన వేధింపులు ఎదుర్కొంటున్నారు. బీజేపీ పునరుత్థాన హిందూ అహంకారాన్ని నిలదీస్తే మతపరమైన మైనారిటీలు హింసకు పాల్పడుతున్నారని మాట్లాడుతుంది.. మత మార్పిడి వ్యతిరేక చట్టాలు మూకుమ్మడి హింస వంటి అధికారిక చర్యలను సూచిస్తాయి.. రాష్ట్రీయ స్వయంసేవక్ సంఘ్ లేదా ఆర్‌ఎస్‌ఎస్ అధికారానికి చాలా మంది భయపడుతున్నారు.. ఇది బీజేపీ రాజకీయ సిద్ధాంతకర్త’ అని మీడ్ అన్నారు.

ఏది ఏమైనప్పటికీ భారతదేశం ఒక సంక్లిష్టమైన ప్రదేశమని మీడ్ నమ్ముతారు. ‘ఈశాన్య భారతంలోని క్రైస్తవులు అధికంగా ఉన్న రాష్ట్రాల్లో ఇటీవలి బీజేపీ అత్యంత అద్భుతమైన విజయాలు అందుకుంది.. దాదాపు 200 మిలియన్ల జనాభా ఉన్న ఉత్తర్ ప్రదేశ్‌లోని బీజేపీ ప్రభుత్వం షియా ముస్లింల నుంచి బలమైన మద్దతును పొందుతోంది. కుల వివక్షకు వ్యతిరేకంగా పోరాట ప్రయత్నాల్లో ఆర్‌ఎస్‌ఎస్ కార్యకర్తలు గణనీయమైన పాత్ర పోషించారు’ అని అభిప్రాయపడింది.

బీజేపీ సీనియర్లు, ఆర్‌ఎస్‌ఎస్ నాయకులు సహా వారి విమర్శకులలో కొంతమందితో మాట్లాడిన తరువాత సాధారణంగా సంక్లిష్టమైన, శక్తివంతమైన ఉద్యమంతో మరింత లోతుగా అమెరికన్లు, పాశ్చాత్యులు నిమగ్నమవ్వాలని నేను నమ్ముతున్నాను’ అని మీడ్ రాశారు. ‘చాలా వరకు అట్టడుగున ఉన్న మేధావులు, మతపరమైన ఔత్సాహికులతో బహుశా ‘ప్రపంచంలో అత్యంత శక్తివంతమైన పౌర-సమాజ సంస్థ’గా ఆర్ఎస్ఎస్ మారింది. గ్రామీణ, పట్టణాభివృద్ధి కార్యక్రమాలు, మతపరమైన విద్య, పునరుజ్జీవన ప్రయత్నాలు, పౌరుల క్రియాశీలతలో అన్ని వర్గాలకు చెందిన వేలాది మంది వాలంటీర్ల నిమగ్నమవుతున్నారు. రాజకీయ స్పృహను కలిగించడం, లక్షలాది ప్రజల శక్తిని కేంద్రీకరించడంలో విజయం సాధించింది’ వాల్ స్ట్రీట్ జర్నల్ కథనంలో వివరించారు.

ఉత్తరప్రదేశ్ ముఖ్యమంత్రి యోగి ఆదిత్యనాథ్, ఆర్‌ఎస్‌ఎస్ చీఫ్ మోహన్ భగవత్‌తో తన సమావేశాన్ని మీడ్ గుర్తు చేసుకుంటూ.. ‘ఉద్యమం కీలక దశకు చేరుకున్నట్లు కనిపిస్తోంది. యూపీ ముఖ్యమంత్రి ఉన్న హిందూ సన్యాసి యోగి ఆదిత్యనాథ్‌ను నేను కలిసినప్పుడు ఒకటి అర్థమయ్యింది. తన రాష్ట్రానికి పెట్టుబడులు తీసుకురావడం, అభివృద్ధి చేయడం గురించి కొన్నిసార్లు ప్రధాని మోదీ వారసుడిగా మాట్లాడేవారు... అదేవిధంగా ఆధ్యాత్మికవేత్త మోహన్ భగవత్ భారతదేశ ఆర్థిక వృద్ధిని వేగవంతం చేయాల్సిన అవసరం గురించి మాట్లాడారు.. మతపరమైన మైనారిటీలు వివక్ష లేదా పౌర హక్కులను కోల్పోతున్నారనే అభిప్రాయాన్ని ఆయన తిరస్కరించారు.

ఒక విదేశీ జర్నలిస్టును ఉద్దేశించి అగ్రనేతలు చేసిన ప్రకటనలు అట్టడుగు స్థాయికి ఎలా చేరుతాయో ఊహించడం అసాధ్యం. కానీ ఒకప్పుడు అట్టడుగున ఉన్న ఉద్యమ నాయకత్వం తనను తాను ఎదుగుతున్న శక్తి సహజ స్థాపనగా నిలబెట్టుకోవాలనుకుంటుంది.. దాని సామాజిక, రాజకీయ పునాదిని కోల్పోకుండా బయటి ప్రపంచంతో లోతుగా, ఫలవంతంగా నిమగ్నమవ్వాలని చూస్తోందని నేను భావిస్తున్నాను..

బీజేపీ, ఆర్‌ఎస్‌ఎస్‌తో సంబంధాల కోసం వచ్చిన ఆహ్వానాన్ని అమెరికన్లు తిరస్కరించలేరు. చైనాతో ఉద్రిక్తతలు పెరుగుతున్నందున అమెరికాకు ఆర్థిక, రాజకీయ భాగస్వామిగా భారత్ అవసరం.. హిందూ జాతీయవాద ఉద్యమం భావజాలం, క్రమాన్ని అర్థం చేసుకోవడం భారతదేశంతో ఆర్థికంగా నిమగ్నమవ్వాలని కోరుకునే వ్యాపారవేత్తలు, పెట్టుబడిదారులకు ఎంత ముఖ్యమో... వ్యూహాత్మక సంబంధాన్ని స్థిరంగా ఉంచాలనుకునే దౌత్యవేత్తలు, విధాన రూపకర్తలకు కూడా అంతే ముఖ్యం’ అని వాల్ స్ట్రీట్ జర్నల్ కథనంలో మీడ్ పేర్కొన్నారు.