అప్పటి వరకు భారత పౌరసత్వం లబించదు: స్పష్టంచేసిన కర్ణాటక హైకోర్టు

కర్ణాటక హైకోర్టులో ఓ ఆసక్తికర కేసు  విచారణకు వచ్చింది. దీంతో తీర్పు కూడా ఇపుడు చర్చాంశనీయంగా మారింది. భారత్‌కు చెందిన ఓ మహిళ, ఓ పాకిస్థాన్ యువకుడు 2002లో దుబాయ్‌‌లో వివాహం చేసుకున్నారు. వారికి ఇద్దరు పిల్లలు కలిగారు. చాలా ఏళ్లు కలిసి కాపురం చేశాక.. 2014లో వారిద్దరూ విడాకులు తీసుకున్నారు. యూఏఈ కోర్టులో కుదిరిన ఒప్పందం ప్రకారం మైనర్లయిన పిల్లల బాధ్యతను తల్లి తీసుకుంది. కానీ ఆ పిల్లలకేమో తండ్రి స్వదేశమైన పాకిస్థాన్ పౌరసత్వం ఉంది. తల్లితో కలిసి భారత్‌లో నివసించడం కోసం తమకు భారత పౌరసత్వం కావాలంటూ ఆ పిల్లలిద్దరూ దుబాయ్‌లోని ఇండియన్ కాన్సులేట్‌ను సంప్రదించారు. దీంతో పాకిస్థానీ పాస్‌పోర్టులను సరెండర్ చేయాలని కాన్సులేట్ ఆదేశించింది. ఈ విషయంలో తమకు అభ్యంతరాలేవీ లేవని పాకిస్థాన్ కాన్సులేట్ సైతం పేర్కొంది. అందుకు అనుగుణంగానే ఎన్వోసీ ఇచ్చింది.

2021లో తల్లితో సహా పిల్లలిద్దరూ భారత్‌కు వచ్చేయాలని అనుకున్నారు. కానీ వారికి భారత పాస్‌పోర్టు లేదు. భారత పౌరసత్వం కోసం వారు చేసుకున్న దరఖాస్తు హోం శాఖ వద్ద పెండింగ్‌లో ఉంది. దీంతో దుబాయ్‌లోని భారత కాన్సులేట్ వారికి అదే ఏడాది మే నెలలో తాత్కాలిక పాస్‌పోర్టులు అందించింది. ఈ పాస్‌పోర్టుల సాయంతో తల్లితో కలిసి బెంగళూరు వచ్చిన పిల్లలిద్దరూ ఇక్కడే ఉంటున్నారు. తాత్కాలిక పాస్‌పోర్టుల గడువు ముగియడంతో సంబంధిత అధికారులకు గత ఏడాదిగా అభ్యర్థనలు పంపుతున్నారు. కానీ వారి అభ్యర్థనలను ఎవరూ పట్టించుకోకపోవడంతో.. తమకు భారత పౌరసత్వం ఇవ్వాలని సంబంధిత అధికారులను ఆదేశించాలని కోరుతూ వారు కోర్టును ఆశ్రయించారు.

ప్రస్తుత పరిస్థితుల్లో పిల్లలకు ఎలాంటి గుర్తింపు లేదని పిటిషనర్ల తరఫున కౌన్సెల్ వాదనలు వినిపించారు. పాకిస్థాన్ చట్టాల ప్రకారం.. 21 ఏళ్లు వచ్చాకే పౌరసత్వాన్ని వదులుకోవడానికి వీలవుతుంది కాబట్టి.. భారత పౌరసత్వ చట్టం 1955 ప్రకారం ద్వంద్వ పౌరసత్వం ఇవ్వడం కుదరని ప్రభుత్వ లాయర్ వాదించారు. భారత పౌరుడు కావాలనుకునే వ్యక్తి ముందుగా వేరే దేశానికి చెందిన తన పౌరసత్వాన్ని వదులుకోవాలని ప్రభుత్వ లాయర్ తెలిపారు.

పిల్లలిద్దరూ పాకిస్థాన్ చట్టాల ప్రకారం ఇప్పటికీ ఆ దేశ పౌరసత్వాన్ని వదుకోలేదు, 21 ఏళ్లు వచ్చే వరకు వదులుకోవడం సాధ్యం కాదు కాబట్టి.. ఇప్పటికీ వారు పాకిస్థాన్ పౌరులేనని కోర్టు తెలిపింది. పాకిస్థాన్ పౌరసత్వాన్ని వదులుకోకుండా ఈ దేశ పౌరులు కాలేరని న్యాయస్థానం స్పష్టం చేసింది. ఈ పిల్లలకు పౌరసత్వం లేదు.. భూమి లేదు అనడం కాదు.. ఇప్పటికీ వారు పాకిస్థాన్ పౌరులేనని కోర్టు వెల్లడించింది. 21 ఏళ్లు వచ్చేంత వరకు ఆగి ముందుగా పాకిస్థాన్ పౌరసత్వాన్ని వదిలేసుకున్నాకే.. భారత పౌరసత్వం పొందగలుగుతారని ఇద్దరు పిల్లలకు కర్ణాటక హైకోర్టు స్పష్టం చేసింది. భారత పౌరసత్వం ఇవ్వాలని కేంద్ర హోం శాఖను తాము ఆదేశించలేమని వారికి కోర్టు తెలిపింది. పాకిస్థాన్ కాన్సులేట్‌లో పాస్‌పోర్టులు అప్పగించినంత మాత్రాన ఆ దేశ పౌరసత్వాన్ని వదిలేసుకున్నట్లు కాదని భారత ప్రభుత్వం స్పష్టం చేసింది.