ఓవైపు వర్షాలు, ఈదురుగాలులు,,,,మరోవైపు ఎండలు, వేడిగాలులు

ఆంధ్రప్రదేశ్‌లో ఓ వైపు ఎండలు మండిపోతుంటే.. మరోవైపు వానలు పడుతున్నాయి. నేడు (సోమవారం) కూడా ఎండ తీవ్రతతో పాటు అక్కడక్కడా పిడుగులతో కూడిన తేలికపాటి వర్షాలు పడే అవకాశం ఉందని విపత్తుల సంస్థ తెలిపింది. తెలంగాణ పరిసర ప్రాంతాల్లో ఉపరితల ఆవర్తనం ఉత్తర దక్షిణ ద్రోణి ఆగ్నేయ మధ్యప్రదేశ్‌ నుంచి తెలంగాణ, రాయలసీమ, ఉత్తర తమిళనాడు మీదుగా దక్షిణ తమిళనాడు వరకు ఉపరితల ఆవర్తనం మీదుగా వెళుతోంది. ఉపరితల ఆవర్తనం, ద్రోణి ప్రభావంతో కోస్తాంధ్ర, రాయలసీమలోని కొన్ని చోట్ల మోస్తరు వర్షాలు కురుస్తాయని అంచనా వేస్తున్నారు.

రాష్ట్రంలో అక్కడక్కడ పిడుగులతో కూడిన తేలికపాటి వర్షాలు పడే అవకాశం ఉందని వాతావరణశాఖ అంచనా వేస్తోంది. అక్కడక్కడా పిడుగులు పడే అవకాశం ఉందని.. ప్రజలు అప్రమత్తంగా ఉండాలని సూచించారు. సోమవారం కోస్తాంధ్ర, రాయలసీమల్లో ఒకటి, రెండుచోట్ల, బుధ, గురువారాల్లో కొన్నిచోట్ల తేలికపాటి నుంచి మోస్తరు వర్షాలు కురిసే అవకాశం ఉందని చెబుతున్నారు. ఉరుములు, మెరుపులతోపాటు అక్కడక్కడా పిడుగులు పడే ప్రమాదం ఉందని.. ఈదురుగాలులు వీస్తాయని ప్రజలు అప్రమత్తంగా ఉండాలని సూచించింది. కడప జిల్లా చాపాడు, కమలాపురం, ప్రొద్దుటూరు, వల్లూరు, వీరపునాయు నిపల్లె, ఎర్రగుంట్ల మండలాల్లో వడగాడ్పులు వీచే అవకాశం ఉందంటోంది. మిగిలిన చోట్ల కుడా ఎండ ప్రభావం చూపనుంది.

ఆదివారం ఎండలు దంచికొట్టాయి. ప్రకాశం జిల్లా కురిచేడులో 45.5, నెల్లూరు జిల్లా వెంకటాచలంలో 45.2, పల్నాడు జిల్లా రొంపిచర్లలో 44.8, గుంటూరు జిల్లా వట్టిచెరుకూరు మండలంలో 44.7డిగ్రీల గరిష్ఠ ఉష్ణోగ్రతలు నమోదయ్యాయంటే పరిస్థితి ఎలా ఉంటుందో అర్ధం చేసుకోవచ్చు. రాష్ట్రవ్యాప్తంగా 24 మండలాల్లో వేడి గాలులు వీచాయి. ఆదివారం విచిత్రమైన వాతావరణం కనిపించింది. ఉదయం నుంచి మధ్యాహ్నం వరకు ఎండ తీవ్రత ఉంటే.. కానీ ఆ తర్వాత వాతావరణం ఒక్కసారిగా మారిపోయింది. ఈదురు గాలులతో కూడిన భారీ వర్షం కురిసింది. కోస్తాలో ఎండతీవ్రత ఉక్కపోత పెరిగింది. రాయలసీమలో మాత్రం వేడిగాలులు వీచాయి.

మరోవైపు తిరుపతిలో ఆదివారం సాయంత్రం ఉరుములు మెరుపులు, ఈదురుగాలులతో వర్షం పడింది. వర్షంతో పాటు పెనుగాలులతో చెట్లు, విద్యుత్‌ స్తంభాలు నేలకూలాయి. నగరంలో అక్కడక్కడా వాహనాలపై చెట్లు కూలడంతో ధ్వంసం అయ్యాయి. విద్యుత్‌ స్తంభాలు నేల కూలడంతో కరెంట్‌ సరఫరాకు అంతరాయం ఏర్పడింది. రోడ్లపై చెట్లు నేలకూలడంతో ట్రాఫిక్‌ స్తంభించింది. ఉదయం నుంచి ఎండ దెబ్బకు ఇబ్బందిపడిన జనాలు వర్షంతో కాస్త ఉపశమనం పొందారు. అంతేకాదు ఏపీలోని మరికొన్ని జిల్లాల్లో కూడా ఆదివారం ఈదురుగాలులతో కూడిన వర్షం పడింది.