కేరళలోని కొచ్చిలో వాటర్ మెట్రో ప్రాజెక్టు,,,సౌకర్యం, సౌలభ్యం, భద్రత.. దీని ప్రత్యేకత

దేశంలోనే తొలి వాటర్ మెట్రో రవాణా ప్రాజెక్టును.. ప్రధాని మోదీ మంగళవారం కేరళలో ప్రారంభించనున్నారు. కేరళ రాష్ట్రంలో సహజ వనరులు సమృద్ధిగా ఉన్నాయి. నీటి వనరులకు కొదవలేదు. దీంతో ఈ రాష్ట్రానికి వాటర్ మెట్రో ఎంతో ఉపయోగపడుతుందని భావించి.. వాటర్ మెట్రో ప్రాజెక్టును మొదలుపెట్టారు. ఇది కొచ్చి నగరానికి చాలా ప్రయోజనం చేకూర్చే ప్రాజెక్ట్ అని అధికారులు చెబుతున్నారు.

వాటర్ మెట్రో ప్రయాణంలో సౌకర్యం, సౌలభ్యం, భద్రత, సమయపాలన, విశ్వసనీయత, పర్యావరణ అనుకూలత ఉంటుందని నిపుణులు చెబుతున్నారు. ప్రయాణం కూడా సులువుగా ఉంటుందని అంచనా వేస్తున్నారు. ముఖ్యంగా కాలుష్యం ఉండబోదని భావిస్తున్నారు. ఇక్కడ వాటర్ మెట్రో సక్సెస్ అయితే.. అవకాశం ఇతర నగరాల్లో దీన్ని ప్రారంభించే ఛాన్స్ ఉంది. ఇప్పటికే పలు ప్రాంతాల్లో సర్వే కూడా జరుగుతున్నట్టు తెలుస్తోంది.

ఇటు ప్రధాని మోదీ సోమవారం, మంగళవారం బిజీ బిజీగా పర్యటించనున్నారు. తన టూర్‌ను ఢిల్లీ నుంచి ప్రారంభించి.. దేశంలోని వివిధ రాష్ట్రాల్లోని 7 నగరాల్లో పర్యటించేలా ప్లాన్ చేశారు. మొదట మధ్యప్రదేశ్‌లోని రేవా నగర్‌లో.. జాతీయ పంచాయతీ రాజ్‌ కార్యక్రమంలో పాల్గొంటారు. ఆ తర్వాత రూ.17 వేల కోట్ల విలువైన ప్రాజెక్టులను దేశానికి అంకితం చేస్తారు. అనంతరం మరుసటి రోజు ఉదయం 25వ తేదీ ఉదయం 10.30 గంటలకు కేరళ రాష్ట్రంలో పర్యటిస్తారు.

తిరువనంతపురం -కాసర్‌గోడ్ మధ్య 11 జిల్లాలను కలుపుతూ.. కేరళలో తొలి వందే భారత్ రైలును ప్రధాని మోదీ ప్రారంభిస్తారు. ఆ తర్వాత ఉదయం 11 గంటలకు తిరువనంతపురం నగరంలో రూ.3,200 కోట్ల విలువైన అభివృద్ధి కార్యక్రమాలకు శంకుస్థాపన కార్యక్రమంలో పాల్గొని.. జాతికి అంకితం చేస్తారు. ఆ తర్వాత గుజరాత్‌లోని సూరత్ నగరం మీదుగా.. సిల్వాస్సా నగరానికి వెళ్తారు. రూ. 4,850 కోట్లకు పైగా పలు అభివృద్ధి కార్యక్రమాలకు ఆయన శంకుస్థాపన చేయనున్నారు.

ఆ తరువాత డామన్‌కు బయలుదేరి.. చివరకు ఢిల్లీకి తిరిగి వస్తారు. తన పర్యటనలో.. ప్రధాని 7 వేర్వేరు నగరాలను సందర్శించేలా.. 8 కార్యక్రమాల్లో పాల్గొనేలా అధికారులు ప్లాన్ చేశారు. దేశంలోని వివిధ ప్రాంతాల్లో 36 గంటల్లో 5,300 కిలో మీటర్ల దూరం ప్రధాని మోదీ ప్రయాణించబోతున్నారు.