కలల ఇంటి సాకారం కోసం ఓ రైతు సాహసం...ఏం చేస్తున్నాడోో తెలుసా

పశ్చిమ బెంగాల్‌కు చెందిన ఓ రైతు మాత్రం సొంత ఇంటికి సంబంధించి కాస్త పెద్ద కలే కన్నారు. తన ఇల్లు ‘టైటానిక్ షిప్’ మాదిరిగా ఉండాలని భావించారు. కొంత మంది ఇంజనీర్లను సంప్రదిస్తే అది అతడి వల్ల అయ్యే పనికాదన్నారు. కానీ, ఆ రైతు దాన్ని తీరని కలగానే ఉంచదల్చుకోలేదు. సాకారం చేసుకునేందుకు సాహసమే చేస్తున్నాడు. ఈ క్రమంలో ఎలాంటి కష్టాలు ఎదుర్కొన్నాడు? 10 ఏళ్లుగా పట్టుబట్టిన విక్రమార్కుడిలా ఎలా పనిచేస్తున్నాడు?

మింటు రాయ్‌ (52) అనే వ్యక్తి బెంగాల్‌లోని నార్త్ 24 పరగణాస్ జిల్లా హెలెంచ గ్రామంలో ఓ పేద కుటుంబంలో జన్మించాడు. చిన్నతనంలో పేదరికంతో అతడి కుటుంబం చాలా ఇబ్బందులు ఎదుర్కొంది. మింటూకు 20 ఏళ్ల వయసు వచ్చినప్పుడు అతడు తన కుటుంబంతో కలిసి ఉత్తర బెంగాల్‌లోని ఫాన్సిదేవాకు వలస వచ్చారు. ఆ తర్వాత చాలా కాలం పాటు అతడు కలకత్తా నగరంలో నివాసం ఉన్నాడు. చిన్నా చితకా ఉద్యోగాలు చేస్తూ తండ్రికి ఆర్థికంగా తోడ్పడేవాడు.

చారిత్రక కోల్‌కతా నగరంలో ‘దేవీ నవరాత్రి ఉత్సవాలు’ మింటూకు ఓ మరచిపోలేని జ్ఞాపకం. యుక్త వయసులో ఈ ఉత్సవాల సమయంలో అతడు ఎక్కువగా మండపాల వద్దే గడిపేవాడు. ఈ క్రమంలో ఒక రోజు అతడు చూసిన ఓ మండపం అతడి దృష్టిని ఆకర్షించింది. ‘టైటానిక్‌ ఓడ’ రూపంలో ఆ మండపాన్ని ఏర్పాటు చేశారు. ఆ మండపాన్ని చూడగానే.. దాన్ని పోలి ఉండే ఇంటిని నిర్మించుకోవాలని భావించాడు. ఆ కల తనతో పాటు అలా ‘ట్రావెల్’ అవుతూ వచ్చింది.

మింటూకు ఇతిరాయ్‌ అనే యువతితో వివాహమైంది. ప్రస్తుతం వారికి కాలేజీకి వెళ్లే కుమార్తె, పదో తరగతి చదువుతున్న కుమారుడు ఉన్నారు. వారిని చదివిస్తూనే.. తన కలల ఇంటి నిర్మాణం కోసం ప్రయత్నాలు ప్రారంభించాడు మింటూ. టైటానిక్ లాంటి ఇల్లు కోసం ఇంజనీర్లను సంప్రదిస్తే.. చాలా మంది అతడిని అదో రకంగా చూశారు. వారితో మాట్లాడిన తర్వాత తనకు మాత్రం ఓ క్లారిటీ వచ్చింది. ఆ ఇంటి నిర్మాణానికి తాను ఊహించినదానికంటే మూడింతలు ఖర్చవుతుంది. అందుకయ్యే డబ్బులు కూడబెట్టడం ఒక ఎత్తు. ఖర్చును తగ్గించుకోవడం మరో ఎత్తు.

తన కలల ఇంటిని సాకారం చేసుకునే క్రమంలో నేపాల్‌ కూడా వెళ్లాడు మింటూ. అక్కడ ఇంటి నిర్మాణాల్లో అనుసరించే ప్రత్యేక పద్ధతి గురించి తెలుసుకునేందుకు వెళ్లాడు. తాపీ మేస్త్రీగా పనిచేస్తూ ఆ పద్ధతి గురించి తెలుసుకున్నాడు. అంతకుముందు ఆటో డ్రైవర్‌గా పనిచేసి కొంత మొత్తం కూడబెట్టాడు. చివరికి 2010లో ఇంటి నిర్మాణాన్ని ప్రారంభించాడు. మింటూ సంకల్పం చూసి అతడి భార్య ఇతిరాయ్ కూడా అండగా నిలిచింది. నాటి నుంచి వారిద్దరూ ఒక్కో ఇటుకను పేర్చుకుంటూ డ్రీమ్ హౌస్ నిర్మాణం కొనసాగిస్తున్నారు.

ఇప్పటివరకూ రూ. 15 లక్షలు ఖర్చు చేసినట్లు మింటూ తెలిపాడు. మూడంతస్తుల్లో ఇంటి నిర్మాణం కొనసాగుతోంది. పనులు చివరి దశకు చేరుకున్నాయి. మరో రెండేళ్లలో పూర్తికానుంది. ఇంత తక్కువ ఖర్చుతో ఆ ఇల్లు నిర్మిస్తున్నారని తెలిసి స్థానికులు నోరెళ్లబెట్టారు.

పెళ్లి సమయంలో అత్తగారి నుంచి మింటూకి కొంత భూమి వచ్చింది. అది డార్జిలింగ్ సమీపంలో ఉంది. అక్కడ తేయాకు పండిస్తున్నాడు. ఇప్పుడు ఈ ఇంటిని కూడా అక్కడే నిర్మిస్తున్నాడు. మూడో అంతస్తులోని డెక్ వద్దకు చేరుకుంటే.. ఆ తేయాకు తోట, ఆ పరిసర ప్రాంతాలు అందంగా కనిపిస్తున్నాయి. తన ఇంటికి వచ్చి అతిథులకు అది కచ్చితంగా మంచి అనుభూతిని పంచుతుందని మింటూ భావిస్తున్నాడు. అక్కడ ఓ టీ షాపును కూడా ఏర్పాటు చేయాలనేది అతడి ప్లాన్. ‘మేం చాలా పేదవాళ్లం. నా కూతురు పుట్టిన తర్వాతే మా జీవితాలు మారాయి’ అని మింటూ చెబుతున్నాడు. ఈ టైటానిక్ ఇల్లు ఇప్పటికే ఓ విజిటింగ్ స్పాట్ అయ్యింది. ఆ పరిసర ప్రాంతాల ప్రజలు అక్కడికి వచ్చి సెల్ఫీలు తీసుకుంటున్నారు.