అతిక్ అహ్మద్ కిల్లర్స్ ముగ్గురికి ప్రాణహానీ,,,పోలీసులను హెచ్చరించిన నిఘా విభాగం

గ్యాంగ్‌స్టర్ అతిక్ అహ్మద్, అతని సోదరుడు అష్రఫ్‌లను కాల్చి చంపిన ముగ్గురు వ్యక్తులను.. భద్రతా కారణాల దృష్ట్యా ఉత్తరప్రదేశ్‌లోని మరొక జైలుకు తరలించారు. సన్నీ సింగ్, అరుణ్ మౌర్య, లవ్లేష్ తోవారీ.. ఈ ముగ్గురు.. గ్యాంగ్‌స్టర్ అతిక్‌ను పోలీసుల ఎదుటే కాల్చి చంపారు. వారిని పోలీసులు తొలుత ప్రయాగ్‌రాజ్‌లోని నైనీ జైలుకు తరలించారు. అయితే.. అక్కడ అతిక్ సోదరులను చంపిన నింధితులకు ప్రాణహాని ఉందని ఇంటెలిజెన్స్ అధికారులు పోలీసులను హెచ్చరించారు. దీంతో వారిని అక్కడినుంచి ప్రతాప్‌గఢ్ జైలుకు తరలించారు.

అతిక్ అహ్మద్, అతని సోదరుడిని ప్రయాగ్‌రాజ్‌లోని వారి గ్రామంలో ఆదివారం ఖననం చేశారు. అహ్మద్ ముఠాను నిర్మూలించడం ద్వారా.. తమకంటూ గుర్తింపు తెచ్చుకోవాలని భావించిన ముగ్గురు వ్యక్తులు.. మీడియాతో మాట్లాడుతున్న అతిక్‌ను కాల్చి చంపారు. దీనికి సంబంధించిన వీడియోలు వైరల్ అయ్యాయి. ఈ హత్యలపై నివేదిక సమర్పించేందుకు ఉత్తరప్రదేశ్ ప్రభుత్వం ముగ్గురు సభ్యుల న్యాయ విచారణ కమిటీ ఏర్పాటు చేసింది. వారికి రెండు నెలల గడువు ఇచ్చింది.

సంచలనం సృష్టించిన ఈ ఘటనపై విచారణకు.. యూపీ పోలీసులు రెండు ప్రత్యేక దర్యాప్తు బృందాలను (సిట్‌లు) ఏర్పాటు చేస్తున్నట్లు ప్రకటించారు. దుండగులు జర్నలిస్టులుగా నటించి.. అతిక్ సోదరుల దగ్గరకు వచ్చి కాల్పులు జరిపారు. హత్యానంతరం 'జై శ్రీరామ్' అంటూ నినాదాలు చేసి లొంగిపోయారు. కాల్పులు జరిపిన వారి నుంచి మూడు నకిలీ మీడియా ఐడీ కార్డులు, మైక్రోఫోన్, కెమెరాను స్వాధీనం చేసుకున్నట్లు పోలీసులు వెల్లడించారు.

అంతకు ముందు బుధవారం ఝాన్సీ జిల్లాలో జరిగిన ఎన్‌కౌంటర్‌లో.. అతిక్ కుమారుడు అసద్ అహ్మద్ హతమయ్యాడు. ఆ తర్వాత రెండ్రోజులకే అతిక్, అష్రఫ్‌ల హత్య జరిగింది. ఆదివారం అతిక్ అహ్మద్, అతని సోదరుడి పోస్ట్ మార్టం తర్వాత.. ప్రయాగ్‌రాజ్‌లోని వారి స్వగ్రామంలో ఖననం చేశారు. ఆయన కుమారులు అంత్యక్రియలు నిర్వహించారు. ఈ హత్యతో యూపీలోని పలు ప్రాంతాల్లో ఉద్రిక్త పరిస్థితులు నెలకొన్నాయి. దీంతో ఉత్తరప్రదేశ్ పోలీసులు ఆంక్షలు విధించారు. పలు ప్రాంతాల్లో ఇంటర్నెట్ సేవలు నిలిపివేశారు.