సోనియా బంధువు ఆస్తిని సైతం లాగేసుకున్న అతిఖ్,,,వెలుగులోకి వస్తోన్న అతిఖ్ అహ్మద్ దందాలు

ఇటీవల హత్యకు గురైన యూపీ గ్యాంగ్ స్టర్ అతిఖ్ అహ్మద్ గురించి రోజుకో కొత్త విషయం వెలుగులోకి వస్తోంది. కండ బలం, అధికారాన్ని ఉపయోగించుకొని అతడు అక్రమంగా భూములను లాగేసుకున్నాడనేది రహస్యమేం కాదు. కానీ యూపీఏ ప్రభుత్వం అధికారంలో ఉన్న సమయంలో.. కాంగ్రెస్ పార్టీ అధ్యక్షురాలు సోనియా గాంధీ బంధువు ఆస్తులను సైతం అతిఖ్ లాగేసుకున్నాడు. సోనియా మామగారైన ఫిరోజ్ గాంధీ బంధువులు ప్రయాగ్‌రాజ్‌లో పెద్ద సంఖ్యలో ఉన్నారు. వీరా గాంధీ అనే మహిళ కూడా ఫిరోజ్ ఖాన్ బంధువే. ఆమెకు ప్రయాగ్ రాజ్‌లోని సివిల్ లైన్స్ ప్రాంతంలో ఓ ఇల్లు ఉంది. 2007లో అతిఖ్ దాన్ని ఆక్రమించాడు. ఆ సమయంలో సమాజ్ వాదీ పార్టీ ఉత్తర ప్రదేశ్‌లో అధికారంలో ఉండగా.. అతిఖ్ ఆ పార్టీ తరఫున ఫుల్‌పుర్ నుంచి ఎంపీగా ఉన్నాడు. అధికారాన్ని అడ్డం పెట్టుకొని వీరా గాంధీ ఆస్తిని అతిఖ్ చేజిక్కించుకున్నాడు. దీంతో వీరా గాంధీ ఎవరిని కలిసినా ఫలితం లేకపోయింది. దీంతో ఆమె సోనియా గాంధీ సాయం కోరారు. చివరకు యూపీఏ చైర్‌పర్సన్‌గా ఉన్న సోనియా జోక్యం చేసుకోవడంతో అతిఖ్ వెనక్కి తగ్గాడు. వీరా గాంధీకి ఆ ఇంటి తాళం చెవి తిరిగి ఇచ్చేశాడు.

ఆస్తానా ఫ్యామిలీ నుంచి కొంత భూమిని ఆతిఖ్ కొనుగోలు చేశాడు. అప్పుడే అతడికి వీరా గాంధీ ప్రాపర్టీ గురించి తెలిసింది. దీంతో అతడు బలప్రయోగం ద్వారా ఆ ఇంటిని సొంతం చేసుకుని తాళం వేశాడు. అప్పటికి సోనియా గాంధీ కాంగ్రెస్ అధ్యక్షురాలిగా, యూపీఏ చైర్‌పర్సన్‌గా వ్యవహరిస్తున్నారు. ఆమె సాయం కోరడానికి ముందు వీరా గాంధీ స్థానిక పోలీసులు, ప్రభుత్వ అధికారుల జోక్యం కోరినప్పటికీ ఫలితం లేకపోయింది. దీంతో చివరి ప్రయత్నంగా ఆమె సోనియాను అభ్యర్థించారు.  సోనియా ఆదేశాలతో ప్రయాగ్‌రాజ్‌కు చెందిన బలమైన కాంగ్రెస్ నేత రీటా బహుగుణ జోషి రంగంలోకి దిగారు. జిల్లా యంత్రాంగంతో ఆమె మాట్లాడటంతో సమస్య పరిష్కారమైంది. వీరా గాంధీ కూడా కేసు నమోదు చేయలేదు.  ‘‘రియల్ ఎస్టేట్, భూముల విషయంలో అతిఖ్ దురాశపరుడు. ప్రయాగ్‌రాజ్‌లో ఎన్నో ఆస్తులను అతడు లాగేసుకున్నాడు. కానీ వీరా గాంధీకి మాత్రం తిరిగి ఇచ్చేయాల్సి వచ్చింది’’ అని 2001-03 మధ్య ప్రయాగ్‌రాజ్ ఎస్పీగా పని చేసిన మాజీ ఐజీ లాల్జీ శుక్లా తెలిపారు.

ఈ ఘటన తర్వాత వీరా గాంధీ ప్రయాగ్‌రాజ్‌లోని తమ ఆస్తులను చాలా వరకు విక్రయించి ముంబైకి మకాం మార్చారు. 2007 ఘటన నాటి విషయమై టైమ్స్ ఆఫ్ ఇండియా వీరా గాంధీని ఫోన్లో సంప్రదించే ప్రయత్నం చేయగా.. అతిఖ్ గురించి మాట్లాడేందుకు ఆమె నిరాకరించారు.కానీ ఈ సమస్యను పరిష్కరించిన నాటి యూపీ కాంగ్రెస్ అధ్యక్షురాలు రీటా బహుగుణ జోషి మాత్రం స్పందించారు. ‘‘సోనియా గాంధీ నాకు ఫోన్ చేసి ఈ విషయంలో జోక్యం చేసుకోమని సూచించారు. దీంతో నేను జిల్లా యంత్రాంగంతో మాట్లాడాను. ఫలితంగా అతిఖ్ వెనక్కి తగ్గాడు’’ అని రీటా తెలిపారు.

యూపీ డాన్‌గా ఎదిగిన అతిఖ్ అహ్మద్‌కు, ఆయన కుటుంబానికి రూ.11,684 కోట్ల విలువైన ఆస్తులు ఉన్నాయని తెలుస్తుండగా.. రూ.1169 కోట్ల విలువైన ఆస్తులను సీజ్ చేసినట్లు యూపీ ప్రభుత్వం ప్రకటించింది. 2019లో వారణాసి నుంచి ఎంపీగా పోటీ చేసిన సమయంలో తన ఆస్తి విలువ రూ.25 కోట్లని అతిఖ్ అఫిడవిట్లో పేర్కొన్నాడు.