తప్పుడు వార్తలు రాస్తున్నారు.. పేర్ని నాని

సీఎం జగన్‌పై కోడి కత్తి దాడి ఘటనలో తప్పుడు వార్తలు రాస్తున్నారని  వైఎస్సార్ కాంగ్రెస్ పార్టీ ఎమ్మెల్యే, మాజీ మంత్రి పేర్ని నాని ఆవేదన వ్యక్తం చేశారు. సీఎం జగన్‌పై హత్యాయత్నం జరిగిందని ఎన్‌ఐఏ అధికారులు, పోలీసులు కూడా ఒప్పుకున్నారని చెప్పారు. 

 ముఖ్యమంత్రి వైఎస్‌ జగన్మోహన్‌రెడ్డిని ఏదో ఒక విధంగా అప్రతిష్టపాలు చేసేందుకు తెలుగు దేశం పార్టీ అధినేత చంద్రబాబునాయుడు, ఆయన అనుకూల మీడియా అధిపతులు ప్రయత్నిస్తున్నారని ఆయన తీవ్ర ఆగ్రహం వ్యక్తం చేశారు. ఈ మేరకు శనివారం పేర్ని నాని మీడియాతో మాట్లాడుతూ.. సీఎం జగన్‌ను అపఖ్యాతిపాలు చేసేందుకు కక్షపూరితంగా కుట్రలు పన్నుతున్నారని ఆరోపించారు. 

అయితే, జగన్‌పై హత్యాయత్నం చేసింది వైసీపీకి చెందిన వ్యక్తే అంటూ దాడి జరిగిన గంట వ్యవధిలోనే అప్పటి డీజీపీ హడావిడిగా చెప్పేశారని పేర్ని నాని తెలిపారు. ఇప్పుడు ఆ దాడి ఘటనపై ఇష్టానుసారంగా తప్పుడు వార్తలు రాస్తున్నారని మండిపడ్డారు. ఎన్టీఆర్‌పై దాడి జరిగితేనే చంద్రబాబు అనుకూల మీడియాకు పెద్దవార్త అవుతుందని.. కానీ, సీఎం జగన్‌పై జరిగితే కావాలని చేయించుకుంటున్నారంటూ తప్పుడు రాతలు రాస్తున్నారని ఫైరయ్యారు.

చంద్రబాబు ముఖ్యమంత్రిగా ఉన్న సమయంలో అలిపిరిలో ఆయనపై దాడి జరిగినప్పుడు అప్పటి ప్రతిపక్ష నాయకుడు, మహానేత వైఎస్‌ రాజశేఖర్ రెడ్డి ఖండించారని పేర్ని నాని గుర్తు చేశారు. కానీ, సీఎం జగన్‌పై దాడి జరిగిన తర్వాత కనీసం పరామర్శించకుండా విమర్శలు చేశారన్నారని ఆక్షేపించారు. అసలు, పటిష్ట భద్రత ఉన్న ఎయిర్‌పోర్టు లోపలికి కోడి కత్తి ఎలా వచ్చిందని ప్రశ్నించారు. ఈ హత్యాయత్నం వెనుక ఎవరు ఉన్నారో వెల్లడించాలని అప్పట్లోనే కోర్టులో వైఎస్‌ జగన్‌ పిటిషన్‌ వేశారని గుర్తు చేశారు.

ఈ ఘటనపై విచారణ జరపాలని కోరడం తప్పా అని పేర్ని నాని నిలదీశారు. అసలు, విశాఖపట్నం పోలీసులను, ఎయిర్‌పోర్టు అధికారులను ఎవరు ప్రభావితం చేశారు? నిందితుడిని విచారించకుండానే స్టేట్‌మెంట్లు ఎలా ఇచ్చారు? అని ప్రశ్నించారు.

 ఇలాగైతే, అలిపిరిలో చంద్రబాబుపై జరిగిన హత్యాయత్నం కూడా డ్రామాయేనా అని పేర్ని నాని ప్రశ్నించారు. తీవ్రవాదులకు స్లీపర్ సెల్స్ ఎలా ఉంటారో చంద్రబాబుకు కూడా కొన్ని వ్యవస్థల్లో స్లీపర్ సెల్స్ ఉన్నారని ఆరోపించారు. అలాగే, మాజీ మంత్రి డీఎల్ రవీంద్రారెడ్డి వంటి నీచమైన వ్యక్తులతో కూడా మాట్లాడించి టీవీలో వేస్తున్నారని తప్పుబట్టారు. ఇదే సమయంలో గరుడపురాణం పేరుతో సినీ నటుడు శివాజీతో ఎవరు మాట్లాడించారో కూడా విచారణ జరపాలన్నారు. టీడీపీ కార్యకర్తలు ఏదో మిషన్‌తో రాజమండ్రి సెంట్రల్ జైలుకు వెళ్తున్నారని అనుమానం వ్యక్తం చేశారు. చంద్రబాబు నైజం ప్రజలకు ఆశ చూపటం, వంచించటం, ఓట్లు పొందటం అని దుయ్యబట్టారు. ఇక, చంద్రబాబు అనుకూల మీడియాలో ఎన్ని తప్పుడు వార్తలు రాసినా జనం నమ్మటం లేదని ఎద్దేవా చేశారు.