భక్తుల కోసం కొండపై ఉచిత ఎలక్ట్రిక్ బస్సులు

టీటీడీ రోజురోజుకు కొత్తకొత్త విధానాలను అమలు చేస్తోంది. తాజాగా తిరుమల భక్తులకు శుభవార్త. కొండపై సామాన్య భక్తుల సౌకర్యార్థం 10 ఉచిత ఎలక్ట్రిక్ బస్సులు ప్రారంభమయ్యాయి. టీటీడీ చైర్మన్ వై.వి. సుబ్బారెడ్డి సోమవారం (మార్చి 26) ఈ బస్సులను ప్రారంభించారు. మేఘా ఇంజినీరింగ్ & ఇన్‌ఫ్రాస్ట్రక్చర్స్ లిమిటెడ్ కు చెందిన ‘ఒలెక్ట్రా గ్రీన్ టెక్ లిమిటెడ్’ సంస్థ ఈ బస్సులను తయారు చేసింది. హైదరాబాద్ సమీపంలోని ప్లాంట్‌లో తయారుచేసిన ఈ బస్సులను టీటీడీకి కానుకగా అందజేసింది. తిరుమల కొండపై ఇప్పటికే ‘ధర్మరథం’ పేరుతో డీజిల్ బస్సులు భక్తుల కోసం ఉచిత సేవలు అందిస్తున్నాయి. ఇవి కూడా ఒలెక్ట్రా సంస్థ రూపొందించినవే కావడం విశేషం. కొండపై బస్టాప్, సత్రాల నుంచి ప్రధాన ఆలయానికి చేరుకునేందుకు భక్తులు ఈ బస్సులను వినియోగించుకుంటున్నారు. వీటికి అదనంగా 10 ఎలక్ట్రిక్ బస్సులు తోడయ్యాయి. అత్యాధునిక సాంకేతికతతో ఈ బస్సులను తయారు చేశారు. వీటి ఛార్జింగ్ కోసం కొండపైనే ‘ఛార్జింగ్ పాయింట్’ ఏర్పాటు చేయనున్నారు.

‘ఒక్కో బస్సు విలువ కోటి 80 లక్షల రూపాయలు ఉంటుంది. మొత్తం 18 కోట్ల విలువ చేసే 10 బస్సులను టీటీడీకి ఒలెక్ట్రా కంపెనీ విరాళంగా అందజేసింది. ధర్మరథాల పేరుతో సామాన్య భక్తుల సౌకర్యార్థం ఏర్పాటు చేసిన డీజిల్ బస్సుల స్థానంలో ఈ ఎలక్ట్రిక్ బస్సులు తిరుమలలో భక్తులను ఉచితంగా గమ్యస్థానాలకు చేరుస్తాయి’ అని టీటీడీ ఛైర్మన్ వైవీ సుబ్బారెడ్డి అన్నారు.

తిరుమలలో పర్యావరణ కాలుష్యం నివారించేందుకు ఎలక్ట్రిక్ వాహనాల వినియోగాన్ని ఏడాది కిందటే ప్రారంభించామని వైవీ సుబ్బారెడ్డి తెలిపారు. ఇందులో భాగంగా అధికారులు, సిబ్బందికి విధి నిర్వహణ కోసం ఎలక్ట్రిక్ కార్లను అందజేశామని తెలిపారు. సీఎం వైఎస్ జగన్ చొరవతో 65 ఎలక్ట్రిక్ బస్సులను ఏపీ ఆర్టీసీ నిత్యం తిరుపతి - తిరుమల మధ్య నడుపుతోందని ఆయన తెలిపారు. వీటికి అదనంగా పది ఎలక్ట్రిక్ బస్సుల ప్రారంభించడం సంతోషంగా ఉందని ఆయన అన్నారు.

తిరుమలలో ప్లాస్టిక్ వినియోగం తగ్గించేందుకు పకడ్బందీ చర్యలు చేపట్టామని వైవీ సుబ్బారెడ్డి ఈ సందర్భంగా తెలిపారు. లడ్డూ కౌంటర్లలో ప్లాస్టిక్ రహిత కవర్లనే వినియోగిస్తున్నామని, దీంతో పాటు తిరుమలలో ప్లాస్టిక్ వాటర్ బాటిల్స్‌ను పూర్తి స్థాయిలో నిషేధించామని తెలిపారు. రాబోయే రోజుల్లో తిరుమలలో పర్యావరణం కాపాడేందుకు మరిన్ని చర్యలు తీసుకోనున్నట్లు ఆయన తెలిపారు.

ఎంఈఐఎల్ గ్రూప్ అనుబంధ కంపెనీ ‘ఒలెక్ట్రా గ్రీన్ టెక్ లిమిటెడ్’ ఈ బస్సులను హైదరాబాద్ సమీపంలోని తన ప్లాంట్‌లో తయారుచేసింది. టీటీడీ మార్గదర్శకాలకు అనుగుణంగా రూపొందించిన తొలి బస్సును మార్చి 2న దేవస్థాన రవాణా విభాగం జనరల్ మేనేజర్ పీవీ శేషారెడ్డి పరిశీలించారు. సిబ్బందితో కలిసి బస్సులో కొద్ది దూరం ప్రయాణించారు. పనితీరు పట్ల సంతృప్తి వ్యక్తం చేశారు. అనంతరం ఒలెక్ట్రా సంస్థ 10 బస్సులను తయారు చేసి తిరుమలకు పంపించింది.

9 మీటర్ల పొడవుండే ఈ బస్సులో 23 మంది సీట్లలో కూర్చొని ప్రయాణించవచ్చు. అదనంగా కొంత స్టాండింగ్ ఏరియా ఇచ్చారు. భక్తులకు పూర్తి భద్రతతో కూడిన ప్రయాణ సౌకర్యం అందించేలా బస్సును తయారు చేసినట్లు ఒలెక్ట్రా ప్రతినిధులు తెలిపారు. తిరుమల కొండపై భక్తులు శబ్ద, వాయు కాలుష్యంలేని ప్రయాణాన్ని ఆస్వాదించవచ్చని చెప్పారు. ఈ బస్సుల్లో ఎలక్ట్రానిక్ డిస్‌ప్లే బోర్డ్‌లు ఏర్పాటు చేశారు. ఎక్కడి నుంచి ఎక్కడికి ప్రయాణిస్తోందో తెలిపే వివరాలు డిస్‌ప్లే అవుతాయి. తిరుమల పవిత్రత, ప్రాశస్త్యాన్ని తెలిపే ఫోటోలను బస్సుపై పొందుపరిచారు. తిరుమలలో ప్రస్తుతం ఒలెక్ట్రా సంస్థకు చెందిన 12 డీజిల్ బస్సులు సేవలు అందిస్తుండగా.. ఏపీఎస్ ఆర్టీసీ ఆధ్వర్యంలో మరో 50 ఒలెక్ట్రా ఎలక్ట్రిక్ బస్సులు నిత్యం తిరుపతి, తిరుమల మధ్య నడుస్తూ.. భక్తులకు సేవలు అందిస్తున్నాయి.