రెండు దశల్లో పార్లమెంటు కొత్త భవనం ప్రారంభోత్సవం

అత్యంత  ప్రతిష్టాత్మకంగా నిర్మించిన భారత పార్లమెంట్‌ నూతన భవనాన్ని అట్టహాసంగా ప్రారంభించడానికి అన్ని ఏర్పాట్లు పూర్తయ్యాయి. పార్లమెంట్‌ భవనాన్ని జాతికి అంకితం చేసే కార్యక్రమానికి ప్రధాన మంత్రి నరేంద్ర మోదీ, లోక్‌సభ స్పీకర్‌ ఓం బిర్లా అధ్యక్షత వహించనున్నారు. ఈ కార్యక్రమాన్ని రెండు దశలుగా నిర్వహించనున్నారు. ఉదయం పాత పార్లమెంట్ ఆవరణలో ఉన్న గాంధీ విగ్రహం వద్ద పూజలతో ప్రారంభోత్సం మొదలు కానుంది. అనంతరం లోక్‌సభ, రాజ్యసభ ఛాంబర్లను సందర్శిస్తారు. అనంతరం లోక్‌సభలో రాజదండాన్ని ప్రతిష్ఠించనున్నారు. మధ్యాహ్నం జాతీయ గీతం ఆలపించడంతో మరో కార్యక్రమం జరపనున్నారు. దీనికి వివిధ పార్టీల నేతలు, లోక్‌సభ, రాజ్యసభ సభ్యులు.. పలువురు ప్రముఖులు హాజరు కానున్నారు.

మొట్టమొదటగా తెల్లవారుజామునే పాత పార్లమెంట్‌ ఆవరణలో పూజా కార్యక్రమాలు చేయనున్నారు. గాంధీ విగ్రహం వద్ద పలు కార్యక్రమాలు చేపట్టనున్నారు. ఈ కార్యక్రమంలో ప్రధానమంత్రి నరేంద్ర మోదీ, లోక్‌సభ స్పీకర్‌ ఓం బిర్లా, రాజ్యసభ డిప్యూటీ ఛైర్మన్‌ హరివంశ్‌ నారాయణ్ సహా పలువురు మంత్రులు పాల్గొననున్నారు. పూజ కార్యక్రమాలు పూర్తయిన తర్వాత అందరూ లోక్‌సభ, రాజ్యసభ ఛాంబర్లను సందర్శించనున్నారు. లోక్‌సభ స్పీకర్‌ కుర్చీకి కుడి వైపున రాజదండాన్ని ప్రతిష్ఠిస్తారు. ఈ కార్యక్రమానికి తమిళనాడు నుంచి వచ్చిన పూజారులతో పాటు ఆ రాజదండం రూపకర్తలు హాజరుకానున్నారు. అనంతరం నూతన పార్లమెంట్‌ ఆవరణలోనూ పూజలు చేయనున్నారు. ఈ కార్యక్రమాలన్నీ ఉదయం 9.30 గంటలలోపే పూర్తి కానున్నాయి.

తర్వాత మధ్యాహ్నం జాతీయ గీతాన్ని ఆలపించడంతో రెండో దశ ప్రారంభ వేడుకలు మొదలుకానున్నాయి. లోక్‌సభ ఛాంబర్‌లో జరిగే ఈ కార్యక్రమానికి ప్రధాని నరేంద్ర మోదీ సహా అతిథులు అందరూ హాజరుకానున్నారు. అనంతరం రాజ్యసభ డిప్యూటీ ఛైర్మన్‌ హరివంశ్‌ నారాయణ్‌సింగ్‌ ప్రసంగించనున్నారు. ఆ తర్వాత రాష్ట్రపతి ద్రౌపదీ ముర్ము, ఉప రాష్ట్రపతి జగదీప్‌ ధన్‌ఖడ్‌ మాట్లాడతారు. ఈ సందర్భంగా పార్లమెంట్‌ నిర్మాణం సమయంలోని అనేక ఘట్టాలతో రూపొందించిన ప్రత్యేక వీడియోలను ప్రదర్శించనున్నారు. అనంతరం లోక్‌సభ స్పీకర్‌ ఓం బిర్లా మాట్లాడనున్నారు. స్పీకర్‌ ప్రసంగం తర్వాత రాజ్యసభలో ప్రతిపక్ష నేత మాట్లాడానికి సమయాన్ని కేటయించినట్లు సమాచారం. ఆయన తర్వాత ప్రధానమంత్రి నరేంద్ర మోదీ ప్రసంగించనున్నట్లు తెలుస్తోంది. ఈ కార్యక్రమంలో భాగంగానే దేశానికి స్వాతంత్య్రం వచ్చి 75 ఏళ్లు పూర్తయిన సందర్భంగా రూ.75 నాణేన్ని విడుదల చేయనున్నారు.