ఏపీ కాంట్రాక్ట్ ఉద్యోగులను,,,మరో ఏడాది పాటూ పొడిగిస్తూ ఏపీ సర్కార్ నిర్ణయం

ఏపీలోని వివిధ ప్రభుత్వ శాఖల్లో పని చేస్తున్న కాంట్రాక్ట్ ఉద్యోగులకు వారి పదవీ కాలాన్ని పొడిగిస్తూ ఏపీ సర్కార్ నిర్ణయం తీసుకుంది. ఈ మేరకు సోమవారం ఆర్థికశాఖ ముఖ్య కార్యదర్శి చిరంజీవి చౌదరి ఉత్తర్వులు జారీ చేశారు. ఏడాది లేదా ఆ పోస్టుల్లో శాశ్వత ఉద్యోగులను నియమించే వరకు ఏది ముందు అయితే అంత వరకు వీరి ఒప్పందం పొడిగిస్తున్నట్లు ఉత్తర్వుల్లో పేర్కొన్నారు.

ప్రభుత్వశాఖల్లో ఎంత మంది కాంట్రాక్టు ఉద్యోగులు ఉన్నారో వారి కాంట్రాక్టు మాత్రమే పొడిగిస్తున్నట్లు తెలిపారు. పాఠశాల, ఉన్నత విద్య, న్యాయవిభాగం, టెక్నికల్‌ విద్య, వైద్యం, కుటుంబ ఆరోగ్య సంక్షేమశాఖ, యువజన సర్వీసులు, టూరిజం శాఖలతో పాటుగా.. మరో 11 ప్రభుత్వశాఖల్లో పని చేస్తున్న కాంట్రాక్ట్ ఉద్యోగులకు 2024 మార్చి 31 వరకు పదవీకాలాన్ని పొడిగించారు.

మరోవైపు ప్రభుత్వ ఉద్యోగులకు ట్రెజరీ ద్వారానే జీతాలు చెల్లించాలని కోరారు ఏపీ ఉద్యోగులు జేఏసీ ఛైర్మన్ బొప్పరాజు వెంకటేశ్వర్లు . ఉద్యోగుల జీతాల బిల్లుల పరిశీలన ట్రెజరీ చేస్తోందని.. జీతాల చెల్లింపులు మాత్రం సీఎఫ్‌ఎంఎస్‌ ద్వారా చేస్తున్నారని గుర్తు చేశారు. ఈ అంశంపై ప్రభుత్వం వెంటనే స్పందించి ట్రెజరీ ద్వారానే ఉద్యోగులకు జీతాలు చెల్లించేలాని.. ఈ మేరకు చర్యలు తీసుకోవాలని కోరారు.

అంతేకాదు సీఎఫ్‌ఎంఎస్‌ వచ్చాక జీతాలపై క్లారిటీ లేదన్నారు. రెగ్యులర్‌ ఉద్యోగులతో పాటు కాంట్రాక్ట్‌, ఔట్‌సోర్సింగ్‌ ఉద్యోగులకు న్యాయం చేకూర్చేలా పోరాటం చేస్తున్నామన్నారు. న్యాయమైన సమస్యలను కూడా ప్రభుత్వం ముందుంచి వారికి న్యాయం చేసేందుకు ప్రయత్నిస్తున్నామన్నారు. ఈ నెల 25, 26న జిల్లాల కలెక్టరేట్ల ఎదుట ధర్నాలు చేస్తామన్నారు. కాంట్రాక్ట్‌, ఔట్‌సోర్సింగ్‌ ఉద్యోగులు రాష్ట్ర స్థాయిలోను, అన్ని జిల్లాల్లోనూ సంఘాన్ని బలోపేతం చేసుకోవాలన్నారు.

ఏపీ ప్రభుత్వ ఉద్యోగుల సంఘం ప్రభుత్వ ప్రధాన కార్యదర్శి జవహర్‌రెడ్డిని కలిసింది. ఉద్యోగులకు పెండింగ్‌ డీఏలను విడుదల చేయాలని కోరారు. జీపీఎఫ్‌ అకౌంట్‌ల నుంచి అనధికారికంగా ఉపసంహరించిన నిధులను తిరిగి జమ చేయాలన్నారు. సీఎస్‌కు ఉద్యోగులు 26 సమస్యలు, డిమాండ్లపై వినతిపత్రం సమర్పించారు. కొత్త జిల్లాల్లో పని చేస్తున్న ఉద్యోగులకు పాత జిల్లాల్లో చెల్లిస్తున్నట్లే ..16% హెచ్‌ఆర్‌ఏ చెల్లించాలని కోరారు. అలాగే గెజిటెడ్‌ పోస్టుల పదోన్నతులకు ఒకటే విధానం అమలు చేయాలన్నారు.

ఇదిలా ఉంటే.. ఈ నెల 19న షబ్‌-ఎ-ఖదర్‌ పర్వదినం సందర్భంగా ఆప్షనల్ హాలిడేగా ప్రకటిస్తూ ప్రభుత్వం ఉత్తర్వులు జారీ చేసింది. 2023లో సెలవు దినాలకు సంబంధించి ప్రభుత్వం ఇది వరకు జారీ చేసిన జాబితాలో ఈ నెల 18న ఆప్షనల్ హాలిడేగా పేర్కొన్నారు. అయితే 18కి బదులుగా బుధవారాన్ని సెలవుగా ప్రకటించారు. ఉద్యోగులు ఈ విషయాన్ని గమనించాలన్నారు.