అతీక్ అహ్మద్ సోదరుల హత్యకు ప్రాణాళిక...మొత్తం కథనంతా సన్నీ సింగ్‌ నడిపినట్టు వెల్లడి

దేశవ్యాప్తంగా సంచలనం సృష్టించిన యూపీ గ్యాంగస్టర్ అతీక్ అహ్మద్ సోదరుల హత్య కేసులో సంచలన విషయాలు వెలుగులోకి వస్తున్నాయి. నిందితులు పంజాబ్ గ్యాంగస్టర్ లారెన్స్ బిష్ణోయ్‌‌ను స్ఫూర్తిగా తీసుకున్నట్టు పోలీస్ వర్గాలు తెలిపాయి. నిందితుల లవ్లీశ్ తివారీ, సన్నీ సింగ్, అరుణ్ మౌర్యలు జర్నలిస్ట్‌ల ముసుగులో వచ్చి అతీక్ అహ్మద్, అష్రఫ్‌లపై కాల్పులు జరిపిన విషయం తెలిసిందే. విశ్వసనీయ వర్గాల సమాచారం ప్రకారం.. విచారణలో నిందితులు కీలక సమాచారం వెల్లడించినట్టు తెలుస్తోంది. అహ్మద్ సోదరుల హత్యకు ప్లాన్, అమలు మొత్తం కథంతా సన్నీ సింగ్ నడిపాడు. లారెన్స్ బిష్ణోయ్ ప్రసంగాల వీడియోలు, ఇంటర్వ్యూలను చూసి వ్యూహరచన చేశాడు.

బిష్ణోయ్ మతపరమైన ఆవేశపూరిత ప్రసంగాల ద్వారా సింగ్ తీవ్రంగా ప్రభావితమయ్యాడని, గతేడాది మే 29న బిష్ణోయ్ ముఠా కాల్చి చంపిన సిద్ధూ మూసేవాలా వంటి పెద్ద హత్య గురించి కలలుగన్నాడని పేర్కొన్నాయి. అతీక్‌ సోదరులపై కాల్పుల జరిపిన ముగ్గురిలో సన్నీ సింగ్ చాలా ప్రమాదకారి. అతడిపై డజనుకుపైగా కేసులు నమోదయ్యాయి. అతీక్ సోదరులను హత్య చేయడానికి లవ్లీశ్ తివారీ, అరుణ్ మౌర్యలను సన్నీనే ఒప్పించి తీసుకొచ్చినట్టు తెలిపాయి. శనివారం రాత్రి 10.30 గంటల ప్రాంతంలో ఆస్పత్రి వద్ద అతీక్ సోదరులను తుపాకీతో కాల్చి హత్య చేశారు.

వైద్య పరీక్షల కోసం వీరు వస్తున్నట్టు తెలుసుకుని, జర్నలిస్ట్‌ల వేషంలో మాటువేశారు. అరగంట ముందే అక్కడకు చేరుకున్న నిందితులు.. ఓ చేతిలో మైక్ పట్టుకుని, తుపాకులను ఇన్‌షర్ట్ లోపల దాచిపెట్టారు. కాల్పులు జరిపి, జై శ్రీరామ్ నినాదాలు చేస్తూ తప్పించుకునే ప్రయత్నం చేశారు. ఈ దృశ్యాలు అక్కడ సీసీటీవీ కెమెరాల్లో రికార్డయ్యాయి. నిందితులను అరెస్ట్ చేసిన పోలీసులు.. కోర్టులో హాజరుపరచగా 14 రోజుల జ్యుడీషియల్ కస్టడీ విధించింది. భద్రత కారణాల రీత్యా ముగ్గుర్ని ప్రయాగ్‌రాజ్ నుంచి ప్రతాప్‌గఢ్ జైలుకు సోమవారం తరలించారు.

మరోవైపు, అతీక్‌ అహ్మద్‌, అతడి సోదరుడు అష్రాఫ్‌ల హత్యపై ముగ్గురు సభ్యులతో సిట్‌ను ఏర్పాటు చేస్తున్నట్లు ఉత్తర్‌ ప్రదేశ్‌ పోలీసులు సోమవారం ప్రకటించారు. సాక్షుల స్టేట్‌మెంట్ల రికార్డు, ఎలక్ట్రానిక్‌ సాక్ష్యాల సేకరణ, రికార్డుల సమీకరణ, శాస్త్రీయ, ఫోరెన్సిక్‌ సాక్ష్యాల సేకరణ, ల్యాబ్‌లో పరీక్షల వంటి వాటిలో నిష్పాక్షిక విచారణకు ఈ సిట్‌ను ఏర్పాటు చేస్తున్నట్లు శాంతిభద్రతల విభాగం ప్రత్యేక డీజీపీ ప్రశాంత్‌ కుమార్‌ సోమవారం వెల్లడించారు. అడిషినల్ డీసీపీ సతీశ్ చంద్రను సిట్‌ అధిపతిగా.. అసిస్టెంట్ పోలీసు కమిషనరు సత్యేంద్ర ప్రసాద్‌ తివారీ, క్రైం బ్రాంచ్‌ ఇన్‌స్పెక్టర్‌ ఓం ప్రకాశ్‌లను సభ్యులుగా నియమించినట్లు చెప్పారు.