చందనోత్సవ ఏర్పాట్లు అధ్వాన్నంగా నిర్వహించారు

ఈ సారి చందనోత్సవ ఏర్పాట్లు అధ్వాన్నంగా నిర్వహించారని సింహాచలం అప్పన్న చందనోత్సవ ఏర్పాట్లపై విశాఖ శారదా పీఠాధిపతి స్వామి స్వరూపానందేంద్ర తీవ్ర స్థాయిలో మండిపడ్డారు. . గర్భాలయంలో పోలీసుల జులుం ఎక్కువైందని ధ్వజమెత్తాహరు. గర్భాలయంలో ఆచారాలను మంటగలిపారని మండిపడ్డారు. క్యూలైన్లలో భక్తుల అవస్థలు చూస్తుంటే కన్నీళ్లు వస్తున్నాయని ఆవేదన వ్యక్తం చేశారు. ఇవన్నీ చూస్తుంటే ఈ రోజు స్వామి వారి దర్శనానికి ఎందుకు వచ్చానా..? అని బాధపడుతున్నట్లు వెల్లడించారు. సామాన్య భక్తులను దేవుడికి దూరం చేసేలా వ్యవహరిస్తున్నారని స్వామి స్వరూపానందేంద్ర మండిపడ్డారు.

"ఈ సంవత్సరం అంత వరస్ట్‌గా చందనోత్సవం ఎప్పుడూ జరగలేదు. గర్భాలయంలో పోలీసుల జులుం ఎక్కువైంది. భక్తులకు ఏ రకమైన సౌకర్యాలు లేవు. ప్రతి సంవత్సరం మమ్మల్ని అడిగేవారు. ఈ సంవత్సరం మమ్మల్ని అడగకుండా ఇష్టారాజ్యంగా చేశారు. ఇది పోలీసుల రాజ్యంలా అయిపోయింది. భక్తులకు చేరువగా భగవంతుడు ఉండేటట్లుగా లేదు. గత ఆరు నెలలుగా ఇక్కడ ఈవో లేకపోవటం దారుణం. ఎకడెక్కడి నుంచో భక్తులు వస్తే.. వీఐపీ టికెట్లు పోలీసుల ద్వారా అమ్మించారు. అసలు గర్భాలయం చూస్తే భయమేస్తుంది. పోలీసులు, ధనాలు.. గర్భాలయంలో ఏ మాత్రం ఆచారాలు, మడి, సంప్రదాయం లేకుండా పోయింది.

ఇది చాలా దారుణం. సింహాచలం చరిత్రలో ఇది దుర్మార్గమైన రోజుగా చెప్పొచ్చు. ఇక్కడున్న భక్తులను చూస్తే కళ్లవెంట నీళ్లొస్తున్నాయి. అసలు నేను ఈరోజు ఎందుకు దర్శనానికి వచ్చానా అనిపించింది. చిన్నపిల్లలతో ఎంతో మంది దర్శనానికి వచ్చారు. కొండ కింద వరకు జనాలే. ఈ వీఐపీల దర్శనం ఏంటి ? ఇది పేదల దేవుడు. ధనవంతుల దేవుడు కాదు. పేదలకు దేవుణ్ణి దూరం చేయం కరెక్ట్ కాదు." అని స్వరూపానందేంద్ర ఫైరయ్యారు.

సింహాచలంలో వైశాఖ శుద్ధ తదియను పురస్కరించుకుని ఇవాళ అప్పన్నస్వామి నిజరూప దర్శనం వైభవోపేతంగా జరిగింది. పురస్కరించుకుని లక్షలాది మంది భక్తులు సింహగిరికి తరలివచ్చారు. అధికారులు సరైన ఏర్పాట్లు చేయలేదని భక్తులు తీవ్ర ఆగ్రహం వ్యక్తం చేశారు. దేవాదాయశాఖ మంత్రి కొట్టు సత్యనారాయణ వ్యతిరేకంగా భక్తులు నినాదాలు చేశారు. క్యూలైన్‌ వద్దకు వెళ్లిన మంత్రి కొట్టును నిలదీశారు. సామాన్యులకు త్వరగా దర్శనాలు కల్పించడంలో విఫలమయ్యారని మండిపడ్డారు. రూ.1500 టికెట్లు కొనుగోలు చేసినా.. క్యూలైన్లు కదల్లేదంటూ ఆగ్రహం వ్యక్తం చేశారు. తాగునీరు సహా కనీస సౌకర్యాలు కూడా కల్పించలేదని భక్తులు ధ్వజమెత్తారు. భక్తుల ఇబ్బందులపై దేవాదాయశాఖ అధికారులతో మంత్రి బొత్స సత్యనారాయణ మాట్లాడారు. ఎలాంటి ఇబ్బందులు తలెత్తకుండా ఏర్పాట్లు చేయలన్నారు.