రాజకీయ భవిష్యత్తుపై ,,,త్వరలో స్పష్టత ఇవ్వనున్న తాడికొండ ఎమ్మెల్యే

తాడికొండ ఎమ్మెల్యే ఉండవల్లి శ్రీదేవి ఏ పార్టీలో చేరతారు అన్న దానిపై రకరకాల ఊహాగానాలు వినిపించాయి. ఉండవల్లి శ్రీదేవి టీడీపీలో చేరతారని చాలా మంది భావించారు. కానీ.. తాజాగా ఊహించని ట్విస్ట్ వెలుగులోకి వచ్చింది. ఉండవల్లి శ్రీదేవి జనసేన పార్టీలో చేరే అవకాశం ఉందని ప్రచారం జరుగుతోంది. ప్రస్తుతం ఈ ఇష్యూ ఇప్పుడు ఏపీలో హాట్ టాపిక్‌గా మారింది.

2024 అసెంబ్లీ ఎన్నికల్లో.. టీడీపీ, జనసేన పార్టీలు పొత్తు పెట్టుకునే అవకాశం ఉందని.. ఆ పొత్తులో భాగంగా.. తాడికొండ సీటు జనసేనకి పోతుందని.. అందుకే శ్రీదేవిని జనసేన పార్టీలో చేరబోతున్నారనే టాక్ వినిపిస్తోంది. ఇప్పటివరకు అయితే.. టీడీపీ, జనసేన పొత్తు ఖరారు కాలేదు. కానీ.. ఒకవేళ అయితే మాత్రం తాడికొండ స్థానం జనసేన పార్టీకే వెళ్లే అవకాశం ఉంది. ఎందుకంటే.. అక్కడ కాపు ఓట్లు ఎక్కువగా ఉన్నాయని తెలుస్తోంది. ఇటీవల ఉండవల్లి శ్రీదేవి భర్త డాక్టర్ శ్రీధర్ కూడా దీనికి సంబంధించిన కీలక విషయాలు వెల్లడించారు.

తాడికొండ నియోజకవర్గంలో దాదాపు 15 వేల ‘కాపు’ ఓట్లు ఉన్నాయని.. వీటిని తీసుకొస్తే గెలుస్తామని వైసీపీ అధిష్టానం తమకు చెప్పిందని.. ఎమ్మెల్యే ఉండవల్లి శ్రీదేవి భర్త డాక్టర్ శ్రీధర్ వెల్లడించారు. తాము తీవ్రంగా కష్టపడితే.. వైసీపీకి కాపుల ఓట్లు 10 వేలు వస్తే.. జనసేనకు 5 వేలు పడ్డాయని వివరించారు. అందుకే 4 వేల మెజారిటీతో ఉండవల్లి శ్రీదేవి గెలిచారని స్పష్టం చేశారు. ఇటు.. శ్రీదేవి భర్త డాక్టర్ శ్రీధర్ కూడా కాపు సామాజికవర్గానికి చెందిన నేత. అందుకే అన్ని ఓట్లు వచ్చాయనే చర్చ జరుగుతోంది. అయితే.. శ్రీదేవి జనసేనలో చేరుతున్నట్టు అధికారిక ప్రకటన రాలేదు. కానీ.. సోషల్ మీడియాలో జోరుగా ప్రచారం జరుగుతోంది.

ఇక్కడిదాకా ఎలా ఉన్నా.. ఉండవల్లి శ్రీదేవి వైసీపీలో ఉన్నప్పుడు పవన్‌ ను ఘాటుగా విమర్శించారు. ఈ నేపథ్యంలో.. ఆయన శ్రీదేవిని పార్టీలోకి ఆహ్వానిస్తారా అన్నది ఆసక్తికరంగా మారింది. పవర్ లేని స్టార్ పవన్ కల్యాణ్ అంటూ ఆమె గతంలో ఎద్దేవా చేశారు. 2019 ఎన్నికల్లో తన లాంటి కొత్త వాళ్లే ముఖ్యమంత్రి జగన్మోహన్ రెడ్డి సారథ్యంలో గెలిచి అసెంబ్లీకి వెళ్తే.. పవన్ కళ్యాణ్ మాత్రం పోటీ చేసిన రెండు చోట్ల ఓడిపోయారని ఎమ్మెల్యే శ్రీదేవి సెటైర్లు వేశారు. 6 నెలలకు ఓసారి కనిపించే పవన్‌నాయుడు వల్ల.. జరిగేది ఏం లేదని శ్రీదేవి గతంలో వ్యాఖ్యానించారు.