నాపై కక్షకట్టారు..అఫ్రూవర్ దస్తగిరి ఆరోపణ

కడప వైఎస్సార్ కాంగ్రెస్ పార్టీ ఎంపీ వైఎస్ అవినాష్‌ రెడ్డి తండ్రి వైఎస్ భాస్కర్‌రెడ్డి అరెస్టు తర్వాత తనపై కక్ష కట్టారని మాజీ మంత్రి వైఎస్‌ వివేకానందరెడ్డి హత్య కేసులో అప్రూవర్‌గా మారిన దస్తగిరి తెలిపారు. ఈ మేరకు కడప సూపరింటెండెంట్ ఆఫ్ పోలీస్ (ఎస్పీ) కార్యాలయంలో ఆయన ఫిర్యాదు చేశారు. పులివెందుల వైసీపీ శ్రేణులు, వైఎస్ అవినాష్‌ రెడ్డి అనుచరుల నుంచి తనకు ప్రాణహాని ఉందన్నారు. తనను, తన కుటుంబాన్ని ఏమైనా చేస్తారేమోనని భయంగా ఉందని ఆందోళన వ్యక్తం చేశారు.

ముఖ్యమంత్రి వైఎస్ జగన్మోహన్ రెడ్డి, ఎంపీ అవినాష్‌రెడ్డి వల్ల తనకు ప్రాణహాని ఉందని దస్తగిరి అన్నారు. అవినాష్ రెడ్డి అనుచరులు తనను అనుసరిస్తున్నారని చెప్పారు. తనపై వారు బహిరంగంగానే విమర్శలు చేస్తున్నారని పేర్కొన్నారు. కాబట్టి తనకు, తన కుటుంబానికి తగిన రక్షణ కల్పించాలని ఫిర్యాదులో దస్తగిరి పేర్కొన్నారు.

ఇక, వైఎస్ వివేకానందరెడ్డి కుమార్తె సునీత వద్ద తాను డబ్బులు తీసుకున్నట్లు ఎంపీ అవినాష్‌రెడ్డి పదే పదే ఆరోపిస్తున్నారని దస్తగరి అన్నారు. అమ్ముడుపోయానని నిరూపిస్తే జైలు శిక్షకు తాను సిద్ధమని.. నిరూపించకుంటే పదవికి రాజీనామా చేసి జైలుకెళ్తారా అని అవినాష్ రెడ్డికి దస్తగిరి సవాల్‌ విసిరారు. వివేకానందరెడ్డి హత్య కేసులో విచారణ ఎలా జరుగుతుందో అర్థం కాని పరిస్థితి నెలకొందన్నారు.

ఇదిలావుంటే దస్తగిరి సూపరింటెండెంట్ ఆఫ్ పోలీస్ కార్యాలయానికి వచ్చినప్పుడు జిల్లా ఎస్పీ అందుబాటులో లేకపోవడంతో అక్కడ ఉన్న సిబ్బందికి వినతిపత్రం ఇచ్చారు. తనకు ప్రాణ హాని ఉందని సీబీఐ ఎస్పీ, కడప ఎస్పీ, రాయలసీమ రేంజ్‌ డీఐజీకి రిజిస్టర్‌ పోస్టు ద్వారా వినతులు అందజేస్తానని దస్తగిరి చెప్పారు.

ఇక, ఇప్పటికే వివేకా హత్య కేసులో నిందితుడిగా ఉంటూ అప్రూవర్‌గా మారి హత్యకు సంబంధించిన అన్ని వివరాలు బయటపెట్టిన దస్తగిరికి సీబీఐ భద్రత కల్పించింది. ఈ భద్రతలో ఉంటూనే దస్తగిరి ఈ కేసుకు సంబంధించి వైఎస్ అవినాష్ రెడ్డిపై పలు వ్యాఖ్యలు చేశారు. ఈ హత్యలో ఆయనతో పాటు భాస్కర్ రెడ్డి, ఇతర నిందితుల పాత్రపై ఆరోపణలు చేస్తున్నారు. ఈ నేపథ్యంలో వైసీపీ కార్యకర్తలు, ఎంపీ అవినాష్ రెడ్డి నుంచి తనకు ప్రాణహాణి ఉందని, కాబట్టి మరింత భద్రత కల్పించాలని దస్తగిరి వేడుకుంటున్నారు.

మరోవైపు వైఎస్ వివేకా హత్య కేసులో దస్తగిరి ఇచ్చిన వాంగ్మూలం ఆధారంగా తమను సీబీఐ నిందితులుగా మార్చడాన్ని వైఎస్ అవినాష్ రెడ్డి తప్పుబట్టారు. ఈ వ్యాఖ్యలపై ఇప్పటికే దస్తగిరి అభ్యంతరం వ్యక్తం చేశారు. తాను వాంగ్మూలం ఇచ్చినప్పుడే అభ్యంతరం వ్యక్తం చేయకుండా ఇప్పుడు విమర్శలు చేయడమేంటని నిన్న ప్రశ్నించారు. ఈ నేపథ్యంలోనే తనకు, తన కుటుంబానికి ప్రాణహాని ఉందని ఆరోపిస్తూ బుధవారం మరోసారి దస్తగిరి పోలీసులను ఆశ్రయించారు.