ఇదే దేవుడి స్క్రీప్ట్... వంగలపూడి అనిత

ఇటీవల జరిగిన ఎమ్మెల్పీ ఎన్నికల ఫలితాలు  దేవుడు రాసిన స్క్రీప్ట్ అని తెలుగు దేశం పార్టీ రాష్ట్ర మహిళా అధ్యక్షురాలు వంగలపూడి అనిత అన్నారు. టీడీపీ నుంచి గెలిచిన నలుగురు ఎమ్మెల్యేలను వైఎస్సార్ కాంగ్రెస్ పార్టీ లాక్కుందని.. ఇప్పుడు అదే ఆ పార్టీ నలుగురు ఎమ్మెల్యేలు తమ అభ్యర్థికి ఓటు వేయడంతో ఒక ఎమ్మెల్సీ స్థానాన్ని గెలిచామని.. ఇదే దేవుని స్క్రిప్ట్ అని ఎద్దేవా చేవారు. ఇక, టీడీపీ అభ్యర్థికి ఓటేశారంటూ వైసీపీ నుంచి సస్పెన్షన్‌కు గురైన ఎమ్మెల్యే ఉండవల్లి శ్రీదేవిని... ఊసరవెల్లి శ్రీదేవి అంటూ ఓ జోకర్ మంత్రి అంటున్నారని.. వారి కన్నా పెద్ద నటులు ఎవరు లేరని సెటైర్లు వేశారు.

ఇక, పేకాట క్లబ్బులు నడిపిన రాపాక వరప్రసాదరావు రూ. 10 కోట్ల కోసం మాట్లాడుతున్నారని.. అసలు ఆయనకు రూ. 10 వేలు ఇస్తే చాలని ఎద్దేవా వంగలపూడి అనిత ఎద్దేవా చేవారు. జబర్దస్త్ మేడం.. ఇటీవల జరిగిన పట్టభద్రుల ఎన్నికల్లో పులివెందుల నియోజకవర్గంలో టీడీపీ, వైసీపీకి ఎన్నెన్ని ఓట్లు వచ్చాయో చూస్కో అని రాష్ట్ర పర్యాటక శాఖ మంత్రి ఆర్కే రోజా సెల్వమణికి చురకలంటించారు.

అయినా, నలుగురు ఎమ్మెల్యేలను అప్పటికప్పుడు సస్పెండ్ చేసిన వైసీపీ.. ఎంపీ రఘురామ కృష్ణరాజును ఎందుకు సస్పెండ్ చేయలేదని వంగలపూడి అనిత సూటిగా ప్రశ్నించారు. ఇక, ఆంధ్రప్రదేశ్‌ రాష్ట్రాన్ని గతంలో అన్నపూర్ణగా పిలిచేవారని.. ఇప్పుడు గంజాయి ఆంధ్రప్రదేశ్‌గా చెప్పుకుంటున్నారని ఆరోపించారు. సైకో ముఖ్యమంత్రి వైఎస్ జగన్మోహన్ రెడ్డి సీట్‌లో కూర్చున్న తర్వాత.. రాష్ట్రాన్ని గంజాయి, హత్య, అత్యాచార ఆంధ్రప్రదేశ్‌గా చెప్పుకుంటున్నారని తీవ్ర వ్యాఖ్యలు చేశారు. ఈ విషయాన్ని ప్రజలు ఎవరితోనూ చెప్పుకోలేని పరిస్థితుల్లో ఉన్నారని పేర్కొన్నారు. ఈ ఆర్థిక సంవత్సరంలోనే 2.6 లక్షల కేజీల గంజాయి పట్టుకున్నరంటే... ఎంత విచ్చలవిడిగా రవాణా జరుగుతుందో అర్థమవుతోందన్నారు.

స్కూళ్లు, కాలేజీల్లో చదువుతున్న అమ్మాయిల చేతుల్లో గంజాయి దొరుకుతోందని వంగలపూడి అనిత అన్నారు. చివరికి పవిత్రమైన తిరుమలలో కూడా గంజాయి దొరుకుతున్న దౌర్భాగ్య స్థితిలో ఈ రాష్ట్రం ఉందని ఆవేదన వ్యక్తం చేశారు. వైసీపీ నాయకుల మద్దతుతో వచ్చిన ఉద్యోగులు మద్యం తాగుతూ దొరికారన్నారు. రాష్ట్రాన్ని మద్యాంధ్రప్రదేశ్‌, గంజాయి ఆంధ్రప్రదేశ్‌గా తీర్చిదిద్దడానికే సీఎం జగన్ ఒక్క ఛాన్స్ అడిగారా అని ప్రశ్నించారు.

ఇక, క్రిమినల్ రికార్డ్స్‌లో నేరాల్లో ఆంధ్రప్రదేశ్ నంబర్‌ 1గా ఉందని వంగలపూడి అనిత ఆందోళన వ్యక్తం చేశారు. పవిత్రమైన తిరుపతిలో కూడా గంజాయి, మద్యం దొరుకుతుందనే జగన్‌ను ఏ చెప్పుతో కొట్టాలో మీరే చెప్పాలని వ్యాఖ్యానించారు. గంజాయి మత్తులో యువత హత్యలకు పాల్పడుతున్నారని చెప్తుంటే.. కనీసం రివ్యూ కూడా నిర్వహించలేని దుస్థితిలో ఈ ప్రభుత్వం ఉందని ఆగ్రహం వ్యక్తం చేశారు. మధ్యనిషేదం అని చెప్పి.. ఇప్పుడు మద్యం నుంచి వచ్చిన డబ్బుతోనే ప్రభుత్వం నడుపుతున్నామని చెప్పడానికి సిగ్గు లేదా అని మండిపడ్డారు. ప్రభుత్వ వైఫల్యాల కోసం మాట్లాడితే.. తమపై పేటీఎం కుక్కలను పంపిస్తారని అనిత తీవ్ర వ్యాఖ్యలు చేశారు.