ప్రధాని మోదీకి జై కొట్టిన పాకిస్తానీలు

ఆస్ట్రేలియాలోని పాకిస్థానీలు కూడా భారత ప్రధాని నరేంద్ర మోదీని కొనియాడారు. ఇండియన్ మైనారిటీస్ ఫౌండేషన్, నామ్ ధారీ సిఖ్ సొసైటీ సహకారంతో ఎన్ఐడీ ఫౌండేషన్ ఆధ్వర్యంలో మెల్బోర్న్ లోని బంజిల్ ప్యాలెస్ లో నిన్న విశ్వ సద్భావన కార్యక్రమం జరిగింది. ఈ కార్యక్రమానికి ముస్లింలు, క్రైస్తవులు, ఇతర మతాల వారు విచ్చేశారు. మత నాయకులు, మేధావులు, పండితులు, మత గురువులు, పరిశోధకులు ఈ కార్యక్రమానికి హాజరయ్యారు. పాకిస్థాన్ అహ్మదీయ ముస్లిం కమ్యూనిటీకి చెందిన డాక్టర్ తారిఖ్ భట్ ఈ కార్యక్రమంలో మాట్లాడుతూ, భారత ప్రధాని నరేంద్ర మోదీని కొనియాడారు.

అన్ని వర్గాలను సమానంగా చూడగలిగే సత్తా ఉన్న నాయకుడు మోదీ అని పేర్కొన్నారు. తనకు అనేకమంది భారతీయ స్నేహితులు ఉన్నారని, ఇప్పుడు వారంతా ఐక్యంగా అనేక కార్యక్రమాలు చేపడుతుండడం చూస్తున్నానని తారిఖ్ భట్ వెల్లడించారు. వారి కార్యక్రమాలలో తాము (పాకిస్థానీ ముస్లింలు) కూడా చేయి కలిపామని, మునుపటి కంటే ఇప్పుడు భారత్-పాకిస్థాన్ ముస్లింల మధ్య సంబంధాలు మరింత విస్తృతమయ్యాయని తెలిపారు. ఇప్పుడు విభేదాల కంటే సారూప్యతలకు పెద్ద పీట వేసేందుకు అధిక ప్రాధాన్యత ఇస్తున్నామని ఆయన వివరించారు. ఇది మోదీకే సాధ్యమని కీర్తించారు. 

ఈ సద్భావన కార్యక్రమం గొప్పదని, హిందువులు, ముస్లింలను ఒక్కతాటిపైకి తీసుకువచ్చేందుకు ఎంతగానో ఉపయోగపడుతుందని డాక్టర్ తారిఖ్ భట్ అభిప్రాయపడ్డారు. అన్ని మతాల వారు ఒకరికొకరం అనుకునేలా, పరస్పరం కలుసుకునేలా ప్రోత్సహించడం ద్వారా ప్రధాని మోదీ సరైన విధంగా తన కార్యాచరణను ముందుకు తీసుకెళుతున్నారని ప్రశంసించారు. 

శాంతి, సామరస్యం పెంపొందించేందుకు మోదీ చర్యలు ఎంతగానో తోడ్పాడతాయని అన్నారు. "ప్రధాని మోదీ ఎంతో ఛరిష్మా ఉన్న నాయకుడు. ఏ మతం వారైనా సరే ఆయన అడుగుజాడల్లో నడిచేందుకు ప్రయత్నిస్తుండడం నిజంగా చాలా మంచి పరిణామం" అని పేర్కొన్నారు.